NEHEMIE 2 - Kalate Zambe Nnomo a Mfefe Mfefé NkôñelanNkeane Yérusalém ( Esd 7 ; Eza 58:12 ; Sam 10:24) 1 E ngone Nisañ, mbu mewôme baa Artakzersés a nga jôô, woon a mbe a tele ny'ôsu, ane me nga nyoñe woon ate a kalane nye njô bôt. Mbot ô nji ke tame bo ma asu nalé éyoñ éfe asu dé. 2 Nde njô bôt a nga sili me na: Amu jé asu dôé e ne éyôé, teke na wo kon? Ôlune te wo yiane bo ve wu ya *nlem. Beta woñ a nga bi ma, 3 ajô te me nga yalane njô bôte na: Njô bôt a tabe'e nnôm éto! Asu dam da ye bo te bo éyôé aya éyoñe tisone mesoñe b'ésaa bam é ntoo ntyaman, a mimbé mié ndi'an a nduan' 4 Nde njô bôt, a jô me na: Wo sili ñhe jé? Me nga ye'elane Zambe ya yôp 5 a yalane njô bôte na: Nge njô bôt a kañese, a nge mbo ésaé wôé a yeneya mvame be nye, lôme ma e Yuda, mfa'a tisone mesoñe b'ésaa bam é né, naa me beta lôñe je. 6 Nde njô bôt ngal a too nye fefel, a nga yalane me na: Dulu dôé da ye tabe nté ôvé, a wo ye bulan éyoñ évé? Ajô te njô bôt a nga yene mvaé ya suu ma me ke, a me nga kate nye nté dulu da ye tabe. 7 Me nga jô njô bôte na: Nge njô bôt a yene mvaé nalé, be ve ma bekalate asu bejôô ya bifuse bi si bi ne Efrate yat, nalé ba ye jô'é ma me lôt, akekui ma ye suane Yuda, 8 a kalate mfe asu Asaf, mba'ale mefane njô bôt, éyoñe te a ye ve ma bilé asu mimbé ya beta nka'alé a ne bebé *nda Zambe, asu beta mfine meko'o ya tison a asu *nda ma ye ke tabe. Nde njô bôt a nga ve ma kalate ate: amu mbamba wo Zambe wom ô mbe be ma. 9 Ane me nga ke e be bejôô ya bifuse bi si bi ne Efrate yat a ve be bekalate be njô bôt. Njô bôt a nga lôme bivete *minsamba mewosan a bebebe bikabela be ke li'itane ma. 10 Eyoñe Sambala, mone Orônite, a Tôbiya, mbo ésaé a too mone Amonite, be nga wô'ô jame te, be nga nyoñe de mbia nyoñan nyô na: Môt a so na a zu jeñe mvaé bone b'Israél. 11 Ane me nga kui Yérusalém a tabe été melu mela. 12 Nde me nga kôlô si a alu, teke kate môt éziñ jame Zambe wom a nga futi e nleme wom été na me bo asu Yérusalém. Me nji ke bi tite fe ve nyô me nga bete yôp. 13 Me nga kui atan a alu, a lôt e *mbé ya mbi'ili, asu e lôô ma mfa'a ya anjeñe dragoñ, a mfa'a ya *mbé akun, me kele ma fombô mimfine ya Yérusalém mi nga bu'i, a mimbé mi nga di'iban a nduan. 14 Me nga lôt bebé *mbé anjeñ, a bebé étame njô bôt, ve vôme tit me nga bete yôp é mbe ngul ya lôt a mbe momo. 15 Me nga tulan mimbô'ôlé mi mveñ a alu ese, a ke ma fombô mfin. Eyoñe te me nga beta lôte *mbé ya mbi'ili, a bulane mvus. 16 Bekobô mejô be nji ke yeme vôm me nga ke, nge jôm me nga bo. A kui éyoñe ji, me nji ke kate Beyude jam éziñ, nge betuni, nge biwôlô bi bôt, nge bekobô mejô, nge bôte bevo'o be mbe be bili ésaé éziñ. 17 Ane ñhe me nga jô be na: Mi lôô abime nju'u bi tele été di! Yérusalém a ne ntyaman, a mimbé mié ndi'an a nduan! Za'an, bi tame beta lôñ mfine meko'o ya Yérusalém, nalé bia ye bo te beta nyiñ ôson été. 18 Ane me nga kañete be ane mbamba wo Zambe wom ô mbe be ma, a mejô njô bôt a nga kobô ma: nde be nga jô na: Nkôla'ane si, bi lôñ! Ane be nga nyoñe ngul amu mbamba ntyi'an be nga tyi'i ate. 19 Eyoñe Sambala, mone Orônite, Tôbiya, mbo ésaé mone Amonite, a Gésém, mone Arabe, be nga wô'ô jame te, be nga woé bia a biasé bia. Be nga jô na: Jé mia bo le? Ye mia bene njôane njô bôt' 20 Nde me nga yalane be na: Zambe ya yôb a ye bo na ésaé é wulu bia *mvo'é, bebo bisaé bé, bia ye kôlô si a lôñ: ve mia mi nji bi ngap, nge ngul, nge jame ya simesan e Yérusalém été. |
Bible en langue Bulu © L'Alliance Biblique du Cameroun, 2007, 2015.
Bible Society of Cameroon