Mm 28 - Kalate Zambe Nnomo a Mfefe Mfefé Nkôñelan

Paul a kui ékôte mañe ya Malte

¹ Eyoñe bia kôlô angôndô été, éyoñe te bia zu wô'ô na, ékôte mañe bi né é ne jôé na, Malte.

² Bemie nlame ya valé be nga liti bia avale *mvam e ne njemban. Be nga kôbane bia beta mbe'e nduan, amu mveñ é nga bo abui, a avep e nga to abui.

³ Paul a nga nyoñe beta éfus ébole nja'a, a wua je nduan. Eyoñ é nga kalane nduan, ane akpwe e nga vam été a fa'abe Paul wo.

⁴ Eyoñe bemie nlam be nga yenee akpwe e tii Paul wo, be nga kobô beebe na: Môte nyô a ne ñwôé bôt. A fameya wu mañ. Ve *zôsôô zambe a nji kañese na a nyiñ.

⁵ Ane Paul a nga samese akpwe, e kpwelé nduan été, teke bo nye mbia jam.

⁶ Ve bôte be nga buni na, wo wo ye bim nge na a ye ku si a wu. Eyoñe be nga jaé yange, be nga yene na teke jôm ja bo nye. Ane be nga kôñelane minlem a jô na: Môte nyô a ne Zambe éziñ.

⁷ Mbôma'ane ya afôla te a mbe mesi me ntômba môt ya ékôte mañ éte a mbe jôé na Pubius. A nga nyoñe bia abeñ e jale dé tañe melu mela.

⁸ Esaa wé a mbe nkôkon, ayôñ e too nye nyôl abui, a tu'i fe. Ane Paul a nga ke nlô énoñe wé a saé nye a meye'elan, a *mbetane mo.

⁹ Ane minkôkon abui ya ékôte mañe te, mi nga zu fe be nye a saéban.

¹⁰ Be nga wumulu bia abeñe valé a abui mame ya *mvam. Eyoñe bi nga téé dulu ya mañe mañ yôp, be nga ve bia mimvolan.

Dulu ya ke Rôme

¹¹ Bi nga tabe ékôte mañe ya Malte ngon éla. Ane bi nga bete sitima a mbe a yange'e memané me ôyôn ékôte mañe valé. A mbe sitima ya Alékzandri, a be'e minkôñelane mesu m'azezambe bewulu sitima ane nlinga

¹² Bi nga ke tebe Sirakuze a bômbô valé tañe melu mela.

¹³ Nkôlaneya valé, bi nga wulu éwome mañ a kui Riggiô. E valé, évuñulu ya nké é nge vuñ, ane bi nga kui Puzoles mvuse melu mebaé.

¹⁴ Vôm ate bi nga yene bobejañ, mbe bete be nga bu'u bia na bi tabe e be be sondô ébaé. Avale te nde bi nga wulu dulu ya ke Rôme.

¹⁵ Ataté tison éte, e bobejañ be nga wô'ôtane bia, be nga zu tôbane bia a kui Forum ya Appius a e Trôas-Tavene. Eyoñe Paul a nga yene be, a nga ve Zambe akéva. Ane a nga beta bi ndi *nlem.

Paul a suane Rôm

¹⁶ Eyoñe bi nga kui Rôme, Paul a nga nyoñe nkañesane ya tabe *nda jé, mone bezimbi wua a ba'ale'e nye.

¹⁷ E mvuse môse milaa, a nga loone benya bôtô ya Beyude be mbe Rôme valé. Eyoñe be nga sulan, a nga kate be na: A bobejañ, e ma me nji bo jam da wosan ayoñe dangan, nge metiñe beésa bangan, me ne mbôk ataté éyoñe be nga ve ma e mo Berômeñ e Yérusalém.

¹⁸ Eyoñe be maneya fas ajô, be nga kômbô suu ma amu teke jam é nga yiane bo na me wu.

¹⁹ Ntebane ngame yat Beyude be nga tebe ma, ô nga tindi me na me sili nkulan ajô e be njô bôte nnen, ve nalé teke bo na me kate ayoñe dam.

²⁰ Amu ajô te me nga jeñe na me yene mia a laane mia. Eyoñ wo tu'a fase ajô di, ma butane ve ajô ndi nleme ya ayoñ Israél, bengôkop ane me tii na.

²¹ Ane be nga yalan a jô na: Mfa'a wongan, bi nji nyoñe kalate 'éziñe ya ajô dôé a so'o Yudé. To'o mojañ éziñe ya a nga so, a nji kate bia mbia foé éziñe mfa'a wôé.

²² Nde bia sili wo na, womien tame kañete bia ôsimesane wôé. Amu jam bia yem, e ne ve na, ngame mbunane jôé é bili abui mewosane vôm ase.

²³ Ane be nga telé ngum éyoñe ya beta tôban. Be nga zu koone nye *nda jé, beta nsamba bôt. Nkobô wé été, a nga kate foé ya éjôé Zambe môse ba alu. A nga jeñe *zen ése ya kôñelane bôte minlem. A nga kobô be ajô Yésus ataté metiñe me Môze a bekulu mejô.

²⁴ Bevok be nga buni, bevo'o ke be nga bene buni.

²⁵ Eyoñe be nga kandan beebe, be nji kui tyiñe jia. Paul a nga beté v'éfia jia na: Nkobô Mfufube Nsisim a nga kobô b'ésoo benan anyu be *nkulu mejô Ezayi ô ne bebela na:

²⁶ Kele yen ayoñe bôte di a jô be na, ñwô'ane mia ye wôk, ve mia ye bo te bi fek, ñyenane mia ye yen, ve mia ye bo te yemelan.

²⁷ Amu nleme ya ayoñe bôte di ô maneya bo ayet. Be maneya bo ndo'o melo. Be maneya dibe mise map be bo te yen, a melo map be bo te wôk. Be ntoo te fe'e minlem ane be ne kôñelane be Zambe. Ye ma ye saé be'

²⁸ Yemane ñhe na; ñyemane Zambe wu ô nga lômbane be meyoñe bikuu, amu ba ye vô'ôlô.

²⁹ A ngenan a kele ôsu a kobô be nalé nde Beyude be nga ke ba sañetan ayôñ ézezañe jap.

³⁰ Nalé Paul a nga nyiñe valé mindu mimbu mibaé teke mvolan wo so nye atan. A nga nyoñe bôte bese be nga zu be nye,

³¹ yôta'ane Mbamba Foé ya éjôé Zambe, a ye'ele be ajô Nti Yésus Krist a ndi *nlem ése, teke éndeñela'a éziñ.