Mm 22 - Kalate Zambe Nnomo a Mfefe Mfefé Nkôñelan

¹ A bobejañ a betate, vô'ôlane mejô ma zu kobô mia mfa'a ya kame mamien.

² Bôte be nga ke ôsu a dañe ku bivô éyoñ be nga wô'ô na Paul a zu kobô nkobô Beyude.

³ Me ne mone Beyude. Me nga bialé Tarse, afôla ya Silisi. Ve da, e tison nyô nje me nga yaé a nyoñ ayé'é, e fefele Gamaliél, teke selan ane metiñe ya beésa bangan me né. Me nga nye'e ajô Zambe ndindima, fo'o ve ane mia bese mi né éyoñe ji.

⁴ Me nga kpwe'ele zene nyô, ja'an a kui vôme ya wôé bôt be nga tôñe je. Me nga bi bôt, befam a binga, a kee be *nda mimbôk.

⁵ Ntuni nnen, a nsamba bemvendé, be ne ngule ya bo bengaa. Mbe be nga ve ma bekalate ya bobenyañe bangan, éyoñ me nga ke Damas, nlômane ya ke kak a zu be Yérusalém, mfa'a ya ve be *melep e be ba be nga to wé.

⁶ Me to dulu zañ, bebé Damas, atemeteme na, bebé zañe *môs, beta éfufup a so'o yôp, a nga bômane ma a minkôkô mié.

⁷ Ane me nga ku si. Me nga wô'ô *tyiñ é jô'ô me na: A Saül, a Saül, wo kpwe'ele ma a jé'

⁸ Ane me nga yalan a jô na, ô ne za a Nti? Ane *tyiñ é nga beta so, é jô'ô na: Me ne Yésus ya Nazarét, ma wo kpwe'ele!

⁹ E bôte bia be be bi nga too nsamba, be nga yen éfufube te, ve be nji wô'ô *tyiñ é nga kobô ma.

¹⁰ Ane me nga sili na, e ne ñhe me bo aya a Nti? Ane Nti a nga yalane ma a jô na: Kôlô'ô si ô ke Damas. E wé, nye ba ye tu'a kate wo ésaé é vebaneya be wo.

¹¹ E nde bôte bia be be bi mbe nsamba be nga bi me wo, a kui Damas. Amu minkôkô mi éfufube te mi nga kpéeé ma ndim.

¹² Môt éziñ a nga too, jôé na, Ananias, a mbe môt a ne *zôsôô, mba'ale metiñ. A nga bili mbamba nkañete e be Beyude bese be nga to valé.

¹³ Ane a nga zu yene ma, a jô me na: A Saül, mojañ, mise môé me ku'iban a yen. Eto te ébien, e mise mam me nga kuiban a yen émien asu.

¹⁴ Ane a nga jô me na: Zambe ya beésa bangan a boya na, ô yeme nkômbane wé. O yeme nyô a ne *zôsôô, a wô'ô tyiñe jé émien.

¹⁵ Wo yiane bo ngaa wé, e mise me bôte bese, mfa'a ya mam mese ô maneya yen a wôk.

¹⁶ Jé wo ye beta sili, za'a bi ke. A ntoo ve duban a tunebane mfa'a ya mam *abé môé, a loone jôé dé.

¹⁷ Eyoñe me bulaneya Yérusalém, me nga too me bo'o meye'elan e *nda Zambe été.

¹⁸ E nga kui ma *môs éziñe na, me ku si ne vema a yene Nti, a jô'ô me na: Kôlô'ô Yérusalém avôl, teke yange. Amu bôt baa ye ke buni nkañete wôé ajô dam.

¹⁹ Ane me nga yalane na a Nti, ke ba tu'a yeme na, ma me nga ke e meba me Zambe Beyude a bi bôt, a kee be *nda mimbôk, a bôme ba bese be nga buni wo.

²⁰ Ja'ane Etienne, e *zôsôô nkañete wôé, éyoñ metyi mé me nga kui, ke me mbe valé, me kañese'e mboone bewôé bôt bete. Me nga bo fe me ba'ale'e mengômesane map.

²¹ Ve Nti a nga jô me na: Kele mfa'a ma jô wo. Amu mfa'a wo dañ ôyap, e be meyoñe bikuu, ñwô ma lôme wo.

²² Beyude be nga wô'ô mejô Paul a nga kobô, be nga bete metyiñe yôp a jô na: Be va'a avale môte di e *si nyô, a nji yiane nyiñ!

²³ Amu be nga bo be bamek, a wua melô'ô map e mbuluk été,

²⁴ évete bezimbi é nga bendé na, be nyiñeli Paul e *nda mimbôk été, a bôme nye, ndemben ba ye yem amu jé abui zô'é da bo, a za éfia ba bo'olô nye.

²⁵ Eyoñe be nga ye buti Paul si na be bôme nye, ane Paul a nga jô mone bezimbi a mbe vaa na: Bialébialé éjôé ya Rôme, éyoñ be ngenane te tyi'i ajô dé, ye ô bili ngule ya bôme nye'

²⁶ Eyoñe mone bezimbi a nga wô'ô njôan ôte, a nga ke ji'a kate ntebe ôsu: wo ye bo aya? Môt a ne mone nlame ya éjôé ya Rôme!

²⁷ Ane évete bezimbi é nga beta zu sili Paul na: Kate ma, y'ône mone nlame ya éjôé ya Rôme? Paul na ya!

²⁸ Ane évete bezimbi é nga jô na: Me nga bi ngul éte a tañ anen. Paul a nga jô nye na: Ve ma, me bili je aso abialé.

²⁹ Bôt be nga ye bôme nye be nga jô'é été été, ve mfa'a évete bezimbi, woñ ô nga bi nye *nlem éyoñ a nga yeme na mone nlame ya éjôé ya Rôme nye a kôme ba'ale nka'ane ngata'a.

Paul a kat ajô asu Sanédreñ

³⁰ Tyé kpwaa, ane a nga tyi'i na, a tu'a yeme z'ajôô Beyude ba bo'olô Paul. A nga bo na be tiine nye mengata'a. Ane a nga bendé na, betuni benen be sulan fufulu a Sanédreñ. Ane a nga lôme Paul a ke kobô ajô asu dap.