Mm 24 - Kalate Zambe Nnomo a Mfefe Mfefé Nkôñelan

Ba somane Paul e be ngovina Félix

¹ Mvuse melu metan, *ntuni nnen, Ananias a bemvendé, a môte mfe, jôé na Tertulus, a mbe nkamane bôte mejô, be nga ke be njô bôt, a somane Paul be nye.

² Ane be nga loone Paul. Eyoñ a soya, Tertulus a nga taté nkate ya ésomane jap aval di: amu wo, a nkômane mam ôse ô maneya bo, mfa'a ya volô ayoñe di, ajô te bia nyiñe ngumba nya *mvo'é.

³ A mbamba njô bôte Félix, bia va'a wo biyoñ bise a vôm ase, amu mbamba be mam mese ô boya bia.

⁴ Mfa'a ya bo te ndeñele wo a abui nkobô, ma zu kobô étun. Nkobô te été, ma ye'elane wo na, ô vô'ôlô wô, a mbamba *nlem, ane bia zu bia yeme wo.

⁵ Bi yeneya na, môte nyô a ne mbia jôm. A soñe ntañete ézezañe Beyude ya *si nyô ése. A na, nye a ne évete beta ñyebe Benazarééñ.

⁶ A nga jeñe fe zene na a ndamane étyi ya *nda Zambe. Ane bi nga bi nye nde bi nga tyi'i nye ajô ane metiñe mangan me né.

⁷ Ve Lizias, évete bezimbi nnen a nga vaa nye e mo mangan a évô ése,

⁸ a bendé bebo'olô bé na be zu tebe asu dôé. Eyoñe wo ye sili nye minsili, womien wo ye yebe na, mejô bia bo'olô nye me ne été.

⁹ Beyude be nga kañese nkobô wé a jô na: A nji ke beté mam mefe yôp.

Paul a kat asu njôô bôt

¹⁰ Eyoñe njô bôt a looneya nye na a zu kat, ane a nga kobô a jô na: Ma yeme na, wo kamane *zôsôô ntyi'ane mejô ayoñe dangan, aso mimbu abui. Amu ajô te, ma zu kobô ajô dam asu dôé a ndi *nlem.

¹¹ O ne fase de. Melu me ngenane te lôt awôm, ane me ndôme ke Yérusalém, a ke kañe Zambe.

¹² To'o *nda Zambe, to'o *aba Zambe ya Beyude, nge tison été, teke môt a nga yene me wôma'ane môt éziñ, nge ke soñelô bôt be bo ntañete.

¹³ Bôte ba be se nguleya liti bengaa ya mejô ba bo'olô me ma!

¹⁴ Jam ma yem e ne na, ma bo Zambe ya beésa bangan ésaé, avale zene ba buni na é ne ékotekot é né. Ma buni mam mese me ne ntilan a bekulu mejô.

¹⁵ Me bili ndi *nlem éte be Zambe. Bebien fe ba buni nalé na, mimbim mia ye wômô mesoñ, e bôt be ne *zôsôô a ba be ne *abé.

¹⁶ Ajô te ma ve ngule ya ba'ale mone môte wom ya *nlem te bijô, e mise me Zambe a mise me bôt.

¹⁷ Mimbu ya mvus, mamiene me nga be'e bôte bame mimvolan a mimvean.

¹⁸ Eyoñe te nje be nga yene me *nda Zambe, a zu fe tuneban mamien. Eyoñe ma jô ji, teke ndula bôt nge éngôngôm éziñ.

¹⁹ Vengevenge, ve Beyude b'éziñe ya Azi mbe, nge ayian a yian, be mbe ngule ya zu somane ma be wo, nge be nga ye bi jam éziñe ya bo'olô ma.

²⁰ Nge na, éyoñe me nga kat asu Sanédreñ, Beyude ba, be nga yene na, me nga tyame z'atiñi'

²¹ Fo'o ve njôane me nga kobô tyiñe yôp, me tele zañe jap na: Ye étom ya na ma buni ñwômane miñwuan nje ba somane ma'

²² Eyoñe njô bôt Félix a maneya tu'a bi éfufube ya ajô zene éte, ane a nga bu'u ajô, a jô na: Ma ye tyi'i ajô denan éyoñe évete bezimbi Lizias a ye so va.

²³ Ane a nga sili mone bezimbi na, a ba'ale nye *nda mimbôk. Ve da a to fili ya nyoñe mimvolane ya bôte bé.

Paul a tabe mimbu mibaé e * nda mimbôk

²⁴ Eyoñ abe melu e nga lôt, Félix a nga zu ba minga wé Drusile, ngone Beyude. Ane a nga lôme bôt be loone Paul, a vô'ôlô nye ane a kobô ajô Krist Yésus.

²⁵ Ve mbôle nkobô Paul ô nga dañe vôôn ajô *zôsôô ntaban, ajô njôane *nlem, ajô ntyi'ane mejô wo ye zu, ane Félix a nga ko woñ. Ane a nga jô Paul na: Tame beta bulan, ma ye beta loone wo éyoñ éfe.

²⁶ Ndi nleme jé é mbe na, Paul a ye ve nye moné. Amu ajô te a nga bo a bo'o mbane ya loone nye na be laan.

²⁷ E mvuse mimbu mibaé Portius Festus, a nga tyendé Félix. A nye, amu a nga kômbô yené mvaé e mise Beyude, a nga ba'ale Paul *nda mimbôk.