Mm 20 - Kalate Zambe Nnomo a Mfefe Mfefé Nkôñelan

Paul a beta bulane Masédôan a e Grés

¹ Eyoñ éngengam é nga man, Paul a nga loone beyé'é a ve be ngule minlem. Ane a nga ya'ane be a ke Masédôan.

² Eyoñ a nga mane lôte mefôla mete a mane fe ve bobenyañe ngule minlem, ane a nga kui Grés,

³ vôm ate a nga tabe ngon éla. A nga yiane bete sitima a ke Siri, ve amu Beyude be nga bo éso'o ya bo nye *abé, nde a nga tyi'i na a viane tyii Masédôan.

⁴ Bôte be nga to e nsamba wé be mbe na: Sapatrôs, mone Pirus ya Béré, Aristark, baa Sékundus ya Tésalonik, Gayius ya Derbe a Timôté, nalé fe Tisik a Trôfime éfase si ya Azi.

⁵ Nsamba bôt ô nga ke bia ôsu wu ô nga Yange bia Trôas.

⁶ Ve mfa'a wongan, nkôlane ya Filip, éyoñe melu ya fembé é ne te mvusan me lôteya, bi nga ke koone be Trôas. Valé melu metan me lôteya, bi nga tebe valé ngume sondô.

Njomane ya jô ma'an e Trôas

⁷ E *môs ôsu ya sondô, éyoñe bi nga sulan a be'e fembé, Paul a nga yiane ke tyé, ve a nga kobô bobenyañ ajô Zambe akekui zañ alu.

⁸ Belambe be nji jemban étune *nda ya yôp, e vôme bi nga sulan.

⁹ Esoé ndôman, be lo'one je jôé na Etikus, a nga tabe éwome vundi *a ke ôyo melom. Ane a nga koo a ku si. Eyoñe be nga ye bete nye si, e kooé na a wuya.

¹⁰ Ane Paul a nga sise si avôl e vôme a nga bôô, a bi nye a mo mé, a jô bôte na: Te koone woñ, a vee!

¹¹ Eyoñ a nga beta bet étune *nda ya yôp, ane Paul a nga be'e fembé a di, ane a nga kee minlañe ôsu a kui tyé. Mvus éte, a nga ke.

¹² Ve mfa'a ésoé ndôman, be nga bulane nye a vee. Jame te e nga ve bôte ngule minlem abui.

Paul a ke Milé; Ma'ane e be bemvendé ya Eféze

¹³ Ane bi nga tebe ôsu a nyoñe sitima a ke su'u Asos. Vôm ate bi nga yiane beta nyoñe Paul. Amu nye a nga yiane ke wé, e zene ya sisi, aval ane émien a nga tyik.

¹⁴ Eyoñ a nga koone bia Asos, bi nga nyoñe nye a ke Mitiléne.

¹⁵ A kôlôya valé, bi kele éfunga, a kui zia Kiôs; e môse baa, bi nga dañ a ke mfa'a ya Samôs: tyé kpwaa, bi nga kui Milé.

¹⁶ Paul a nji kômbô tebe Eféze: amu a zaa jañele éyoñ Azi. A nga bili ôvek ya kui Yérusalém asu ya tabe wé, e môse Pantekôt, nge nalé a ne boban.

¹⁷ Paul a too Milé, a nga bañete bemvendé ya Eféze.

¹⁸ Eyoñe be nga sulane vôm a nga too, ane a nga kobô be a jô na: Mia yeme nnôme fulu wom e zañe jenan, ataté môse me nga suane be mia Azi.

¹⁹ Me nga bo Nti ésaé a éjoté nyôl ése, a mili'i mis. Me mbe mbôma'ane a *meve'ele, amu mbia bimo'o Beyude.

²⁰ Me nji biasé jam éziñe ya mam mi nga yiane yene mfi. Ve me nga kate *mbamba Foé a ye'ele mia vôme bôt be too, ja'ane mia mia.

²¹ Foé jam é nga loone Beyude a Begrék na be koñelane be Zambe a buni Nti Yésus.

²² Eyoñe ji ma, mbô'ô Nsisim, me tele zene ya ke Yérusalém. Me ne te yeme jam da yañge ma wé.

²³ Ve ja'ane aya, nge aya, Nsisim a kate me de tison ése na bengôkop a mintaé ya *nlem bia yange ma wé.

²⁴ Mfa'a wom, me nji yen ényiñe jame beta tañ. Jame ma sôñ e ne ve na, me sondô mmatane mbil a ésaé Nti Yésus a nga ve ma me bo. E ne na me kate Mbamba Foé ya mvame Zambe.

²⁵ Ataté éyoñe ji, mia ye bo te fe beta yen asu dam, mia bese, mbe bete me nga kate Foé ya Ejôé.

²⁶ Me ne nguleya kobô tyiñe yôp e môse wuna na, me ne teke bijô ajô ya metyi menane mia bese.

²⁷ Me nji ke ve'ele bo éles mfa'a ya mone jam éziñ. Ve na, e fe'e Zambe ése, nje me nga kate mia.

²⁸ Ba'alane miabebien, a ngumba mbam, ñwô ôte Mfufube Nsisim a nga telé mia beba'ale. Bo'one beba'ale mintômba ya Keké, nje éte a nga nyoñ a metyi mé.

²⁹ Ma yeme na, mvuse ya akôlô dam, mbia beze ba ye zu e zañe jenan, mbe ba ye bo te nyii mbam.

³⁰ E zañe jenan, bôt ba kobô bifia ya nzameta'ane ba ye yené a dutu beyé'é be tôñe be.

³¹ Ajô te momba'an, te vuane na alu a *môs, nté mimbu mila, a mili'i mis, me nji jô'é lebe môt ase ya be mia.

³² Nde den, ma kee mia e mo me Zambe a Mbamba Foé ya mvame jé, nye a bili ngule ya lôñ a ve ba bese be ne émbé ngap.

³³ Me nji nyamete argent, or, nge ngômesane éziñe ya be môt.

³⁴ Miabebien mia tu'a yeme na bisaé ya mo mam, bi nga bo na me jalé minkômbane miam, a mi bôt be nga wulu nsamba wom.

³⁵ Me nga liti mia éyoñ ése na, njibane njuk avale te ñwô wo bo na, mintetek mi yene mvolan a simesane mejô me Nti Yésus émien a nga kobô na: Mvean wo dañ ébotan a dañe nyoñan.

³⁶ Eyoñ a nga mane kobô mejô mete, ane a nga kute meboñe si baa be be a ye'elan.

³⁷ Bôte bese be nga kutane miñyôn a wubane Paul *tyiñ.

³⁸ Ôlune wop ô nga dañ abui amu a nga jô be na, ba ye bo te beta yene nye asu. Ane be nga ke litane nye sitima.