Mm 27 - Kalate Zambe Nnomo a Mfefe Mfefé Nkôñelan

Dulu ya Italie

¹ Eyoñ be nga tyi'i na bia ke Italie, ane be nga ve Paul a mimbô'ô mivo'o mo me évete bezimbi ntete wua. A mbe jôé na, Yulius ya nsamba Augustus.

² Ane bi nga bete sitima Adramite, a ke ékôte mañe ya Azi, a wulu mañe mañ. Môte ya Masédôan, afôla ya Tésalônik a too jôé na, Aristark, a nga zu nsamba wongan.

³ Tyé kpwaa, bi nga tebe Sidoñ, amu Yulius a nga semé Paul. A nga jô'é nye a ke yene bemvôé bé, a bi ma'a ya nyoñebane be be.

⁴ Akôlô ya valé, bi nga ke dulu ôsu e mañe mañ, a lôte Sipre, amu évuñulu é nga ndeñele bia.

⁵ Ane bi nga dañe mañe me nga womôlô Silisi a Pamfilie, akekui Mire, afôla ya Lisié.

⁶ Valé, évete bezimbi ntete wua é nga yene sitima ya Alékzandri a kele Italie. A nga bo na bi bet été.

⁷ Dulu dangan e nga bo njuk abe melu, te ngule ya wulu avô. E nga bo bia ayaé na, bi kui knide amu évuñulu. Nde bi nga viane womôlô kréte, mfa'a ya Salmoné.

⁸ Eyoñ bi lôte kréte, ane bi nga kui vôme ba loone na: Abeñe kindik, bebé a tison é ne jôé na Lasé.

⁹ Eyoñ ôbe ayap ô nga lôt, e nga to angôndô ya wulu mañe mañ, e too ke na, éyoñe ya bômbô zaé asu nkañan é maneya lôt. Paul a nga kômbô liti be ôsimesane wé avale di na:

¹⁰ A bemvôé bam, ma tu'a buni na, dulu ya mañe mañ éyoñe ji, da ye soo bia bidim a beta njañelan, sa ve akum étam a sitima, ve ja'ane binyiñe bi bôt.

¹¹ Ve évete bezimbi ntete wua é nga too ñwulu sitima baa éjiane Masa ndi a dañe nkobô Paul.

¹² Evete bezimbi ntete wua é nga dañe buni ôsimesane ntebe ôsu, a e wu mie sitima, a lôte wu Paul. Ve amu melu ya ôyôn me mbe *abé kindik éte, beta ngabe ya bôt a mbe tyiñe na, be kee dulu ôsu. Be ve'e fe'e na, be ne kui Fénix, kindi'i ya Kréte é mbe é yoo, asu nkean éwome ya mfa'a jôp da tôô, a ji ya mfa'a jôp da dime na, be ke yange ôyôn ô man.

Okôs wo vun be mañe yôp

¹³ Mone mfep ya alumbu nké a nga bo. Ane be nga va'a na, e fe'e wop a ne tôéban. Be nga ke tetele éwome mañe ya Kréte.

¹⁴ Atemeteme na, mbia ôkôs a so'o ékôte mañ, ba loone ôkôs ôte na, érakiloñ, a nga zu jimbi be.

¹⁵ Ane ô nga kee sitima, nye teke fe ngule ya bet. A teke ngule ya beta liti *zen, ane évuñulu é nga wo'otô bia.

¹⁶ E tee mon ékôte mañ ba loone na kôda a volô'ô bia, nde bi nga bi éyoñe ya bôndé fek, a ngule ya wulu sitima.

¹⁷ Ane beliti *zen ya sitima be nga ke selé nye kindik a tiñeti nye minkol mbôma'ane. Nalé, amu be nga ko woñ ya ke jimbi mebôme me nselek ya biwome bi kindik ya Libie. Ane be nga telé, a jô'é na évuñulu nje é wo'otô bia.

¹⁸ Tyé kpwaa, amu mbia ôkôs a nga ke ôsu a fô'ô bia, ane be nga jibi wua akum ôsôé.

¹⁹ Wôna, môse lale, a mo map bebien, be nga ke ôsu a kandé biôme ya sitima a wua bie mañ été.

²⁰ Bi nga tabe abui melu, te yene jôp nge ateté. Okôs ô nga too angôndô, aval ô ngenane te tame yen, avale ya na, bi nga jañele ndi minlem ya nyiñ.

²¹ Bôte be nga tabe ayap, teke di jôm. Ane Paul a nga tebe tetele a jô na: A bemvôé bam, nge mi nga ye wô'ô melebe mame na, bi bo te tame kôlô Kréte, ve bi nji tôbane avale nju'u di, a jañele abim akume di.

²² Eyoñe ji, ma ye'elane mia na, mi bo ngule minlem. Amu teke môt éziñ ya be mia a ye jañele ényiñe jé, sitima étam nye bia ye jañele.

²³ Alu ebiene di, éngele Zambe wom, nyô ma bo ésaé, a te yené e be ma,

²⁴ a jô me na: A Paul te ko woñ, amu wo yiane kobô asu njô bôte nnen. A Zambe a ye nyii bôt bese mia be be mi ne nsamba.

²⁵ Ajô te bo'one ngule minlem, a bemvôé bam, amu da ye bobane nalé.

²⁶ Ve da, bia ye fo'o ke jimbi ékôte mañ éziñ.

²⁷ Alu awômô a nyini, nde évuñulu é nga kee bia e mañe ba loone Adriatik. Wôna, e zañe alu, beliti *zen be sitima be nga taté wô'ôtane si.

²⁸ Eyoñe be nga wua ôsoño'o, be nga yene nté édok ô nto méta awôm a étan.

²⁹ A woñe ya na, sitima a za jimbi *mekok, be nga wua bitelé bi nyiine mvuse sitima a febe tyé a ôkaé.

³⁰ Beliti zene ya sitima be nga jeñe zene ya tup. Ane be nga suu bial wo litane bôte ôsôé, a be nga vañe jô bôte na, be futi bitelé ôsu ya sitima.

³¹ Ve Paul a nga jô mba'ale sitima ya Rôme a bezimbi na: Nge bôte ba be kôlô sitima été, be se ngule ya nyiñ.

³² Ane bezimbi be nga tyi'i minkole ya bial a jô'é wô ô ke.

³³ Nté be nga bo be yange'e melende me tyé, Paul a nga lebe bôte na, be di bidi a jô be na: Den a ne *môs awômô a nyini, mi tele angôndô été, teke di jôm.

³⁴ Ma lebe mia na mi di jôm éziñ, amu e ne ajô ényiñ mfa'a wônan. Ma beta ba'alane mia na, teke môt a ye jañele koñ ésile jé.

³⁵ Eyoñ a nga mane kobô nalé, ane a nga nyoñe fembé a ve akéva, a be'e je, a taté di.

³⁶ Be bese fe be nyoñe ngu, a di éyoñe jap.

³⁷ Bi nga to bese bôte mintete mibaé a mewôm mesaman e sitima été.

³⁸ Eyoñe bi nga mane di a jaé, be nga jeñe zene ya ve sitima éveves, a wua minkuta bidi mivok e mañ été.

³⁹ Eyoñe tyé é nga lendé, beliti zene ya sitima be nji beta yemelane vôm be né. Ve be nga yen mendim me mañ m'éziñ a kindik. Be nga bili nkômban, nge e mbe ngule ya bo na, be telé sitima vôm ate.

⁴⁰ Ve éyoñe be nga bo te yene zene ya tebe, ane be nga tiine bitelé ya sitima a li'i bie mañ. Be nga kuli fe minkole mia volô mfulane sitima mfa'a ya mvus. Ane be nga tindi éyé ja be'e évuñulu ôsu ya sitima, avale ya na, évuñulu nje é tindi be a kee be kindik.

⁴¹ Ve sitima a nga viane ke jimbi abôme nselek a bôlé mañe yôp, te ngule ya ke ôsu, amu ngule ya mintyôa mi mañ.

⁴² Bezimbi, éyoñ be nga yene na mimbôk mivok mia zu mane tup, e ba ba yeme jok, be nga bôndé fe'e ya wôé be.

⁴³ Ane évete bezimbi ntete wua é nga dañe kômbô nyii Paul. A nga kame be, be bo te bo nalé. A nga ve ngule na, e ba ba yeme jok, be jok, a ke kindik.

⁴⁴ E ba bevok be ke ba tyebe e mimbôlane mi biôme ya sitima. Ane bese be nga mane nyiñ.