Mm 5 - Kalate Zambe Nnomo a Mfefe Mfefé Nkôñelan

Awu Ananias baa nga Safira

¹ Môt, a too jôé na Ananias, a nga kuane biôme bié, baa minga wé *tyiñ a to jôé na Safira.

² A fe'e medu'an, baa minga wé be nga solé éfase tañ a zuu ji évok, a bôôé je e mebo minlôman.

³ Ane Pierre a nga jô nye na: A Ananias, amu jé Satan a yene éto e nleme wôé? Wo te laa Mfufube Nsisim minsos, a solé éfase tañe moné ya si.

⁴ Ye ô mbe te ngule ya jô'é kuane je, nge na, ô kuan, womien ô belane moné ate ase? Fe'e nyô é nga zu wo *nlem aya? O nji laa bôt minsos, ve Zambe.

⁵ Eyoñ Ananias a nga wô'ô mejô mete, a nga ku si, ve wu. Beta woñ a nga bi bôte bese be nga wô'ô, ajô te.

⁶ Bendômane be nga zu kôme mbim a be'e, a ke wô soñ.

⁷ Mvus éte, bebé *mewolo mela, minga wé fe a nga zu nyiin, nye teke yem jam e nga bo.

⁸ Pierre a nga kobô nye, a jô nye na: Kate ma, ye tañe nyô nje mi nga kuane si? A nga yalane na yaa, abimete le.

⁹ Ane Pierre a nga jô nye na: Mi nga yeme kui *tyiñ aya na, mi soñ ayaa Mfufube Nsisime Nti? O yeneya bibô'a mebo ya bôte ba te ke jame nyo nnôm bi ne e *mbé yôp; avale te fe ba ye kee wo.

¹⁰ Eté été, a nga ku si mebo me Pierre, ve wu. Eyoñ bendômane be nga bulan, be nga koone nye a wuya, be nga ke fe jame nye soñ e fefele nnôm.

¹¹ Ane angôndô, woñ a nga bi keké ése a ba bese be nga wô'ô foé étua jame ji.

Abui bitua bi mam a nkô'ôlane bebuni

¹² Abui mendem a bitua bi mam bi nga bo ézezañe bôt a wo minlôman. Be nga tele *mbé si Solômon bese tyiñe jia.

¹³ Ve teke môt a nga jibi latane be. Ja'a nalé, bôt be nga se'e be.

¹⁴ Bôt abui, befam a binga, be nga ke ngame jap, a zene ya buni Nti.

¹⁵ Be nga soo minkôkon e minjoñe minjoñ. Be nga tooé mivok binoñ, mi mivok alañ, be sôñ na, éyoñ Pierre a lôt, ja'ane ve nsisiñe wé, ô nambe be.

¹⁶ Jama bôt mbok a nga so mefôla ya Yérusalém, be be'e minkôkon a ba mimbia minsisim mi nga ndumekan. A bese be nga yet.

Minlôman mia bili a su'ulane suuban

¹⁷ Amu mame ma, *ntuni nnen a nsamba wé ôse, e ne na, ngame Besadusieñ, ayaa e nga jaé be minlem ne lut.

¹⁸ Be nga bo na, be bi minlôman a futi mie mimbôk, e mise me bôte bese.

¹⁹ Nde éngele Nti a nga zu yoé mimbé ya *nda mimbôk a alu ese, a kuli be atan, a jô be na:

²⁰ Kelane tebane *nda Zambe, e valé, katane bôte mejô ya ényiñ.

²¹ Ane be nga wô'ô nye, tyé kpwaa, ane be nga ke *nda Zambe été a ye'ele bôt. Ntuni nnen a nga zu, émien, a nsamba wé ô nga bômane nye. Be nga sulane Sanédreñ, ékôane mvô'ô Israél, a lôme fe be ke loone minlômane *nda mimbôk.

²² Ve bebo bisaé, e ke kui *nda mimbôk été, teke koé be. Eyoñ be nga bulan, be nga kate be foé avale di:

²³ bia te koé mimbé ya *nda mimbôk mfetane *mvo'é mvo'é. Beba'ale be tele mimbé yôp. V'éyoñe bia te diine mimbé, bi nji yene môt e *nda mimbôk été.

²⁴ Ve nné ane mefoé ma me nga kui be melo, njôô ya *nda Zambe a betuni be nga bo ne botok a ajô minlôman, a sili na jé é nga lôt'

²⁵ Ane môt éziñ a nga zu a kate be na: Tame yene bôt mi nga futi *nda mimbôk be nto *nda Zambe a ye'ele bôt.

²⁶ Ane njôô ya *nda Zambe a nga tek, baa be bebo bisaé, a ke nyoñe minlômane tee ntañete. Amu a nga mate na bôt be za lume be *mekok.

²⁷ A nga soo be a telé be ôsu Sanédreñ. Ntuni nnen a nga sili be minsili a jô na:

²⁸ Bi nga telé mia atiñe na, mi bo te ye'ele bôt jôé te. V'éyoñe ji, mi jaléya Yérusalém ne lut a nye'elane wônan; ye mia yi na, metyi ya môt nyô me tabe bia minlô yôp'

²⁹ Ane Pierre a minlôman be nga yalan a jô na: Bia yiane dañe wô'ô Zambe a lôte bôt.

³⁰ Zambe ya b'ésaa bangan a nga wômôlô Yésus, nyô mi nga wôé ntyelan élé.

³¹ Nye ate Zambe a nga bete yôp a mbo nnôme wé na a bo Ntômba wo Nyii bôt; ane a ye ve mvô'ô Israél nkôñelan a njamane mam *abé.

³² Bi ne bengaa ya mame me nga bobane mete. Bia, a Mfufube Nsisim, ñwô Zambe a nga ve ba ba bo nye mewôk.

³³ Njalan a ôlun, be nga tyi'i na ba yiane wôé be, amu nkobô wu.

³⁴ Ve môte wua a nga tebe tetele e Sanédreñ été a to jôé na Gamaliél, mone Farizieñ, bôt be nga semé nye. A nga jô na; be tame kuli mimbô'ô atan nté éziñ.

³⁵ Mvus éte nye na: Mvô'ô Israél, taba'ane ntyel a jam mia kômbô bo di ajô bôte ba.

³⁶ Melu me ndôme lôte va, môt a nga so, jôé na Tedas; môt ate a nga kômbô liti na a ne jôm éziñ; a dutu fe bôt bebé mintete minyin. Emien a nga wôéban beyé'é bé fe be nga tyamelan. Ajô dé e bo na, ve momo.

³⁷ Mfe, be nga beta yen, Yudas ya Galilé, melu ya élañe bôt. A nga so fo'o, a dutu bôt be tôñe nye. Nye fe ve wu a bôte bese be nga tôñe nye, ve tyamelan.

³⁸ Nde ma jô mia na, te tamane beta kobô ajô bôte ba. Jôka'ane be be ke. Nge foé jap, nge na asu ésaé dabe di da téé be bôt, ebien da ye bo momo.

³⁹ Nge da téé be Zambe, mi se ngule ya bo de momo. Taba'ane ntyele ya wosane Zambe. Ane be nga yebe *tyiñ jé,

⁴⁰ a beta loone minlôman, a bo na, be bibi be minkasa. Be taté fe mane bendé be na, be bo te beta kañete jôé Yésus. Ane be nga suu be.

⁴¹ Ane minlôman mi nga kôlô ézezañe Sanédreñ, njalan a mevak, amu be nga jibi ékpwe'ele amu jôé Yésus.

⁴² Môs ôse, ataté *nda Zambe a kui bitaba'a, be nji jô'é kañete a ye'ele bôt Mbamba Foé Mesie.