NEHEMIE 1 - Kalate Zambe Nnomo a Mfefe Mfefé Nkôñelan

Meye'elane me Néhémie

¹ Mejô me Néhémie mon Akalia. E ngone Kisle, mbu mewôme baa, valé me too e nlô tison ba loone Suz,

² Anani, wua ya bobejañ, a bôte befe b'éziñ valé, be nga so Yuda. Nde me nga sili be minsili ajô Beyude be nga fam nkeane minkôm, a ajô Yérusalém.

³ Ane be nga yalane me na: Ba be nga li'i te ke minkôm, be n'éfase si éte wé, be too e mbia nju'u été a ôson été: mfine *mekok wo bômane Yérusalém ô maneya ke wo bu'i, a mimbé y'été mi maneya di'iban a nduan.

⁴ Eyoñe me nga wô'ô mejô mete, me nga tabe si a yôn, a tab'éyôé abe melu. Me nga tyi bidi a ye'elan asu Zambe ya yôp,

⁵ a jô na: Héé, A Nti! Zambe ya yôp, Zambe a n'anen a éko woñ, wo wo ba'ale élat a liti *mvam e be ba ba nye'e wo a ba'ale mebendé môé!

⁶ Alo dôé e tame vô'ôlô, a mise môé me tame kuiban a yalane meye'elan me mbo ésaé wôé. Eyoñe ji ma ye'elan asu dôé *môs baa alu, asu bone b'Israél, bebo bisaé bôé, *a mem abé bone b'Israél, *abé dangan bi boya wo; ma a *nda bôte jam bi boya *abé.

⁷ Bi boya fo'o wo *abé, a bi nji ke ba'ale mebendé, memvinda a minjôan ô nga ve Môze, mbo ésaé wôé.

⁸ Simesa'ane mejô ô nga kobô Môze, mbo ésaé wôé na: Eyoñe mia ye bo bijabô, ma ye mialane mia e *meyoñ été.

⁹ Ve nge mia beta bulan e be ma, a ba'ale mebendé mam, a bo me, éyoñe te ñhe ma ye kôane mia, ja'ana mi nga wuaban e fé a kui e susu'a yôp, a ma ye bulane mia e vôme nyô me nga tobe na jôé dam da ye tabe.

¹⁰ Be ne bebo bisaé bôé a e bôte bôé ô nga kôté a beta ngule wôé, a wo wôé ô n'éwôlô.

¹¹ A Nti! Alo dôé e tame ñhe vô'ôlô meye'elane me mbo ésaé wôé, a meye'elane bebo bisaé bôé ba kômbô ko jôé dôé woñ! Kañese'e dene na, mam me mbo ésaé wôé me wulu *mvo'é, a bo'o na me yene *mvam e be môte nyô. Melu mete me mbe mbi *élaé e be njô bôt.