NEHEMIE 6 - Kalate Zambe Nnomo a Mfefe Mfefé Nkôñelan

Bindeñela'a bife ya besiñ

¹ Eyoñe Sambala, Tôbiya, Gésém mon'Arabe a besiñ bangan bevok be nga nyoñe foé na, me beteya mane lôñe mfine *mekok, a na teke fe vôm éziñ a yoo, valé me ngenan te futi bivin e mimbé,

² Sambala a Gésém be nga lôme ma mbañete na: Za'ak, bia be wo bi tame laan e Kefirim, e mbi'ili Onô. Valé be maneya kômesane na ba zu bo ma mbia jam.

³ Nde me nga lôme be éyalan a minlômane na: Me bili beta ésaé ya bo, a me se nguleya sis: amu jé ésaé ja yiane tebe nté ma li'i je a zu e be mia'

⁴ Mbañete wua be nga lôme wô tañe biyoñ binyin, a ma me nga bulane be v'avale éyalane da.

⁵ Nde Sambala a nga lôme ma mbañete te wua éyoñe tane a ésoé mbo ésaé jé é bili kalate e mo a yoo.

⁶ Kalat'ate a mbe ntilane na: Foé ja mialan e *meyoñ, a Gasmu a yemete na, wo a Beyude mi bili ôsimesan ya ben éjôé, ajô te wo beta lôñe mfine *mekok. Ba jô na wo ye bo njô bôte wop.

⁷ Ô teléya fe telé bekulu mejô be kulu mejô e Yérusalém asu dôé na: Njô a ntoo e Yuda! Eyoñe ji avale menyiñe te da ye kui e be njô bôt. Za'a ñhe bia be wo bi fase jame te.

⁸ Ane me nga yalane nye na: Avale menyiñ wo kobô de le e nji ke bo été, womiene wo té té de!

⁹ Amu bôte bete bese be nga kômbô ve bia woñ be jô'ô na: Ba ye dimili ngule minlem, a ésaé ja ye bo momo. A Zambe va'a ma ngul éyoñe ji!

¹⁰ Nde me nga ke e be Semaéya, mone Delaya, mone Meyetabél, a nga fet émien e *nda été a jô na: Za'a bi ke nsamba e *nda Zambe, ézezañe *nda Zambe a dibe mimbé y'été, amu ba zu wôé wo, a ba ye zu wôé wo a alu.

¹¹ Me nga yalane na: Môt a ne ane ma a ne nguleya tub'aya? A môte *mbé a ne ane ma a ne nguleya nyiine *nda Zambe a nyiñ? Me se nguleya nyiin.

¹² Me nga su'ulane yeme na sake Zambe ny'a nga lôme nye, v'a nga kulu ajô dame nalé amu Sambala a Tôbiya be nga kuse nye.

¹³ Eyoñe be nga kuse nye, be nga simesane na ma ye ko woñ a tôñe mefe'e mé, a bo jam é ne nsem; éyoñe te be nga ye ve ma mbia jôé asu ya samele ma.

¹⁴ A Zambe wom, ô simesa'ane Tôbiya, Sambala, a mimboone miap, nalé fe Nôadia, minga a ne *nkulu mejô, a bekulu mejô bevok; be nga jeñe na be ve ma woñ.

¹⁵ Mfine *mekok ô nga man e ngon'élul é too melu mewôm mebaé a metan, tañe môse mewôm metan a mibaé.

¹⁶ Eyoñ besiñe bangane bese be nga wô'ô ajô te, ba bese be ne te yeme Zambe be bôma'ane bia, be nga ko woñ a silibane si e mise mabe mebien, a su'ulane yene na: Ésaé é nga boban amu nkômbane Zambe wongan.

¹⁷ Melu mete, biwôlô bi bôte biziñe ya Yuda fe bi nga lôme Tôbiya bekalat'éyoñ ése, bekalate bevo'o be so'o be Tôbiya be kelek e be be.

¹⁸ Amu bôt abui ya Yuda be nga kalane minkale ya late nye ngbwa, amu a mbe nnôme ngone Sekaria, mone Ara, a na, mone wé, Yôanañ, a nga lu'u ngone Mesulam, mone Berékia.

¹⁹ Be mbe be se'e nye, me too, be kele fe kate nye mam ma kobô. Tôbiya a nga lôme bekalate ya ve ma woñ.