NKÔLAN 16 - Kalate Zambe Nnomo a Mfefe Mfefé Nkôñelan

Menyiñ bôte ya Israél: abem, manna; Sabat

¹ Ane nsamba bôt ôse ya Israél ô nga kôlô Elim a kui e *nkôte si ba loone na Sin, e zañ Elim a nkôle Sinayi e ngone baa ya nkôlane wob ya Ejipte é too melu awôm a metan.

² Ane nsamba bôt ôse ya Israél ô nga kobô Môze ba Aron *abé e *nkôte si.

³ Ane bôte ya Israél be nga jô be na: Ngo'é nge Zambe a too ke ye kañese na, wo Nti ô wôé bia Ejipte, éyoñ bi nga too e fefele mevie'e me tit, éyoñ bi mbe bi ja'a belet abime ya jaé! Amu mi nga zuu bia e *nkôte si na nsamba bôt wu ôse bi wu a zaé.

⁴ Ane Nti a nga jô na: Ma zu noo mia belet é so'o yôp. Bôt ba ye kui atan a ba ye to'é je, *môs ane *môs, abime da yian, nalé ma ye ve'ele be a yen nge ba ye wulu ane atiñe dam e né, nge momo.

⁵ E môse saman, éyoñ ba ye yam abime ba te soo de, ba ye teme na e ntoo mebime mebaé, a lôte abime ya mimôs mivo'o mise.

⁶ Ane Môze ba Aron be nga jô bôte ya Israél ase na: Ngô'é ya den mia ye yeme na Nti nye a nga vaa mia Ejipte.

⁷ A mametyé mia ye yene étôto'o Nti, amu a wô'ôya menyiñ menan ma wosane nye; amu na bi ne beza, ane mi ne kobô menyiñ ma wosane bia'

⁸ Ane Môze a nga jô na: Ngô'é ya den Nti a ye ve mia tite ya di, a mametyé a ye ve mia belet abim mia ye di a jaé; Nti a wô'ôya menyiñ menan mi nga kobô me wosa'ane nye; amu bia bi ne beza? Menyiñ menan me nji wosane bia ve wosane Nti.

⁹ Ane Môze a nga jô Aron na: Jô'ô nsamba bôt ôse ya Israél na suba'an bebé asu Nti, amu a wô'ôya menyiñ menan.

¹⁰ A nga bo na, Aron a kobô'ô ékôane bôte ya Israél, ane be nga fombô mfa'a ya *nkôte si a yene étôto'o Nti é za'a *nkut été.

¹¹ Ane Nti a nga kobô Môze a jô na:

¹² Me wô'ôya menyiñ me bôte ya Israél, kobô'ô be na: E zañe ngô'é ébaé mia ye di tit, a mametyé mia ye jaé a belet; a mia ye yeme na me ne Nti, e Zambe wônan.

¹³ Mamengô'é ane akpwal e nga bet a yiane minkane mise; a mametyé be nga yene élok mbôma'ane minkan.

¹⁴ Eyoñ élo'o te é maneya, be nga yene si njalan a jôm éziñ é too ane bone mefes é funa'an meta'a.

¹⁵ Ane bôte ya Israél be nga fombô a môt ase a nga sili nyô mbo'o na: Man hu, e ne na, jé ji? Amu be nji yem jé nje jôme te é mbe. Ane Môze a nga jô be na e belet Nti a ve mia le na mi di.

¹⁶ Avale di nde Nti a nga bendé na: Nyoñan, môt ase, abim a ne di; môt ase jate jia, abime bôte bese be né; môt ase a ye nyoñ abime da yiane tañ bôt é ne *nda jé.

¹⁷ Ane bôte ya Israél be nga bo nalé, ane be nga kôan, bôt bevok, a lôte abime e mbe ntiñetan, a ba bevok be nga sise si ya abim e mbe ntiñetan.

¹⁸ E menda été, be nga su'ulane vek a ôvek ba loone na ômer. E môt ase a nga kôan alôte abim e mbe ntiñetan, a nji nyoñ a abet, a nyô a nga kôan a sise si ya abim e mbe ntiñetan, e bôt bevok be nji ke nyoñ a dañe nye; môt ase a nga nyoñ v'abime bidi da yiane nye.

¹⁹ Ane Môze a nga jô be na môt a bo'o te naane bika'aé.

²⁰ Ve be nga bo te vô'ôlô Môze; bevok be nga naane bika'aé, ane bitum bi nga bo été, nde bi nga mane ndaman. Ane Môze a nga yaa bôte bete.

²¹ Metyé mese môt ase a nga kôane abime da yiane bidi bié; éyoñ ayôñe vian e kuiya, *manna ate a mbe a mane nyemé.

²² E môse saman, be nga kôan abim da yiane ndian *môs mibaé, e ne na b'ômer bebaé. Bivet bise ya nsamba bi nga zu kate de Môze.

²³ A Môze a nga jô be na: Nalé ate Nti a nga jô. Akiti e ne môse abôk, mfufub Nti; yamane jôm mia yiane yam, a to'otô jôm mia yiane to'otô, abime da buk, jôka'ane de a kui mametyé.

²⁴ Ane be nga jô'é de a kui mametyé avale Môze a nga bendé; abim e nga bu'u te e nji ke ndaman, nge bo bitum.

²⁵ Ane Môze a nga jô na: Ja'ane de e môse wu, amu e môse wu ô ne môse *sabat e mfa'a Nti; nge mia ke fé den mia ye bo te yene jôm.

²⁶ Mia ye kôane *manna tañe môse misaman, ve môse zamgbwale ô ne môse *sabat, mia ye bo te yene jôm.

²⁷ E môse zamgbwale bôt b'éziñ be nga kui atane na ba ke kôane *manna, ve be nji yene jôm.

²⁸ Ane Nti a nga jô Môze na: A kui éyoñ évé mia ye bene ba'ale mebendé a metiñe mam.

²⁹ Yenane na Nti a veya mia awo'on, amu ajô te a veya mia bidi asu môse mibaé, e môse saman môt ase a tabe'e e vôm a né, môt éziñ a bo'o te kôlô e vôme wé e môse zamgbwale.

³⁰ Ane bôt be nga semé *sabat, nalé a ne na e môse zamgbwale.

³¹ Ane *nda bôt Israél é nga yôlé bidi bite jôé na *manna, a funa'ane fese korianda, éfumulu a *zam anyu ane begatô be wôé.

³² Ane Môze a nga jô na: Avale di nde Nti a bendé na, mi ba'ale ômer *manna wua asu miaé mi bôte mienan mia zu, ane miaé mia ye yene belet me nga ve mia mi di e *nkôte si, éyoñ me nga vaa mia mi kôlô Ejipte.

³³ Ane Môze a nga jô Aron na: Nyoñe éwolo a futi ômer *manna wua, a bôé éwolo te asu Nti, ane ba ye ba'ale *manna ate asu miaé mi bôte mienan mia zu.

³⁴ Avale Nti a nga bendé Môze, Aron a nga bôé éwolo *manna te ôsu meko'o metiñ ya élat mfa'a ya ba'ale je.

³⁵ Bôte ya Israél be nga di *manna tañ mimbu mewôm menyin, akekui éyoñ be nga kui vôme bôt be too; be nga di *manna akekui éyoñ be nga kui nné si ya Kanaan.

³⁶ Ômer wua a ne *ngab awômô ya ôve'e ba loone éfa.