Mm 26 - Kalate Zambe Nnomo a Mfefe Mfefé Nkôñelan

Paul a kobô asu Agripa

¹ Ane Agripa a nga jô Paul na: Ô bili nkañesane ya kobô ajô dôé! Wôna Paul a nga bete wo a kate mame ba bo'olô nye a jô na:

² Ma yene mvaé a njô bôt Agripa na, môse wu, me kate mame mese Beyude ba bo'olô ma asu dôé.

³ Amu womien wo yem metume map a mejô map. Ajô te ma ye'elane wo na ô vô'ôlô ma a mbamba *nlem.

⁴ Enyiñe jam me nga nyiñ aso mongô, ézezañ ayoñe dam e Yérusalém, Beyude bese ba yeme je.

⁵ Ba yem aso ayap, bebien be ne bengaa nge ba kômbô, na me nga tôñ metiñe ya mbunan wongan ne titi, aval ane mone Befarizieñ.

⁶ E môse wu, nge me tele *nda mejô, e ne ve amu ndi nleme ya ngaka'a Zambe a nga ka'a beésa bangan.

⁷ Ndi minlem éte nje meyoñe mangan awôm a mebaé ma yange éyoñ ése, ba bo mbane ya bo bisulan alu baa *môs, te jô'é. Ajô ndi nleme éte, a njô bôt, e nde Beyude ba bo'olô ma.

⁸ Amu jé, e zañe jenan, be nji buni na Zambe a ne wômôlô miñwuan'

⁹ Mfa'a wom, me nga tyi'i fo'o na, ma yiane wosane jôé Yésus ya Nazarét mezene mese.

¹⁰ A nalé fe nye me nga bo Yérusalém, mamien me nga futi abui mimfufup mi bôte mimbôk, a ngule betuni benen be nga ve ma. Eyoñ be nga wôé be, me nga nyoñe mese'esa'a.

¹¹ Me nga ke meba me Zambe mese ya Beyude. Me nga ke ôsu a bo mame mevale meval. Me nga tindi be, be biasé *zen éte. A me nga dañe bo *abé éyoñ me nga dañe minné, a ke éza bitison.

¹² Nalé ate me nga ke *môs éziñe Damas, a ngule njôane ya betuni benen, nlômane ya ke bo ngumba ésaé.

¹³ Me too *zen, a njô bôt, bebé zañe *môs, me nga yen éfufup é so'o yôp, a dañe ji jôp. A é nga bômane ma, a bôte bia be be bi mbe nsamba.

¹⁴ Bia be be bese bi nga ku si. Ane me nga wô'ô *tyiñ é kobô'ô ma nkobô Beyude na: A Saül a Saül, wo kpwe'ele ma a jé? E ne wo angôndô na, wo tyañete abo nsoñ.

¹⁵ Ane me nga yalan a jô na: O ne za a Nti? Nti a nga yalan a jô na: Me ne Yésus, ma wo kpwe'ele!

¹⁶ Ve da, tebe'e tetele a mebo môé! Amu jame di nde ma yené de e be wo. Me nga tobe wo, ô bo mbo ésaé, a ngaa ya ñyenane wo te yene ma, a biyoñe bife, wo ye ke ôsu a yen.

¹⁷ Ataté éyoñe ji, ma nyii wo mo Beyude, a mo ya meyoñe bikuu, mme mete ma lôme wo e be be na,

¹⁸ ô ke kui be mis, a vaa be dibi été, be zu éfufup; be kôlô éjôé *satan a nyiine éjôé Zambe, ane be ne nyoñe njamane ya mam *abé map, a bo benyoñe ngap, baa be mintobane mi bôt, amu mbunane ya buni ma.

¹⁹ Ataté éyoñe te a njô bôt Agripa, me nji biasé ñyenane ya yôp ôte.

²⁰ Ve na, ataté e be bôte ya Damas ôsusua, a ba ya Yérusalém, si ése ya Yudé, a e be meyoñe bikuu, me nga kate be na, ba yiane kôñelane minlem a bulane be Zambe wop. A na, be nyiñ aval ane ba be maneya kôñelane minlem.

²¹ Amu ajô te Beyude be nga kômbô wôé ma, me to *nda Zambe été.

²² Amu ngule ya mba'alane Zambe, ma ke ôsu a kañete ba be ne anen a ba be ne tyôtyoé. Bekulu mejô a Môze, be nga taté kobô ajô mame ma ye boban. A me nji beté jam afe yôp. E ne na:

²³ Krist a nga jibi mintaé. A ne nyô ya ôsu a nga wômô miñwuan. A yiane kate Beyude a bikul ajô éfufup.

²⁴ Paul a ngenane a kobô'ô, ane Festus a nga tyi'i nye nkobô a bete tyiñe yôp a jô na: O ne akut, a Paul, abui ñyemane dôé e kuiya wo vôme ya bo akut.

²⁵ Paul a nga beta nyoñe nkobô a jô na: Me nji bo akut, a mbaa njô bôt Festus. Ma bo na bôte be wô'ô benya mejôô a mam ma yian.

²⁶ E Njô bôte ma kobô ôsu vié a ngul ése, me to ndi, na a yeme mame mana mese. Teke jame da da, da jobetane nye. Me ne ngule ya simesane nalé. Amu mam mete me nji bobane e vôm a ne asoé.

²⁷ Me to ndi na, wo buni mame bekulu mejô be nga kobô, a njô bôt Agripa, ye sa nalé'

²⁸ Ane njô bôt Agripa a nga jô Paul na: Da li'i wo tyôtyoé e nkobô wôé été na, ô kôñelane ma *nlem me buni!

²⁹ Ane Paul a nga yalan a jô na: Ja'ane ana'ana, ja'ane ke ôyap ôsu, jame ma ye'elane Zambe e ne na, sa ve wo étam, ve na, bôte bese mia wô'ô nkobô wom, mi buni, a bo ane ma, ô vaa jôm ve bengôkop.

³⁰ Ane Agripa a nga kôlô si baa ngovina Bérénis a bôte ba be be be nga too.

³¹ Eyoñe be nga kôlô, be nga bo émo'o a kui tyiñe na: Môte nyô a nji bo jam a yiane wu de, nge timbi ngôkop.

³² Agripa a nga ve nye mo me Festus a jô na: Be nga yiane ji'a suu môte nyô, nge a nga ye bo te kee ajô dé e be njôô nnen.