NAHUM 1 - Kalate Zambe Nnomo a Mfefe Mfefé Nkôñelan

¹ Nkulane mejô asu Ninive. Kalate ñyenane mame Nahum môte ya Elkôs.

Zambe, ékowoñ a mbamba môt

² Nti a ne e Zambe a n'aban, a kun émien; Nti a kun émien, a ne njalan a ayaa; Nti a kun émien e be besiñe bé, teke jamé be.

³ Nti a ne te ji'a yaa, anene dé da so e ngule jé; a ne te jamé môt a bili mekua; Nti a lôt ôlende été a ôkôs été. Minkut mmie mi ne mbuluk ya mebo mé si.

⁴ A bamé mañ, me ve kôt, a vele asôé ese. Basañ a Karmel ba jo'olan. Sam ya Libañ fe ja jo'olan.

⁵ A bo minkôle na mi fô'ôsan; a bone minkôle na mi nyemé si ja bulekan asu dé émo a bôte bese be too été.

⁶ Za a ne jibi ayaa dé' A za a ne tebe ayôñ ayaa dé e ngame yat' ayaa dé da mialan ane nduan a bôé mekôk.

⁷ Nti a ne mbamba môt, a ne vôme ya sobô e môse ya njuk; a ba'ale ba ba ke sobô be nye, ja'an éyoñe ntyôa ô ne ngu wo lôt.

⁸ Ve a ye jiane vôme nyôna ne meñ a mendim ya ndôn, a a ye tôñesane besiñe bé akekui dibi été.

Mimbañete asu Yuda a Ninive

⁹ Mia bôndé fe'e ya bo Nti jé' Nye a jian ne meñ! Ôlun woo ye ke bo biyoñ bibaé.

¹⁰ To'o be maneya tiñetan ane minsinik, to'o be biliya a nyuane bilam, ba ye mane di'i bese ane minkôte bilok.

¹¹ Môt a nga bôndé fe'e ya bo Nti abé a nga so be wo, nyô a nga bili asimesane momo môt.

¹² Avale di nde Nti a jô na: Nge be ne bese, to'o be ne abui aya nge ngu, ba ye jañ, jôm teke li'i. Akôsa bo me nga liti wo njuk maa ye ke beta liti wo wô.

¹³ Eyoñe ji ma ye bu'u ébôñeté jé é vase be wo, a ma ye té mengata'a môé.

¹⁴ A Ninive, jame Nti a bendé ajô dôé nde di: Wo ye bo te beta bi mvoñe bôt é be'e jôé dôé; ma ye vaa *ngunemelan é ne nkpwelan a éve'ela é ne mboon a nyeman étyé e ndaa Zambe wôé; ma ye fa'a soñe jôé amu ô nji beta bo mfañe jôm.