NKÔLAN 17 - Kalate Zambe Nnomo a Mfefe Mfefé Nkôñelan

Israél a kobô menyiñ e Refidim

¹ Ane nsamba bôt ôse ya Israél ô nga kôlô e *nkôte si ya Sin avale Nti a nga bendé nkôlane wop; ane be nga vule minkan e vôm ba loone na Refidim; mendim bôt be ne nyu me mbe momo.

² Ane bôt be nga wôman Môze a jô na: Va'a bia mendime ya nyu. Môze a nga yalane be na: Amu jé mia ve ma bijô, amu jé mia ve'ele Nti'

³ Valé ate évé é lateya bôt, ane be nga kobô menyiñ a wosane Môze be jô'ô na: Amu jé ô nga soo bia Ejipte na ô mane wôé bia a évé, mamien, bone bam a mimbam biyeme miam'

⁴ Ane Môze a nga yône be Nti a jô na: Ma ye bo jé mfa'a bôte ba? Amu a li'iya tyôtyoé na be lume ma *mekok.

⁵ Ane Nti a nga jô Môze na: Señesa'ane bôt ôsu a nyoñe bemvendé ya Israél; nyoñe fe *ntum, wu ô nga bibi wô beta ôsôé a wo ye ke ôsu.

⁶ Me nyô, me tele wo ôsu akôm Hôréb yôp, wo ye bibi akôm a mendim ma ye vam été éyoñe te bôt ba ye nyu. Ane Môze a nga bo nalé e mise bemvendé ya Israél.

⁷ Ane a nga yôlé vôm ate na Masa ba Mériba, amu bôte ya Israél be nga wôman a amu be nga ve'ele Nti be jô'ô na: Ye Nti a ne ézezañ jangan ye momo'

Bôt ya Amalék ba zu wosan Israél

⁸ Ane Amalék a nga zu wosane Israél e Refidim.

⁹ Ane Môze a nga jô Yasua na: Tobôk bia bôt; a akiti ma ye tebe abôbône nkô, ntume Zambe e wo.

¹⁰ Ane Yasua a nga bo aval ane Môze a nga jô nye. Môze, Aron a Ur be nga bete abôbône nkô.

¹¹ Eyoñ Môze a nga bete wo yôp, Israél nye a nga dañe ngu; éyoñ a sili wo si, Amalék nye a nga dañe ngu.

¹² Eyoñe mo me Môze me nga tek, ane be nga nyoñe akok a bôé nye de si, ane a nga tabe de yôp. Aron ba Ur be nga su'u nye mo, wua éfase ji a nyô mbok éfase ji; ane mo mé me nga yem a kui éyoñ jôb e nga dim.

¹³ Ane Yasua a nga dañe Amalék a bôte bé a meyo me nkpwaté mekôn.

¹⁴ Ane Nti a nga jô Môze na: Tili'i mam mete e kalate été a kate Yasua na: Ma ye tyame ôsimesane ôse be ne ngul ya simesan Amalék e jôbe si va.

¹⁵ Ane Môze a nga lôñe ata'a metuna'a vôm ate a yôlé nye jôé na: Nti a ne nlinga bita wom.

¹⁶ Ane a nga jô na: Amu wo ô betebaneya yôb a wosane éto njôane Nti, nde Nti a ye wosane Amalék akekui miaé mise.