Mm 25 - Kalate Zambe Nnomo a Mfefe Mfefé Nkôñelan

Paul a yemete na be ke ajô dé e be njôô nnen

¹ Festus a nga bômbô ve melu mela éyoñ a nyoñeya éjôé, ane a nga kôlô Sézaré, a ke Yérusalém.

² Betuni benen a bemvendé be bôte ya Beyude, be nga ke be nye, a somane Paul a ayo'o ese.

³ Be nga sili nye ômômo'o na, a lôme Paul mimbôk e Yérusalém. Fe'e medu'ane jap é mbe na, be yabe Paul a wôé nye *zen.

⁴ Ve a nga yalane be na: Vôme Paul a yiane tabe mbôk a ne Sézaré, a na, be yeme na, émien a ye bo a kele wé éyoñ ése.

⁵ Benya bôtô ba wô'ôtane bebiene be mia, be za'a bia be be bi ke Sézaré. Nge bi yene na, jôm éziñ ja kobetane ényiñe môt ate, mi beta soman.

⁶ Festus a nga tabe e be be a dañedañ melu muam nge awôm. Ve nné ane a nga kui Sézaré, tyé kpwaa, a nga tabe éto ntyi'ane mejô a ve tyiñe na be loone Paul.

⁷ Eyoñ a nga so, Beyude be nga so Yérusalém be nga bômane nye, a dibetane nye a abui beangôndô mejô be nga bo'olô nye. Ve da, be mbe tee benya bifia ya faé mejô mete éfufup.

⁸ Eyoñ éyoñe ya kaman émien é nga kui, ane a nga taté nkobô a jô na: Me nji tyam *atiñ éziñ ya Beyude, nge di ya *nda Zambe, nge di ya njô bôt.

⁹ Amu Festus a nga kômbô yené *mvo'é e mise Beyude, nde a nga jô Paul na: Ye wo kañese na ô ke Yérusalém ane be ne kobô ajô dôé wé me too'

¹⁰ Ane Paul a nga jô na: Me ne ôsu ya aba mejô njô bôte nnen, nne ba yiane tyi'i ajô dame va. Mfa'a Beyude, me nji seb étom éziñe be be, aval ane womien wo yem.

¹¹ Nge me nga sebe fo'o étom, a tyam atiñe ma yiane wu de, me vo'o sa'ale mekua ya awu. Ve mejô bôte ba ba bo'olô ma, me nji bo été. Amu ajô te, môt éziñ a nji bi ngule ya kee me be, be bo ma ane ba kômbô. Ajô te, ma kee ajô dam e be njô bôte nnen.

¹² Ane Festus a nga kui *tyiñ a bebôndé mefe'e bé a jô na: Wo kômbô kee ajô dôé e be njô bôte nnen, yaa, ma kañese!

Festus a liti Paul njôô bôt Agripa

¹³ Eyoñ abe melu e nga lôt, ane njô bôt Agripa baa Bérénis be nga suane Sézaré a ke jome Festus.

¹⁴ Amu be nga tabe ôbe nté, Festus a nga bi éyoñe ya kañete nye ajô Paul avale di: môt éziñ a ne va, Félix a nga li'i nye *nda mimbôk.

¹⁵ Melu me nga too Yérusalém, betuni benen, a bemvendé be nga zu somane nye a sili na be ve nye mekua.

¹⁶ Me nga jô be na, metiñe me éjôé ya Rôme me nji yebe na, be tyi'i môt ajô, te yene a za kate mame ba bo'olô nye.

¹⁷ Teke ve me ôbe éyoñ, ane be nga sulane va tyé ya valé, me tabe ke ve aba mejô, a loone môt ate.

¹⁸ Eyoñ be nga bômane nye, me nji wô'ô be tote nya éfia ba bo'olô nye avale me nga buni.

¹⁹ Ngume jame be nga kobô nye, ô mbe ve mame ma nnambe ñyebe wop. Be dañe'e tote jôé môt éziñ ba loone Yésus, nye a nga wu. Ve Paul nye a kañete nye, ane nyô a vee.

²⁰ Eyoñ me nga bo te yene jame ya bo avale ajô di, ane me nga jô nye na, a ke Yérusalém, be ke tyi'i ajô dé wé.

²¹ Ve Paul a nga sili na, njôô nnen émien a kobô ajô dé. Ane me nga ve tyiñe na be ba'ale nye *nda mimbôk akekui bia lôme nye e be njôô nnen.

²² Ane Agripa a nga jô Festus na: Ma fe ma kômbô wô'ane môt ate a kobô. Festus na, akiti wo ye wô'ô nye.

²³ Tyé kpwaa ane Agripa ba Bérénis be nga nyiine aba mejô, a beta bivuk, nsamba a betebe ôsu benen, a bemie nlame ya tison. Ane be nga zu Paul, aval ane Festus a nga bendé be.

²⁴ Ane Festus a nga nyoñe nkobô a jô na: A njô bôt Agripa a mia bese mi too va, mi lôô môte nyô. Beyude bese be nga zu me yene Yérusalém ajô dé. Ja'ane a zu kui môse wu, ba yôtane na, a nji yiane beta nyiñ.

²⁵ Mfa'a wom, me nji yene jam éziñe ya mimboone mié a yiane wu. Ve amu émien a nga kômbô kee ajô dé e be njô bôte nnen, nde me nga tyi'i na ma lôme ajô dé wé.

²⁶ Mbôle me nji bi nya éfia ya ba bo'olô nye, nde me nga bo na, a kat asu dôé. A dañedañe wo, njô bôt Agripa. Nalé a ye volô me na, me tili nye jam bia ye yen e nkobô wé.

²⁷ Me nji yen e too *zôsôô na be lôme mone mimbôk ôsu, teke liti benya bifia ba bo'olô nye.