NKÔLAN 2 - Kalate Zambe Nnomo a Mfefe Mfefé Nkôñelan

Abialé Môze

¹ A nga bo na, fam éziñ ya ayoñ Lévi é nga lu'u ngon ya ayoñ dé émien;

² minga ate ve nyoñe abum a biaé monafam. Amu a nga yeme na a ne abeñe mon, nde a nga solé nye tañe ngon éla.

³ Eyoñ *zen ya beta solé nye é boya momo, a nga nyoñ nkoé nden a dube wô a afib bivindi meyañ ma tibetan e mo. Ane a nga bôé mon été, a nyoñe nkoé ôte a ke bôé wô e nsa'a ôsôé ézezañ bone bilé été.

⁴ Ane kale mone nyô é nga tebe ôbe ôyab a yange'e yen e jam da ye kui e be mon ate.

⁵ Ane ngon Faraoñ é nga ke ôsôé na a ke woban ba be bengon be binga ba ba'ale nye nsamba. Bengone be binga ba be kele ba wulu nsa'a ôsôé, ane ngon Faraoñ é nga yene nkoé nden ô bôô ézezañ bone bilé; nde a nga lôme mbo ésaé minga wé na a ke nyoñe wô.

⁶ Ane a nga kui wô a yene mone mona fam a yônôk. Ane a nga ko nye éngôngo a jô na a ne wua ya *bon Beébre!

⁷ Ane kale mone mone nyô é nga sili ngon Faraoñ na: Ye me ke loone wo mba'ale mon e be binga ya Beébre, nyô a ne nyia mon ate'

⁸ Nde ngon Faraoñ é nga yalan nye na, kelek. Ane mona minga ate a nga ke a loone nyia mon ate émien.

⁹ Ane ngon Faraoñ é nga jô nyia mon ate na: Kelee mone nyô a nyia ma nye mebé; ma ye ya'ane wo e tañe jôé. Ane a nga ke nyoñe mon a nyia nye mebé.

¹⁰ Eyoñ mon a nga bo ôbe'ebek, nde minga a nga ba'ale nye a nga kee nye e be ngon Faraoñ. Ane a nga nyoñe nye ane mone wé émien a yôlé nye jôé na Môze, amu a nga jô na me nga nyoñe nye e mendim.

Môze a tub a ke sobô Madian

¹¹ Ayab éyoñ e lôteya, ane Môze a nga bo nya môtô. Môs éziñ a nga kôlô *nda njô bôt na a ke a jome bobenyañ. Ane a nga yene ngule bisaé be nga bo, a yene fe môte ya Ejipte a bôme mone Hébre, wua ya bobenyañ bé.

¹² Ane a nga fombô li a li. Eyoñ a boya te yene môt, ane a nga wôé môte y'Ejipte a solé mbim e nsele'e si.

¹³ E môse baa, ve beta ke jome bobenyañ a koone befam bebaé ya Beébre be ju'an. Ane a nga sili nyô a nga ku étom na: Amu jé wo bôme monyoñ'

¹⁴ Môte nyô ve yalane Môze na: Za a nga telé wo évet a *ntyi'i mejô wongan? Ye wo kômbô fe wôé ma ane ô nga wôé môte ya Ejipte? Ane Môze a nga ko woñ *a simesan e nleme wé été na bôt be yemeya fo'o ajô ñwôane môte di.

¹⁵ Eyoñ Faraoñ a nga yem e jam e nga boban, ane a nga jeñe na be wôé Môze. Ve Môze a nga tub a ke sobô e Madian e fefele anjeñ.

¹⁶ Ntuni ya Madian a nga bili bobebinga zamgbwa; ane be nga zu laé mendim a jalé beta bilaba'a ya ve mbam biyem ésaa wob mendim.

¹⁷ Ve beba'ale mimbam biyem mi bôt bevok be nga titane be. Nde Môze a nga tebe tetele a volô be, a ve mbame wob mendim.

¹⁸ Eyoñ be nga bulan e be ésaa wob Reuél, ane a nga sili be na: Jé ja te bo na mi ji'a so e môse wu'

¹⁹ Nde be nga yalane nye na: Môt éziñ ya Ejipte nye a te kôté bia e mo beba'ale bevok, e nye fe a te laé bia mendim a nyuu me e mbame wongan.

²⁰ Ane ésaa wob a nga sili be na: Môte ya Ejipte ate a ne vé? Amu jé mia te li'i nye? Lo'one nye bi ve nye jôme ya di.

²¹ Ane Môze a nga kañese tabe e be môt ate. Ane môt ate a nga ve Môze ngo jé jôé na Séfôra a lu'u je.

²² Ane Séfôra a nga biaé mona fam; ane Môze a nga yôlé nye jôé na Gérschom, amu a nga jô na: Me ne *ntabe éza si.

²³ Ayab éyoñ e lôteya, ane njô bôte ya Ejipte a nga wu, bôte ya Israél ke be kele ôsu a tôbane étibela'a e miñyôn été. Ane ñyône wob ô nga bet a kui e be Zambe.

²⁴ Ane Zambe a nga wô'ô mintate miap. Ane a nga simesane élat jé a nga bo a Abraham, Izak a Yakob.

²⁵ Nde a nga fombô Israél a bu fek ajô mbia éto wop.