NEHEMIE 11 - Kalate Zambe Nnomo a Mfefe Mfefé Nkôñelan

Mimfefé mi bôt e Yérusalém a mevôm mevok

¹ Bivete y'ayoñ bi nga tabe e Yérusalém; *asimba e nga bobane na môte wua ya bôt awôm a zu tabe e Yérusalém, tison é n'étyi, wôna bôte bevo'o ébul be nga li'i e bitison bivok.

² Bôt be nga botane ba besese'e be nga tyik nye'ane wob bebiene na ba tabe e Yérusalém.

³ Bivete ya Yuda bi nga tebe e Yérusalém mbie bi: e bitisone ya Yuda, môt ase a nga tabe éfuse si jé, e tisone jé: Israél, betuni a Belévit, Benétinieñ a bone bebo bisaé be Solômon.

⁴ Bone be Yuda a bone be Bényamin b'éziñ be nga tabe e Yérusalém. Bone be Yuda: Ataya, mon Ôzias, mone Zakari, mon Amaria, mone Sefatia, mone Maalalil, bevo'o ya bone be Pérét,

⁵ a Maséya mone Baruk, mone Kôlôzé, mon Azaya, mon Adaya, mone Yôyarib, mone Zakari, mone Silôni,

⁶ bone be Pérét bese be nga tabe e Yérusalém be mbe biwôlô bi bôt mintete minyin mewôm mesaman a muam.

⁷ Bone be Bényamin mbe ba: Salu, mone Mesulam, mone Yôséd, mone Pedeya, mone Kôlaya, mone Maséya, mone Itiél, mon Ezayi,

⁸ a e mvuse jé, Gabayi a Salayi: bôte mintet ébul, mewôm mebaé a muam.

⁹ Yôél mone Zikri, a mbe évete jap; Yuda mone Senua, a mbe ba'a e tison été.

¹⁰ Betuni be mbe na: Yedaéya mone Yôyarib, Yakin,

¹¹ Seraya mone Ilkiya, mone Mesulam, mone Sadok, mone Mérayôt, mon Ayitub, nteb'ôsu ya *nda Zambe,

¹² a bobenyañe bap, be nga yeme a bisaé ya nda; bese bôte mintete muam mewôm mebaé a bebaé. Adaya mone Yérôam, mone Pelatia, mone Amsi, mone Zakari, mone Pasur, mone Malkiya,

¹³ a bobenyañe bé, bivete ya menda me bôt; bese bôte mintete mibaé mewôm menyin a bebaé; a Amaksayi mon Azaril, mon Azayi, mone Mesilemôt, mone Imer,

¹⁴ a bobenyañe bap, benya bôtô; bese bôte ntet mewôm mebaé a muam, Zabdiél mone Gedôlim a mbe évete jap.

¹⁵ Bevo'o ya Belévit: Semaéya mon Asub mon Azrikam, mon Akabia, mone Buni.

¹⁶ Kabétayi a Yôzabad, mbe be nga bili ésaé ja fombô mame ya atane *nda Zambe e Belévit be ne bivet été;

¹⁷ Matania mone Mika, mone Zabdi, mon Asaf, évet é nga bo'o é va'a tyiñe jia éyoñe meye'elan, a Bakbukia, môta baa ézezañe bobenyañ, a Abda mone Kamua, mone Galad, mone Yedutun.

¹⁸ Belévit bese be mbe Yérusalém be mbe mintete mibaé mewôme muam a benyin.

¹⁹ A beba'ale mimbé: Akub, Talmon a bobenyañe bap, beba'ale mimbé: bôte ntet mewôme zamgbwal a bebaé.

²⁰ Bôte bevo'o y'Israél: betuni, Belévit, be nga tabe e bitisone bise ya Yuda, môt ase éli'i jé été.

²¹ Benétinieñ be nga tabe Oféle yôp: si ya Gispa be mbe minlô ya Benétinieñ,

²² Evete Belévit, e Yérusalém, é mbe Uzi, mone Bani, mon Akabia, mone Matania, mone Mika ya bone b'Asaf, beyia bia be nga bili bisaé e *nda Zambe.

²³ Amu abendé njô bôt é mbe mfa'a wop, a ngume ntiñetan mfa'a beyia bia, asu *môs ôse.

²⁴ Peta ya mone Mésezabil, bevo'o ya bone be Zéra mone Yuda, a mbe nkee minlômane njô bôt asu mejô mese ma fombô ngum ayoñ.

²⁵ E minlam a e mefane map, bone be Yuda be nga tabe e Kiryat-Arba a mevôm me tii a nye, e Yekabsil a e minlame mié,

²⁶ e Yékua, e Môlada, e Bét-Palét;

²⁷ e Asar-Kual,

²⁸ e Tiklag, e Mekôna a mevôm me tii a nye,

²⁹ e En-Rimôn, e Tôréa, e Yarmut.

³⁰ E Zanôa, Adulam a minlame miap, Lakis a mefane mé, Azéka a mevôm me tii a nye. Be nga tabe ataté Birséba a kui mbi'ili Inom.

³¹ Bone be Bényamin be nga tabe ataté Géba, Mikmak, Aya, Bétél a mevôm me tii a nye,

³² Anatôt, Nob, Anania.

³³ Asor, Rama, Gutayim,

³⁴ Adib, Tebôyim, Nebalat

³⁵ Lod, Onô, mbi'ili bekôme biôm a mo.

³⁶ Bevo'o ya Belévit be nga too e Yuda be nga ke lat a Bényamin.