Mm 8 - Kalate Zambe Nnomo a Mfefe Mfefé Nkôñelan

Ekpwe'ele ya atata'a

¹ Saül a mbe ngame ya bôt be nga kañese awu Etienne. Melu mete ékpwe'ele é nga ngetane keké ya Yérusalém, angôndô ékpwe'ele. O vaa ve minlôman, bôte bese be nga tup a mialane mefôla ya Yudé a Samari.

² E bôte ba buni, be nga jam Etienne abeñ.

³ Saül k'a kele a ndaman keké. A nga ke a nyiine menda menda a bi befam a binga, a fiti be *nda mimbôk.

⁴ Wôna bôt be nga tup a mialane minlame minlam. Be nga ke li a li, a kate Mbamba Foé ya ajô Zambe.

Filipe, nkatefoé ya Samari; Simon mboo Majik

⁵ Avale te Filipe, nye, a nga ke tisone Samari. A nga kañete Krist.

⁶ Bizu'u bi bôt, tyiñe jia, be nga buni mejô me Filipe, amu be nga wô'ô bitua bi mam a nga bo, a yene fe bie a mis.

⁷ Nalé fe na, mimbia minsisim abui mi nga kobô a beta metyiñ, a miñyeyem, mimbôbôk, be nga bo *mvo'é.

⁸ Beta mevak me nga jaé tison éte.

⁹ Môt éziñ a mbe tisone valé a too jôé na Simon. A mbe a bo'o majik. Bôte ya Samari be nga kame nye. A mbe a kômbô'ô liti e mise me bôte na, a mbe beta môt ya semé.

¹⁰ A bôte bese, ataté ba be ne tyôtyoé, a kui ba be ne menen, be nga ke be nye. A be nga jô na: Ngule Zambe é ne be môte nyô, e ngul é ne fo'o medañe.

¹¹ A nge be nga tôñe nye nalé, fo'o v'amu aso ayap, a nga bo na bôt be kame nye a zene ya mengañe mé.

¹² Ve éyoñe be nga buni Mbamba Foé, Filipe a nga kañete be ajô éjôé Zambe a éjôé Yésus Krist, be nga duuban, befam a binga.

¹³ Simon émien a nga su'ulan bo mbuni. A nga duubane fe a kabetane Filipe. Eyoñ a nga yene bitua bi mam bi nga boban, émien a nga bo fe'e ne vema.

¹⁴ Eyoñe minlôman mi nga to Yérusalém, mi nga wô'ô na, mejô me Zambe me yeneya éto e minleme mi bôte bese ya Samari, be nga lôme Pierre ba Yôanes.

¹⁵ Eyoñe be suaneya Samari, be nga bo meye'elane na, bôte ya Samari be nyoñe Mfufube Nsisim.

¹⁶ Amu éyoñe te Mfufube Nsisim a ngenane te tabe e be môte wua ya be be. Be nga nyoñe ve nduan a jôé Yésus Krist, Nti.

¹⁷ Ajô te Pierre baa Yôanes be nga beté be mo, a bôte ya Samari be nga nyoñe Mfufube Nsisim.

¹⁸ Ve éyoñe Simon a nga yene na Mfufube Nsisim a nga vebane be bôt a zene ya *mbetane mo, a nga ka'a minlômane moné a jô be na:

¹⁹ Va'ane fe ma ngule nyô, nde bôte ma fe ma ye beté mo, ba ye nyoñe Mfufube Nsisim.

²⁰ Ane Pierre a nga yaa nye, a jô na! Moné wôé a womien bi jañek, amu wo te buni na, ba kuse mveane zesé Zambe a moné.

²¹ O nji bi ngap, nge jôm éziñe ya mame ma bobane ma, amu nleme wôé, ô nji bo *zôsôô e mise me Zambe.

²² Kôñela'an mfa'a ya mbia nleme wôé, a ye'elane Nti, ndô'ôtô na, mbia ôsimesan a nga kui e be wo, a ye jamban.

²³ Ma yene na, ôlune ziñ a mengata'a ya *abé bi bili wo.

²⁴ Ane Simon a nga yalane na: Miabebien ye'elane Nti ajô dam, ane jame da ya mame mia te kobô ma, da ye bo te kui e be ma.

²⁵ Pierre baa Yôanes, éyoñe be maneya bo bengaa, ya afôla te, a kate *mbamba Foé Nti, be nga bulane Yérusalém. Be nga kate Mbamba Foé minlam abui ya Samari.

Filipe a mia'a ya Etiôpi

²⁶ Engele Nti a nga jô Filipe na: Wo ye ke mfa'a jôbe da tôô, e zene ja ke mfa'a ya Yérusalém a kui Gaza, e *nkôte si.

²⁷ Ane Filipe a nga ke, teke yange, éyoñe mia'a ya Etiôpi, beta mbo ésaé Kañdase, njôô bôta minga, a ngovina ôsu ya akume dé nye a mbe Yérusalém,

²⁸ a nga bulane jale dé a too vagoñe wé a lañe *nkulu mejô Ezayi

²⁹ Nsisim a nga jô Filipe na: Kele ôsu a koone éjakas.

³⁰ Ane Filip a nga ke mbi a wô'ô ane *miak ô nga lañe kalate *nkulu mejô Ezayi a jô nye na: Ye wo tu'a fo'o wô'ô mejô wo lañ'

³¹ Ane *miak ô nga yalan a jô nye na: Me ne ngule ya tu'a wô'ô aya, teke môt a faé ma éfufup? Ane a nga loone Filipe, a bet, a ke tabe fefele jé.

³² Mana me ne mejô ya kalate Zambe a nga bo a lañek: aval ane ngal ntômba ba kee nye e vôm a ye tyi'iban, a ane mone ntômba a ne mvuk e mo ya nyô a tyeñe nye mimvot, avale te a nji kui anyu dé.

³³ Ôsame wé été ajô dé e nga tyi'iban ékotekot, Za ya miaé wé a ye kañete ajô dé. Amu be nga vaa ényiñe jé *si nyô.

³⁴ Ane *miak ô nga jô Filipe na: Ma ye'elane wo, kate ma, za a ne mejô *nkulu mejô a kobô ma, ye émien, ye môte mfe'

³⁵ Ane Filipe a nga taté nkobô a mejô mete, me so'o vôm a nga bo a lañek, a kate nye Mbamba Foé ajô Yésus.

³⁶ E dulu dap e zañ, be nga yene mendim. Ane *miak ô nga jô Filipe na: Mendime ma, jé ja kamane ma na me duuban'

³⁷ Filipe nye na: Nge wo buni a nleme wôé ôse, nalé a ne boban. Miak ô nga yalane na: Ma buni na Yésus Krist a ne mone Zambe.

³⁸ Nde a bendé na be telé ékalik. Ane bebaa be nga sise mendim été. Ane Filipe a nga du nye.

³⁹ Eyoñ be nga kôlô mendim été, ane Nsisime Nti ô nga nyoñe Filipe a kee nye, *miak te fe yene nye. Ve a nga ke zene jé a mevak.

⁴⁰ Filipe a nga teme na a nto Azôt. A nga ke ôsu a kate Mbamba Foé e bitisone bise a nga lôt, akekui éyoñ a nga suane Sézaré.