NKÔLAN 12 - Kalate Zambe Nnomo a Mfefe Mfefé Nkôñelan

Ntelan abôk Pak

¹ Ane Nti a nga jô Môze ba Aron e si ya Ejipte été na:

² E ngone nyô, e mfa'a wônan, ja ye bo ngon ôsu ya bengon; ja ye bo, e mfa'a wônan, ngon ôsu ya mbu.

³ Koba'an ékôane bôt ése ya Israél na: Ngone nyô é too melu awôm, mia ye nyoñ, e *nda bôt ése, mone kabat, a *nda ése mone kabat.

⁴ Nge mone kabat a ne anen, *nda bôt ke tyôtyoé, wôna *nda éte ja ye di nye a bôt be ne be bebé ane tañe bôt é né. Mia ye kabe mone kabat a ve môt ase a ne ngul ya di.

⁵ Mone Kabat ate a yiane bo *mvo'é mimfa'a mise, nnôm a ntoo mbu wua; mia ye nyoñe nye nge e mintômba nge e bikela.

⁶ Mia ye ba'ale nye a kui e ngone nyô melu awôm a menyin, a Israél ase a too nsulan, a ye wôé nye e zañe ngô'é ébaé.

⁷ E menda mese ba ye di nye, mia ye nyoñe ngab ya metyi mé a wo'o me e mekôn mebaé me be'e *mbé, a e mimbé yôp.

⁸ Alu te ebien ba ye di minsôn mbuban e nduan a e belet é ne te mvusan, a bilo'o bi ne ayô.

⁹ Mia ye bo te di nye mbelan éfas nyumi éfas, nge ñyaman a mendim; ve mbuban e nduan: Nlô, mimbiaé a *miñya.

¹⁰ Mia ye bo te li'i jôm é kui mametyé: A nge jôm éziñ ja buk é kui tyé, mia ye di'i je e nduan.

¹¹ Avale di nde mia ye di nye: Kandé e ntiñetane mengeteñ, besilefas e mebo a *ntum e mo; mia ye di nye avô: A ne *pak e mfa'a Nti.

¹² Alu te ma ye lôt e si ése ya Ejipte a wôé mintôle mise ya été, ataté bôt a kui betit, a ma ye belan mintyi'ane mejô miam mi wosane bezambe bese ya Ejipte: ma me ne Nti.

¹³ E vôm ase mi né, metyi ma ye bo mia ndem; éyoñ ma ye yene me, ma ye dañe mia yôp, a teke ébubua éziñ ja wôé ja ye bo e be mia éyoñ ma ye bibi si ya Ejipte.

¹⁴ Môs ôte wo ye bo mia wu ya simesan, a wo ye bo mia wu ya beta mevak, abôk e mfa'a Nti. A miaé mi bôte mienan mia ye ba'ale de ane *atiñ ya nnôm éto na be bo *mebôk môs ôte.

¹⁵ Mia ye di belet é ne te mvusan tañ melu zamgbwa. Ataté e *môs ôsu, mia ye vaa jôm ja vusu belet e menda menan, amu môt ase a ye di belet é ne mvusan ataté e *môs ôsu a kui e wu zamgbwale, ba ye vaa nye Israél été.

¹⁶ E *môs ôsu, môt ase a ye nyoñe nloon ô ne étyi, a e môse zamgbwale wô fe ô ne étyi. Teke ésaé éziñ ja ye boban mimôs mite, vengevenge ve ñyaman bidi asu môt ase ya e be mia.

¹⁷ Mia ye ba'ale abôk belet é ne te mvusan, amu *môs ôte ôbien ñwô me nga vaa minsamba mienan mi kôlô Ejipte: mia ye ba'ale *môs ôte ane atiñe ya biyoñ bise asu miaé mi bôte mienan mise.

¹⁸ E ngon ôsu ya mbu ataté melu awôm a menyin mamengô'é a kui melu mewôm mebaé a da mamengô'é, mia ye di belet é ne te mvusan.

¹⁹ Nté melu zamgbwa, ba ye bo te koone jôm ja vusu belet e menda menan été: amu môt ase a ye di belet é ne mvusan ba ye vaa nye Israél été, to'o a ne nneñ nge bialébialé ya si éte.

²⁰ Mia ye bo te di belet é ne mvusan; mevôm mese mi too, mia ye di belet é ne te mvusan.

²¹ Ane Môze a nga loone bemvendé bese ya Israél a jô be na: Toban a biane bone bekabat asu denan, *nda bôt ése kabate jia, éyoñ te mia ye tyi'i *pak.

²² Mia ye nyoñe abusa izôp a dube de metyi me ne fandé été; éyoñe te mia ye miame me e mimbé yôb a mekône mebaé me be'e *mbé ô ne mbômelan. A teke môte ya be mia a ye kui atan ya *nda jé akekui mametyé.

²³ Nti a ye lôt a wôé bôte ya Ejipte, a éyoñ a ye yene metyi e *mbé yôp, a e mekôn mebaé ya *mbé ô ne mbômelan, a ye lôt e *mbé yôb a bo te kañese na awu e zu e menda menan a wôé mia.

²⁴ Akekui nnôm éto, mia ye ba'ale njôane wu ane *atiñ mfa'a wôé a miaé mise ya bone bôé.

²⁵ A ye bo na, éyoñ mi kuiya e si Nti a ye ve mia aval'ane a nga tiñeti, mia ye ba'ale jame ya nkañan di.

²⁶ A éyoñ *bon benan ba ye sili mia na jam ya nkañan di da tinan aya mfa'a wônan'

²⁷ Mia ye yalane na: A ne mveane ya nlôtan mfa'a Nti, nye a nga lôt menda me bôte ya Israél yôb Ejipte, éyoñ a nga wôé bôte ya été a nyii menda mangan. Ane bôt be nga lui mesu si *a kañ.

²⁸ E nde bôte ya Israél be nga ke a bo ane Nti a nga bendé Môze ba Aron, nalé be nga bo.

²⁹ E zañ alu, ane Nti a nga wôé mintôle mise ya Ejipte, ataté ntôle fam Faraoñ a too éto njôô jé a kui mi y'alo e ne menda a mintôle ya mimbam biyem;

³⁰ Ane Faraoñ a nga kôlô si a alu, émien a bebo bisaé bé bese, a bôte bese ya Ejipte. Beta ñyôn a nga boban Ejipte été, amu teke *nda éziñ ya bôte ya Ejipte é mbe teke mbim.

³¹ Alu te ebien, Faraoñ a nga loone Môze ba Aron a jô be na: Teba'ane tetele mi kôlô ézezañ ya bôte bam été, miabebien a bôte ya Israél fe, kelan a bo'one Nti ésaé avale mi nga jô.

³² Nyoñane fe mimbam biyem mienan, mi mi ne anen a mi mi ne tyôtyoé, aval ane mi nga jô; kelan, a botane fe ma.

³³ Bôte ya Ejipte be nga tindi Israél a kôlô be si jab avô; amu be nga jô na: Bia bese bi ntoo bewu.

³⁴ Bôte ya Israél be nga nyoñ mfu'ane avut wop, valé ô ngenan te vus. Ane be nga tiñeti befandé be mfu'ane avute te e besandé biyé été a be'e be e bituu.

³⁵ Bôte ya Israél be nga bo fe ane Môze a nga lebe be, amu be nga sili bôte ya Ejipte mimbot mi silba a mvot, a akum ya jaé.

³⁶ A Nti émien a nga bo na bôte ya Israél be yene *mvam e mise me bôte ya Ejipte, ajô te be nga ve be ngul ya nyoñ jôm ése be nga sili. Nalé ate Israél a nga sa bôte ya Ejipte.

Bôte ya Israél ba kôlô Ejipte

³⁷ Ane Israél a nga wulu ataté vôm be nga too jôé na Ramzés a kui vôm be nga taté wo'on jôé na Sukôt be too fame fam ja wulu a mebo toyini mintet misaman, te lañe binga a bongô.

³⁸ Abui bôt ya *meyoñ e nga tôñe fe be a ke nsamba wop. Be nga bili fe beta mimbam: Mi betit be ne tyôtyoé a mi betit be ne anen.

³⁹ E Sukôt nye be nga yam begatô be ne te vus a mfu'an avut be nga so wô Ejipte, amu mfu'ane avute te ô nji bi mvusu, amu be nga titane be Ejipte, avale ya na be nji bi éyoñ ya beta yange nge kômesane bebien nga'aban.

⁴⁰ Israél a nga tabe Ejipte mimbu mintet minyin a mewôm mela.

⁴¹ E *môs ôbien mbu mintet minyin a mewôme lale ô nga kpwaan, ñwô minsamba mewosane mi Nti mise mi nga kôlô Ejipte.

⁴² Alu te e mbe alu Nti a nga bo évévé mfa'a ya vaa Israél Ejipte, alu ya évévé mfa'a bôte ya Israél bese na be ba'ale metiñ ya abô'ô *pak.

⁴³ Ane Nti a nga jô Môze ba Aron na: Metiñ ya *pak e me ma: teke nneñ a ye di nye.

⁴⁴ Ve *ôlo ôse be nga kus a moné ô ne di éyoñ mi maneya tyi'i nye atyel.

⁴⁵ Nneñ a mbo ésaé a nyoñe tañ ba ye bo te di nye.

⁴⁶ Mia ye di nye fo'o ve *nda été; mia ye bo te kui minsône mié atan, a mia ye bo te bu'u éves éziñ.

⁴⁷ Ekôane bôt ése ya Israél ja ye bo abô'ô *pak.

⁴⁸ Nge nneñ a too e be wo a kômbô nyoñe ngab abô'ô Pak, mfa'a Nti, fam ése é ne e *nda jé ja yiane taté tyi'ibane atyel, éyoñe te a ntoo ngul ya subu bebé a nyoñe ngab abô'ô *pak amu a ntoo aval ane bialébialé. Ve teke môt a ne te ntyi'ibane atyel a ye di *pak.

⁴⁹ Nneñ a ne *ntabe e be wo a bialébialé ba ye wulu atiñe da si.

⁵⁰ Bôte ya Israél bese be nga bo fo'o v'ane Nti a nga bendé Môze ba Aron;

⁵¹ *môs ôte ôbien Nti a nga vaa bôte ya Israél Ejipte be too mbamba nta'an *minsamba mewosan.