NEHEMIE 8 - Kalate Zambe Nnomo a Mfefe Mfefé Nkôñelan

Bôte bese ba vô'ôlô nlañan metiñ

¹ Ngone zamgbwale é nga kui bone b'Israél be too e bitisone biap. Eyoñe te ñhe bôte bese be nga sulan ane môte wua, e vôm a mbe ôsu ya *mbé mendim. Nde be nga jô Esdras, Ntili bekalate na, a zuu kalate metiñe me Môze, mme Nti a nga bendé Israél.

² Ane Esdras, *ntuni, a nga soo kalate metiñ ôsu ékôane bôt, é mbe befam a binga, a ba bese be mbe nguleya wô'ô jam é nga jôban. Jame di é nga boban ngone zamgbwale é too alu da.

³ A nga lañ e kalat'été, ataté mametyé a kui zañe *môs, a tele vôm a ne ôsu *mbé mendim: befam, binga a ba be mbe nguleya wôk be too. Bôte bese be nga tu'a vô'ôlô nlañane kalate metiñ.

⁴ Esdras, ñyeme bekalate, a nga tele e mon'éwolo bilé yôp, nye a nga kômban amu awolo te. Bôte bana be nga tele nye fefel e mbo nnôm: Matitia, Séma, Anaya, Uri, Ilkiya a Maséya: e mbo ngal: Pedaya, Mikaél, Malkiya, Asum, Asbadana, Zakari a Mesulam.

⁵ Ane Esdras a nga kui kalate bôte bese be lôô, amu a mbe a tele ôyabe yôp a dañe bôte bese. Eyoñ a nga kui nye, nde bôte bese be nga tebe betetele.

⁶ Esdras a nga botane Nti, e Zambe a ne anen, a bôte bese be nga yalane na: Amen! Amen! Ve kumbu *a kañ asu Nti, mesu me butu si.

⁷ Yasua, Bani, Kérébia, Yamin, Akub, Kabetayi, Odiya, Maséya, Kélita, Azaria, Yôzabad, Anañ, Pelaya a Belévit, be nga bo ésaé ya kôñelane be metiñe na be tu'a me wôk a bôte bese be nga tele betetele.

⁸ Be mbe be lañek ne sañesañ e kalate metiñe me Zamb'été, a kate atinan ya vôm ba te lañ, ane bôt be ne tu'a wôk jôm ba te lañ.

⁹ Néhémie ngovina, Esdras *ntuni a ñyeme bekalate, nalé fe belevite, be nga bo ésaé ya ye'ele bôt. Be nga jô bôte bese na: Môse wu ô ne ntelan ngumba asu Nti, e Zambe wônan. Te taban ôlun été nge e mili'i été! Amu bôte bese be nga yôn éyoñ be nga wô'ô mejô ya kalate metiñ.

¹⁰ Esdras a nga jô be na: Kelan a di betit be ne avoñ, a nyu biôm bi n'évôvoé, a lôme mengap e be ba be nji bi jôm: amu môse wu ô ne ntelan asu Nti wongan; te wô'an ôlun amu ava'a Nti nde é ne ngule jenan.

¹¹ Belévit be je'e bôte bese minlem be jô'ô na: Taba'ane bivôl, amu môse wu ô n'étyi, te wô'an ôlun!

¹² Ane bôte bese be nga ke be nga tu'a wô'ô mejô be nga kate be.

Abô'ô bibem

¹³ E môse baa, minlô menda me bôte ya ngum ayoñ betuni a Belévit, be nga sulan e be Esdras ñyeme bekalate na be vô'ôlô mejô ya metiñ.

¹⁴ Be nga koone ntilan e metiñ été na Nti a nga kobô a anyu Môze na: Bone b'Israél ba yiane tabe bibeme si éyoñ abô'ô ya ngone zamgbwale da boban.

¹⁵ Nalé fe na ba yiane mialane foé e bitisone biab a e Yérusaleme na: Kelane nkôl a nyoñ mebui m'ôlivié, mebui m'ôlivié y'afan, mebui me mirte, mebui melen a mebui bilé bise bi bili abui mekaé, mi lôñe bibem, avale ntilan ô né.

¹⁶ Nde bôte be nga ke a nyoñe mebui bilé mete. Be nga lôñe bebiene bibem, môt ase éfuse si ya *nda jé, e minseñe miap, e minseñe ya *nda Zambe, e vôme ya *mbé mendim, a e vôme ya *mbé Efrayim.

¹⁷ Ekôane bôt ése ya ba be nga so minkôm é nga lôñe bibem a tabe bie si. Ataté melu Yasua mone Nun a kui môse wu, bone b'Israél be nji tame bo jame nalé: beta mevak me nga boban.

¹⁸ Môs ôse be nga lañ e kalate metiñ été, ataté *môs ôsu a kui wu wo su'ulan. Be nga jem abôk tañe melu zamgbwal. Ekôan ja dib abôk é nga boban e môse muame, aval ane ñye'elan ô mbe.