NEHEMIE 9 - Kalate Zambe Nnomo a Mfefe Mfefé Nkôñelan

Ntyiane bidi a mmeman abé

¹ Ngon éte é too melu mewôm mebaé a menyin, bone b'Israél be nga sulan be be'e minkuta a nyôle ñwo'on asub a étek asu mbômbane zaé ya kañe Zambe.

² Eyoñe bôte bese ya mvoñe Israél be maneya kandan a bikuu be nga sulane vôme wua, asu ya meme minseme miab a bikobe b'ésaa bap.

³ Eyoñe be nga tebe tetele e vôme wop, be nga lañe kalate metiñe Nti, e Zambe wop, tañe *mewolo mela; tañe *mewolo mefe mela, be nga meme minseme miap, a kumbu si asu Nti, e Zambe wop.

⁴ Yasua, Bani, Kadmiél, Kebania, Buni, Kérébia, Bani a Kenani, be nga bet e fôsbôdene Belévit a yôtane tyiñe yôb be Nti, e Zambe wop.

⁵ A Belévit, Yasua, Kadmiél, Bani, Akabnia, Kérébia, Odiya, Kebania a Petaya be nga jô na: Teba'an betetele a kañane Nti, e Zambe wônan, ataté nnôm éto a kui nnôm éto! Ba yiane kañe jôé dôé e n'étôtok, nde da dañ ébotan ése a ékaña'a ése!

⁶ Wo Nti, wo étam ô nga té yôp, yôbe ya môp a nkane bita wé ôse, nalé fe si a jôm ése é n'été; mañ a biôm bise bi n'été. Wo ve biôm bite bise ényiñ. Nkane bita ya yôp wo kumbu si ôsu viôé.

⁷ Wo, e Zambe a ne Nti, ô nga tobe Abram a bo nye na a kôlô Ur ya Kaldé. Ô nga yôlé nye jôé na Abraham.

⁸ Ô nga yen a bili *nlem ô ne *zôsôô asu dôé: ajô te ô nga bo élat a nye na ô ve mvoñe bôte jé si bôte ya Kanaan, Behétieñ, Beamorééñ, Beférézieñ, Beyébuzieñ a Begirgazieñ, a ô nga tôé njôane wôé amu wo fe ô ne *zôsôô.

⁹ O nga yene nju'u b'ésaa bangan Ejipte,

¹⁰ a ô nga wô'ô fe miñyône miab e mfôm évele mañ, ô nga liti mendem a bitua bi mam bia wosane Faraoñ, bebo bisaé bé a bôte bese ya si jé, amu ô mbe ô yemek avale be nga belane be a mebune mese. Ajô te ô nga bo na jôé dôé e wum a kui môse ya den.

¹¹ O nga kandé mañ ôsu viap, a be nga lôt e nkôte ya ézezañe mañ; ve ô nga sô'ôlô ba be nga tôñe be mvus e yee été aval ane ba wua akok e ngule mendim.

¹² Amôs, ô nga liti be *zen a nsume nkut; a alu, ô nga faé éfufub e zene be nga yiane tôñ a nsume nduan.

¹³ O nga sis e nkôle Sinayi yôp; ô nga ve be minjôan mi ne *zôsôô, metiñe bebela, memvinda a mebendé bi ne étua mvaé.

¹⁴ O nga bo na be yeme Sabate wôé a n'étyi, a ô nga kalane be mebendé, memvinda a metiñ e be Môze mbo ésaé wôé.

¹⁵ O nga ve be bidi bi so'o yôb éyoñ be nga wô'ô zaé; éyoñ be nga wô'ô évé, ô nga ve be mendim me so'o ako'o été, a ô nga jô be na be nyoñe si ô nga kane ngana na wo ye ve be.

¹⁶ Ve balé bete a b'ésaa bangan be nga bo mebun a ntibe ya bo wo mewôk. Be nji ke bo mebendé môé mewôk,

¹⁷ be nga bene bo mewôk a bo te fe simesan bitua bi mam ô nga bo be. Be nga bo melo, a e mbenan éjôé wob été, bebien be nga telé évete na be bulan éto belo Ejipte. Ve wo ô ne e Zambe *a jamé, nyô a ko éngôngol a mvamane bôt, te ji'a yaa a *mvam abui, ô nji ke li'i be,

¹⁸ to'o éyoñ be nga kôme bebien mone nyak a ékpwembé é ne nyeman a jô na: Zambe wôé a nga soo wo Ejipte nye nyô, a éyoñe be nga bo wo mame ya na ô yaa,

¹⁹ e beta mvame wôé été, ô nji ke li'i be *nkôte si, a nsume *nkut ô nji ke jô'é liti be *zen a *môs e dulu dab été, nge nsume nduan e jô'é faé b'éfufup a alu e zene be nga yiane tôñ.

²⁰ O nga ve be mbamba *nsisim ya yeme yemelane mam; ô nji ke bene ve be mana e menyu map, a ô nga ve be mendim amu évé jap.

²¹ Nté mimbu mewôm menyin, ô nga ba'ale be e *nkôte si, be nji ke jeñe jôm éziñ; mengômesane mab me nji ke wu, a mebo mab me nji ke vus.

²² O nga ve be bijôé a *meyoñ, a ve be bifuse bi si bi ne e minné yôb ane ngap. Be nga nyoñe si njô bôte Sihoñ, nalé fe e si njô bôte ya Ebroñ, a si Og, njô bôte ya Basañ.

²³ O nga fôlô bone bab an'ateté ya yôp, a nyiñeli be e si ô nga jô b'ésaa na ba ye nyoñ é bo énjap.

²⁴ Ane *bon, ô nga samele bôte ya Kanaan be too si éte ôsu viap, a ve be je e mo map, nalé fe bejô bôte bab a *meyoñ mese ya si éte na be bo be ane ba kômbô.

²⁵ Be nga nyoñ bitison bi ne mbôman a alem, si jap é too fe atek; be nga nyoñe menda me ne njalan a mevale m'akume mese: menjeñe mfa'an, mefube mindik, beôlivié a bilé bia wume bibuma abui abui; be nga di, be nga jaé, be nga vem a nyiñ e mefo'o été, amu beta mvame wôé.

²⁶ Akôsa bo nalé, be nga bo melo a ben éjôé jôé. Be nga lume metiñe môé mvus; be nga wôé bekulu mejô bôé be nga bendé be na be beta kôñelane be wo a bo te beta bo mam ma soñe wo.

²⁷ Ajô te ô nga ve be e mo besiñe bap, be ve tibili be. V'éyoñe nju'u wop, be nga yône be wo, a wo ô nga wô'ô be ô too e yôb été; e beta mvame wôé été, ô nga ve be bekôté bôt be nga nyii be e mo besiñe bap.

²⁸ Eyoñ be biya awo'on, be nga beta taté na ba bo *abé asu dôé, éyoñe te ô nga li'i be e mo besiñe bap, be ve dañe be. Ve be nga beta yône be wo, a wo ô nga wô'ô be ô too e yôb été, a e beta mvame wôé été ô nga nyii be biyoñ biyoñ.

²⁹ O nga lebe be na be bulane be wo, ve be nga bo mebun a bo te vô'ôlô mebendé môé. Be nga bo minjôane miôé *abé, mmie mia bo môt ase a bo mie mewô'ô na a nyiñ; be nga bete bitul, mbetane ya ben éjôé; be nga bo melo a be nji ke bo mewôk.

³⁰ O nga jibi be abui mimbu, a lebe be a nsisime wôé anyu be bekulu mejô bôé: ve be nji kee melo map. Ajô te ô nga kee be e mo meyoñe bikuu.

³¹ E beta mvame wôé été, ô nji ke mane jiane be, nge li'i be, amu ô ne Zambe a mvaman a ko éngôngol.

³² Eyoñe jina, a Zambe wongan, Zambe a ne anen, ngul a éko woñ, wo wo ba'ale élat a *mvam, te yene nju'u wo kui be bia ane mone jam: biabebien, bejô bôte bangan bebo bisaé bangan, betuni bangan, bekulu mejô bangan, a bôte bôé bese, ataté éyoñe bejô bôte y'Asiri, a kui môse wu.

³³ Mfa'a jam ese e kuiya e be bia, ô ne *zôsôô, amu ô litiya na ô ne fo'o *zôsôô, ve bia bi boya *abé.

³⁴ Bejô bôte bangan, bivete biangan, betuni bangan a b'ésaa bangan, be nji bo metiñe môé, a be nji ke tabe mebendé môé nge *melep ô nga ve be ntyel.

³⁵ Eyoñ be nga too si jap, ézezañ ézu'u akum, ô nga ve be si é ne ndam a atek, nje ô nga telé ôsu viap; be nji ke saane wo, a be nji ke bulane mvus e mbia mimboone miap été.

³⁶ Den bi ntoo alo! Bia bana bi ntoo alo e si ô nga ve b'ésaa bangan na be di bibuma bié a mefo'o mé!

³⁷ Abui mefo'o ya si éte, é ntoo asu bejô bôt ô nga futi éjôé jangane si, amu minseme miangan; bejô bôte bete ba tibi bia yôp éyoñe ji ane ba kômbô, avale te fe ba bo biyeme biangan: éyoñe ji bi ne e beta ôlun été!