Mm 23 - Kalate Zambe Nnomo a Mfefe Mfefé Nkôñelan

¹ Ane Paul a nga fombô Sanédreñ a taté nkobô a jô na: A bobejañ, aso atata'a a kui môse wu, Mone môt wom ya *nlem, a nji ve ma bijô e mise me Zambe, mfa'a ya ényiñe jam.

² Ane Ntuni nnen Ananias a nga bendé bôte bé na, be bibi nye mebaé anyu. Ane Paul a nga jô nye na:

³ Wo Zambe a ye bibi, wo, éfumulu mfin! O too éto ya tyi'i ma ajô ane metiñ. Wo fe mbiasane metiñ été, wo bendé bôte bôé na be bibi ma.

⁴ Ane bôte be nga too valé be nga ve Paul ayemé na: Wo taa Ntuni nnene Zambe!

⁵ Paul nye na: A bobejañ, me nji yeme na a ne Ntuni nnen. E ne fo'o ntilane na: Wo ye bo te ta ntebe ôsu ya bôte bôé.

⁶ Paul a nga yeme na, ékôane bôt é nga to ngab ébaé. Bana Besadusieñ, bana Befarizieñ. Ane a nga yôtan e Sanédreñ été na. A bobejañ, me ne Farizieñ, mone Farizieñ. Amu mbunane wongan ajô ñwômane miñwuan, nde ba zu ma éto ntyi'ane mejô.

⁷ A ngenane te suu nkobô nalé, ane ékôan é nga bôlane zañ, Befarizieñ a Besadusieñ.

⁸ Besadusieñ ba yemete na: To'o ñwômane miñwuan, to'o éngele, to'o Nsisim, jôm é nji bo nalé. Ve Befarizieñ ke ba meme na, mame mete me ne bebela.

⁹ Zô'é é nga bo nya abui. Beyeme bekalate bevok ya ngame Befarizieñ be nga sili na: Ye nya ajôô ya ve môte nyô mekua nyô, za *a yem, nge Nsisim a nga kobô nye, nge Engele'

¹⁰ Eyoñ évete bezimbi é nga yene na, ntañete ô nga ye bo abui, a na, be ne nyabe Paul bifus, ane be nga lôme bôt be ke vaa Paul e zañe jap, a bulane nye *nda mimbôk.

¹¹ Alu e nga tôñe valé, Nti a nga yené e be Paul a jô na: Bo'o ngule *nlem, ô maneya kañete jôé dam e Yérusalém. Avale da fe wo yiane kañete Rôme.

Beyude ba bu mbia éso'o ya wôé Paul

¹² Eyoñe tyé é nga lendé, Beyude be nga bôndé fek, a kane ngana na, ba ye bo te di nge nyu, ve akekui be wôéya Paul.

¹³ Bôt, a lôte mewôm menyin, be nga tabe éso'o te.

¹⁴ Ane be nga yene betuni benen a bemvendé a jô be na: Bi maneya tyik a kane ngana na, bia ye bo te di nge nyu, ve akekui bi wôéya Paul.

¹⁵ Nde mfa'a wongan, nkañesane ya Sanédreñ ô ne na, mi sili évete bezimbi na a lôme bia nye. Mia ye jô nye na, mia yi mi tu'a kôme fase ajô dé. Wôna mfa'a wongan, bi maneya kôme na, a ngenane zene ya zu nloon, bia ye wôé nye.

¹⁶ Mone kale Paul a nga mane wô'ô éso'o te; ane a nga ke *nda mimbôk a kate Paul.

¹⁷ Ane Paul a nga loone mone bezimbi wua, a jô nye na: Kele liti ndômane nyô e be évete bezimbi. A bili jam éziñe ya kate nye.

¹⁸ Ane mone bezimbi a nga nyoñe ndôman, a ke liti je évete bezimbi, a kate nye na: E mone mimbôk a ne jôé na Paul a te loone ma, a jô me na, me zu liti wo ndômane nyô; a bili jam éziñe ya kate wo.

¹⁹ Ane évete bezimbi é nga bi ndômane wo a kee nye vôm étam, a kate nye jé ja lôt. Ane a nga sili nye na, ajô e ne aya'

²⁰ Ane mongô a nga yalan a jô nye na: Beyude be maneya kui *tyiñ na be zu sili wo na, ô lôme Paul akiti, a zu asu Sanédreñ. Ba veñ na a ke, be tu'a fase ajô dé.

²¹ Te ve'ele kañese. Ba ye bo bôt, a lôte mewôm menyin, ba ye bole nye. Be maneya tyik a kane ngana na, ba ye bo te di nge nyu, ve akekui be wôéya nye. Nkañesane wôé ya suu nye étam ñwô ba yange.

²² Ane évete bezimbi é nga suu *nlôman ô ke, a jô nye na: Te kate môte mfe na wo te me kulane émo'o ji.

Paul a tabe mimbôk e Sézaré

²³ Ane a nga loone bezimbi bé bebaé a jô be na: Kômesa'an, mi ke Sézaré. Mi téé *mewolo ébul ya mamengô'é. Mia kee bezimbi mintete mibaé. Be wulu bikabela mewôme zamgbwa, a bevolô mintete mibaé.

²⁴ Be kôme Paul bikabela a ye bet été, a kui *mvo'é e be ngovina Félix.

²⁵ Ane a nga tili kalate a bili mejô mana na:

²⁶ Ma, Claudius Lizias, ma tili mbamba njô bôt Félix, mbôlô!

²⁷ Beyude be nga bi môte ma lôme wo le. Be nga li'i tyôtyoé ya wôé nye. Ane me nga vañ ajô te a bôte bam, a vaa be nye mo. Amu me ndôme wô'ô na a ne bialébialé ya éjôé ya Rôme,

²⁸ amu me nga kômbô yeme jame ba bo'olô nye, ane me nga lôme nye a ke kate Sanédreñ.

²⁹ Ane me nga yene na, ajô da nnambe ve mame ya metiñe map. Teke yen éfia ja ve môte mekua ya awu, nge ji ya ka'a môt ngata'a.

³⁰ Eyoñe me yemeya na, be nga bo éso'o ya wôé nye, ajô te ñhe ma lôme wo nye. Me nga tu'a fe kate bôt ba bo'olô nye na, be zu ésomane jap e be wo.

³¹ Aval ane be nga bendé be, bezimbi be nga kee Paul e be Antipatris a alu.

³² Bewulu bikabela be nga kee nye. Ane be nga bulane *nda mimbôk.

³³ Eyoñ be nga kui Sézaré, bewulu bikabela be nga ve ngovina kalate, a liti nye Paul.

³⁴ Ane ngovina a nga lañe kalate a sili na Paul a ne bialébialé ya afôla avé? Be nga jô na, e Silisi.

³⁵ Ane ngovina a nga jô Paul na: Ma ye wô'ô ane wo kat ajô éyoñe bôte ba bo'olô wo ba ye so. Ane a nga bendé na, be ba'ale nye *nda be Hérôde.