NEHEMIE 13 - Kalate Zambe Nnomo a Mfefe Mfefé Nkôñelan

Nkômane mam mevale meval

¹ Melu mete be nga lañ e kalate Môze été, bôte bese be too, a koone ntilane na: Mon'Amonite a mone Môabite be nji yiane nyiin ésulane bôte Zambe,

² amu be nji ke zu tôbane bone b'Israél be bili belet a mendim, a amu be nga kuse Balame na a yo'é be: ve Zambe wongan a nga kôñelane biyo'é bi bo bibotan.

³ Eyoñ be nga wô'ô *atiñ, be nga kandé Israél a bikule bise.

⁴ Nalé a ngenan te boban, Eliasib, *ntuni a mbe ntelan e bitune bi *nda bi Zambe wongan, a too fe évuvumane Tôbiya,

⁵ a nga ve nye beta étune *nda, e vôme mimvean, ôtu, biôm mebelan, *ngab awômô ya fôn, mfefé woon a mbon, biôm bi nga veban asu Belévit, beyia bia a beba'ale mimbé, a biôm be nga vaa asu betuni bi nga taté bo bi tabe'e.

⁶ Me mbe momo Yérusalém éyoñe mam mete me nga boban, amu me nga beta bulan e be njô bôt, mbu mewôme lale a baa Artakzersés njô bôte ya Babilôn a nga too. Amané mbu, njô bôt

⁷ a nga ve ma nguleya beta zu Yérusalém, éyoñe te nje me nga yene mbia jam Eliasib a nga bo na a ve Tôbiya étune *nda ya minseñe *nda Zambe.

⁸ Nde me me nga wua biôme bi Tôbiya bise atan.

⁹ A me nga ve tyiñe na be mane tune bitune bi *nda, éyoñe te me nga beta mane futi biôme ya *nda Zambe été: mimvean a ôtu.

¹⁰ Be nga kate fe me na mengabe Belévit me nji ke veban, a na Belévit a beyia bia be nga bili bisaé ya bo be nga mane tup, môt ase afube dé.

¹¹ Nde me nga ve bekobô mejô bijô a jô be na: Amu jé *nda Zambe é li'iya teke môt? Ane me nga sulane Belévit a beyia bia a bulane môt ase ésaé jé.

¹² Eyoñe te Yuda ase a nga zuu *ngab awômô fôn, mfefé woon a mbon e vôm ba naane biôm.

¹³ Esaé ya ba'ale mevôm ba naane biôm, me nga ve je Sélémia *ntuni, Sadok ñyeme bekalate, Pedaya wua ya Belévit, Anañ mone Zakur, mone Matania a too be fefel, amu mbamba jôé be nga bili na be ne *zôsôô. Be nga nyoñ'ésaé ya kabe bobenyañe babe biôm.

¹⁴ O Simesa'ane ma, a Zambe wom, amu jame te, a te tyame mimboone ya mbunan me boya mfa'a ndaa Zambe wom a mame mé ya nkañan.

¹⁵ Melu mete, me nga yene bôt e Yuda, be miate bibuma e môse Sabat, be nyoñe mimbome bidi a beté mie e bijakase yôp, nalé fe woon, bibuma bi figié bibuma bi rézéñ a mevale mimbe'e mefe, a zuu bie e Yérusalém môse Sabat; a me nga komekane be môse be nga kuane bidi biap.

¹⁶ Bôte ya Tire fe be nga too valé a mevale m'akume mese a kuane me môse *sabat e be bôte ya Yuda a e Yérusalém.

¹⁷ Me nga ve biwôlô bi bôte ya Yuda bijô a jô be na: Mbia jam mia bo nyô a tinane jé éyoñe mia ndaman étyi ya môse *sabat'

¹⁸ Ye saa nne b'ésoo benan be nga bo ana? Ajô te e Zambe wongan a zuu mbia be mame bana be bia a e tisone nyô. A mia mia kô'ôlan ayaa dé e nyôl Israél éyoñ mia ndaman étyi *sabat!

¹⁹ Nné ane mimbé ya Yérusalém mi nga tabe e dibi été, te na *sabat a kui, me nga ve abendé na be fete bivine mimbé a beta yoé mie ve e mvuse *sabat. Me nga telé bevo'o ya bebo bisaé bam e mimbé, be kamane na mimbe'e mi bo te nyiin e môse *sabat.

²⁰ Ajô te bebo makit a bekuane mevale me biôme mese be nga lôt alu da nge mebaé e Yérusalém atan.

²¹ Me nga komekane be a jô be na: Amu jé mia lôt alu ôsu mfin? Nge mia beta taté avale mboone te, ma ye futi mia mo nyôl. Ataté éyoñe te, be nji fe beta zu éyoñe *sabat.

²² Me nga jô fe Belévit na: Be tune bebien a zu ba'ale mimbé asu mba'alan étyi ya *sabat. A Zambe wom, ô simesa'ane fe ma mfa'a ôte, a ba'ale ma aval ane mvame jôé é né.

²³ Eyoñe te fe me nga yene Beyude be nga lu'u bengone ya Asdôd, Amon a Môab.

²⁴ Efase jia ya bone bap be nga yeme kobô ve Asdônieñ, teke fe yeme kobô beyude; be nga yeme kobô ve *minkobô ya *meyoñ mefe.

²⁵ Nde me nga komekane be a yo'é be; me nga bôme bevok a té be bisil, me jô'ô be be kane ngana a jôé Zambe na: Mia ye bo te beta ve bobebinga benan e be bobefame bap, a mia mia ye bo te beta nyoñe bobebinga bab asu bobefame benan nge asu denane miabebien.

²⁶ Ye sa mfa'a te ñwô Solômon, njô bôte y'Israél, a nga bo *abé? Njô bôte mfe a nji bo ane nye, Zambe a nga telé nye njô bôte ya Israél ase; ve jame da na binga bikuu be nga dutu fe nye *abé été.

²⁷ Bi nji kômbô beta wô'ô na mia bo bijabô bi n'angôndô mfa'a Zambe wongan éyoñe mia lu'u bengone bikuu.

²⁸ Wua ya bone be Yôyada, mone Eliasib, évete betuni, a mbe nnômengona Sambala, mone ôrônite. Me nga titane nye a kôlô ma mis.

²⁹ O simesa'ane be, a Zambe wom, amu be nga ve ésaé é n'étyi mvin, nalé fe élate betuni a Belévit.

³⁰ Me nga tune be mfa'a ya mone bikul ase a beta telé a yemete jame betuni a Belévit be nga yiane bo, môt ase asu ésaé dé été,

³¹ nalé fe jam da fombô mimvean ya nja'a a biyoñ bi ne ntelan a *bembômô. O simesa'ane ma mbamba *nsimesan, a Zambe wom!