NAHUM 2 - Kalate Zambe Nnomo a Mfefe Mfefé Nkôñelan

¹ Mbe'e mbañete a mate mbil e minkôle yôp, a kate mbamba foé ya *mvo'é: Jeme mebô'ô môé a Yuda, bo'ok e mam ô nga tiñeti amu mbia môt ate a ye bo te beta lôte wo zañ, ngule jé é maneya ne meñ.

² Nyô a tyame minlam a zu wosane wo, ba'ale'e ôleme viôé! Mombô'ô e zene yôp! Yemete'e angeteñ dôé, bo'o ayok a ngule jôé ése!

³ Amu Nti a beta telé étôto'o Yakob, avale fe ane duma Israél, amu besa biôm be nga sa be a mane tyi'i mintyaé mindi'i miap.

Ninive a kuya

⁴ Ebene ya mimbene mié é ne nduban évele; Bezimbi be be'e mengômesan me ne nyôl angôô. Eyoñe bevagoñ ba bete nnoñ, bityé biab bia ngemban ane nduan, a mekoñ ma fô'ôsan.

⁵ Bevagoñ ba wulu minjoñ a ayo'o ese, a vasane mevôm mevôm. Bia yené v'ane belambe, bi wulu'u f'avô ane feleves.

⁶ Njô bôte ya Ninive a loone biwôlô bezimbi bié ve ba zu ba kolé abak éyoñ ba wulu, ba ke mbi aka'a ya tison a tebe mvus ében.

⁷ Mimbé ya ôsôé mi yombôya, a *nda njô bôt é kuya si!

⁸ Eve'ela Zambe minga é ntele nsoé, be vaaya je. E binga ba ba'ale je ba tat ane vôme bezum ba yôn; ôlune wob été, ba kute mo tôé.

⁹ Ninive, aso melu mvus, a nga funane fôndô mendim, éyoñe ji mese me nga mane kui atan! Teba'ane *mvo'é, yemane ngu! Ve teke môt a fombô mvus!

¹⁰ Wôla'ane argent, Wôla'ane or, bi ne bidi bi biôm bi ne tek'amané, avise ya mevale me biôm mese me n'édima!

¹¹ Biôme bise bi ne mfitan, nte'ane si, ntya'an, ngule *nlem ja man. meboñ ma nyi'ibi menyôl ma fô'ôban, a mesu ma bo éyôé.

Ninive a funane ngbwengbwem é bibaneya

¹² Abô'a bengbwengbwem e ne vé' Bitoñ bengbwengbwem bi nga bo'o bi ko'one bidi biabe valé éyoñe nnôme ngbwengbwem a mbe a kele nsôm, minlem mi bon mi nji tyebe yôb a môt éziñ.

¹³ Nnôme ngbwengbwem a mbe a lamesa'an mfa'a ya ve bone bé bidi, a mbe a wôék asu beyale bé; a mbe a jalé'é mefub mé a betit a bi, a mebô'a mé a mimbaane betit.

¹⁴ Me ne wo ngame yat. Nalé Nti a ne ngul ése a jô! Yaa, ma ye bo bevagoñe bôé ve ôtita ôtita. Nkpwaté mekôn wo ye mine bitoñe bengbwengbweme biôé. Ma ye telé ñwôlane biôme wôé e *si nyô, a ba ye bo te beta wô'ô tyiñe ya minlômane miôé.