Mm 2 - Kalate Zambe Nnomo a Mfefe Mfefé Nkôñelan

Môse Pañtekôt

¹ Eyoñe *môs ya Pantekôt ô nga kpwaan, bese be nga too nsulane vôm wua.

² Atemeteme na, éduñ é nga so yôp aval ane ngul évuñulu ôkôs; *nda be nga too, é nga jaé ne lut a éduñe te.

³ Nde, jôm é funa'an ayeme nduan, é nga salane zañ, a bebe môt ase ya été nlô yôp.

⁴ Bese be nga jaé ne lut a Mfufube Nsisim. Ane be nga kobô *minkobô mife ane Nsisim a nga liti be.

⁵ Be Yude be nga too Yérusalém, be nga ko Zambe woñ, be so'o e be *meyoñ mese ya yôbe si.

⁶ Nwô'ôtane be nga wô'ôtane zô'é, ndula bôt a nga sulane mengôs mengôs, amu môt ase a nga wô'ô be kobô'ô nkobô wé.

⁷ Fe'e ne vema a, njalan a mekômba'a, be nga sili bebiene na: Bôte bese ba kobô ba, ye be nji bo bôte ya Galilé'

⁸ Da bo aya na, môt ase ya be bia a wô'ô be kobô'ô nkobô a nga bialé wô'

⁹ Beparte, Beméde a Beélamite, bôte ya Mézôpôtami, Yudé a Kapadôs, Poñ a Azi,

¹⁰ Frigi a Pamfilie, Ejipte a Libie, Sirénayik, ba ya Rôm be to va,

¹¹ bese, to'o Beyude, to'o Beprôzélit, bôte ya Krét a Bearabe. Bia wô'ô be kobô'ô bitua bi mam bi Zambe e *minkobô miangan.

¹² Bese be nga to fe'e ne vema a semé, a sili e zañe jabe na, e jame di e ne aya'

¹³ Ve bevok be nga viane kpwe'ele be be jô'ô na: Ke be jaéya ne lut a mfefé woon.

Nkobô Pierre

¹⁴ Pierre a nga too valé, baa beyé'é awôm a wua. A nga nyoñe nkobô a jô na: A bôte ya Yudé a mia bese mi too Yérusalém, tuka'a yemane jam da boban a baa melo, mi wôk mejô mam.

¹⁵ Bôte ba, be nji so'o meyok ane mia ve'e fe'e; ke *mewolo ébul ya mametyé e nye nyô.

¹⁶ Ajô *nkulu mejô Yôél a nga kulu, nde da bobane dene di,

¹⁷ éyoñ a nga kobô na: Melu ma su'ulan, Zambe a nga jô na, ma ye sôé Nsisime wom e be minsône mise. Bobefam benan a bobebinga benan ba ye kulu mejô, bisoé bienan bia ye yene mam e *nsisim été, a minnôme mi bôte mienan mia ye yeme biyeyem.

¹⁸ Yaa, bebo bisaé bam, befam a binga, ma ye sôé be Nsisime wom melu mete, a ba ye bo bekulu mejô.

¹⁹ Ma ye bo bitua bi mam mfa'a ya yôp, a mendem mfa'a ya si, metyi, nduan a nsum ôtita.

²⁰ Jôp da ye veñesane dibi a ngon k'éveñesane metyi. Valé beta môse ya duma Nti a ngenane te so.

²¹ Nde bôte bese, nyô a ye loone jôé Nti a ye nyiñ.

²² A mvô'ô Israél, vô'ôla'ane mejô mam. Yésus ya Nazarét, môte Zambe a nga ve ntute ngule zañe jenan, a bo bitua bi mam; mam ya semé, a mendem aval ane mia yem.

²³ Môt ate, aval ane ngumba nta'ane Zambe, édo'o ya ñyemane wé, mi nga kuane nye, a wôé nye *krôa yôp, e mo me mbia be bôt.

²⁴ Ve Zambe a nga wômôlô nye, a kandane mintaé ya awu, amu awu e mbe te nguleya bi nye e ngule jé été.

²⁵ Nalé fe na, David, a nga kobô ajô dé a jô'ô na: Me nga lô Nti ôsu viam éyoñ ése, amu a ne ma mbo nnôm, mebo me za téé ma si.

²⁶ Nde *nlem wom ô nga vak, a anyu dam e nga yia bia mefôn. Mvo'é a ndi *nlem, minsôn miam mia ye wo'on.

²⁷ Amu wo ye bo te li'i ényiñe jam e vôme ya miñwuan, a éñwôé ô nga top, a ye bo te boé soñ.

²⁸ O nga liti ma mezene ya ényiñ, wo ye jalé ma a mevak, e fefele jôé.

²⁹ A bobejañe bam, me ne jô mia de a ndi *nlem ése na: Mvamba David a nga wu, ane a nga jambane soñ. Soñe jé é ngenane be bia a kui môse wu.

³⁰ Ve a mbe *nkulu mejô, a nga yem na, Zambe a nga kalan a kane ngana na, a ye tooé môte ya mvoñe bôte jé éto njôane jé, mbialan e metyi mé émien.

³¹ David a nga yen ôsu ya ñwômane Krist a, amu ajô dé, nde a nga kobô na: Enyiñe jé é nji li'i vôme ya miñwuan, a minsoñe mié mi nji boé soñ.

³² Yésus ate nye Zambe a nga wômôlô. Bia bese bi ne bengaa.

³³ Mbetane yôp e mbo nnôme Zambe, nde a nga nyoñe Mfufube Nsisim a mbe ngaka'a e be Esaa, a nga miase nye avale mi lô a mia wô? ô di.

³⁴ David a nji ke fo'o ke yôp, ve a nga kobô na: Nti a nga jô Nti wome na, tabe'e si e fefele ya mbo nnôme wom,

³⁵ akekui ma ye bo besiñe bôé jôme ya telé mebo.

³⁶ Nda bôt Israél é tuka'a yem ajô di ne sañesañ na: Zambe a boya nye Nti a Njô bôt, Yésus mi nga tyelé *krôa.

³⁷ Eyoñe be nga wô'ô mejô mete, ane me nga fô'ô be minlem, be nga sili Pierre a minlômane mivo'o na: A bobejañ, bia ye bo aya'

³⁸ Ane Pierre a nga jô be na: Kôñela'ane minlem; môt ase ya be mia a duban a jôé Yésus Krist, ajô njamane mam *abé mé, wôna, mia ye nyoñe mveane Mfufube Nsisim.

³⁹ Amu ngaka'a é ne énjenan, nyô benyô *bon, nyô ba bese be ne ôyap, to'o be ne abime abui ese Nti, nyô émien a ne Zambe a ye loon.

⁴⁰ Pierre a nga ke ôsu a kañete be mejô mefe abui, a ve be ngule nyô aval ane njôane wuna ô né na: Nyi'ane miabebien ézezañe ya mbia miaé bôte wu.

⁴¹ E bôte be nga dutuban a mejô mé, be nga duban. Be mbe bebé bôte toyini éla, be nga tôñe be.

Nsamba * bebuni ya atata'a

⁴² Be nga semé nye'elane Minlôman, a fulane minlem ane bobenyañ, ajô mbe'ane fembé a mboone meye'elane.

⁴³ Woñ ô nga bi bôte bese. Minlôman mi nga bo bitua bi mam a mendem.

⁴⁴ Bôte bese be nga buni, be nga to nlatan a belane biôme fufulu.

⁴⁵ Be nga kuane mesi map, a biôm biap, a kabane moné ya été, aval ane minkômban mi môt ase mi mbe.

⁴⁶ Tyiñe jia, be nga bo mbane ya ke *nda Zambe. E menda mab été, be nga be'e fembé, be ja'a fe bidi a minleme nje'eban.

⁴⁷ Be nga kañe Zambe, a bôte bese be nga nyoñe be *mvo'é. Môs ôse, Nti a nga bo a kô'ôlane bôt be nga yene ényiñe nsamba wop.