Mm 17 - Kalate Zambe Nnomo a Mfefe Mfefé Nkôñelan

Minju'u ya Tésalônik a Béré

¹ Ntyiane be nga tyii Amfipôlis a Apôlône, be nga kui Tésalônik, e vôme Beyude be nga bili *aba Zambe.

² Aval ane fulu Paul é mbe, a nga ke tôbane be a kobô be ajô Zambe besabat belaa, aval ane mintilan.

³ A nga kôñelane be a tu'a yemete na: Mesie a nga yiane tôbane mintaé ya awu, a wômô ñwuan. Mesie ate, nye a ne Yésus ma kañete mia.

⁴ Beyude bevok be nga kpwéban a lat a Paul baa Silas, a bôt abui ya Begrék, be kañe Zambe a mimfañe mi binga.

⁵ Ve Beyude be nga yaa amu mesengan. Be nga tôkane zezé bôte ya minjoñ a ndôñôlô bôt, a miase nzameta'an e tison été. Ane be nga ke jeñe Paul baa Silas e *nda Yason, be yi na be kee be ézezañe bôt.

⁶ Ve be nji koone be wé. Ane be nga ke ba wo'otô Yasôn a bobenyañe b'éziñ ôsu be bejôô, be yôta'ane na: E bôt be nga fô'ô ngume si ôse be nto va, a Yason a nyoñeya be *nda jé.

⁷ E bôte ba bese, ba wosane metiñe me njô bôt, amu ba kate na, njô bôte mfe a ne, nye a ne Yésus.

⁸ Nkobô te ô nga bi bôte minlem, ja'ane betebe ôsu, mbe bete

⁹ be nga sili Yason a bobenyañ éban, ndemben be suu be.

¹⁰ Ane bobenyañ be nga ji'a bo na Paul ba Silas be ke Béré. Nkuane be nga kui wé, be nga ke nyiin *aba Zambe Beyude.

¹¹ Nsela'an mfa'a ya mbamba minlem a bôte ya Tésalonik, be nga nyoñe Mbamba Foé a évévé ése. A, *môs ôse, be nga fase mintilane na be tu'a yem nge nkobô Paul a Silas ô ne bebela.

¹² Abui ya e be be e nga buni, ja'ane mimfañe mi binga ya Begrék a befam, abime ya semé.

¹³ Ve nné ane Beyude ya Tésalônik be nga wô'ô na Paul a nga beta kañete Foé Zambe e Béré, ane be nga beta zu ndôñôlô bôt a zametane be valé.

¹⁴ Teke yange, ane bobenyañ be nga ji'a bo na Paul a kôlô a ke mañ. Ve Silas baa Timôté mbe be nga li'i valé.

¹⁵ E bôt be nga ke litane Paul be nga ke su'u nye Aténe. Ane be nga bulan a mbañete Paul a nga bendé be ajô Silas baa Timôté na, be ji'a tôñe nye.

Paul a beyeme mame ya Aténe

¹⁶ Eyoñe Paul a nga bo a yange'e be Aténe, ajô nkañane bengunemelane ya tison éte e nga tya'a nye *nlem.

¹⁷ Ajô te a nga kobô Beyude a bekañe Zambe *aba Zambe été, nalé fe e minseñ été. A nga kobô môt ase a nga lôt.

¹⁸ A nga laane fe, ja'ane beyé'é be Epikure a be stoyisieñ. Bôte bevok be sili na: Abui ayap ajô di da jô jô aya? Bevo'o ke na: Ke a ne bo nkatefoé bezambe bikuu. Ve Paul a nga kañete foé Yésus a ñwômane ñwuan.

¹⁹ Ane be nga nyoñe nye, a kee nye e be Ayérôpage. Ane be nga sili nye na: Ye ô ne kôñelane bia bi yeme mfefé nye'elan wo ye'ele wu.

²⁰ Amu wo dipe bia melo a bitua mejô. Nde, bia kômbô yem, mejô mete ma kôñelan aya? E ne bebela na,

²¹ bôte bese ya Aténe a beyeñe bese be too été, be nga ve éyoñe jap mfa'a ya kañete, nge vô'ôlô mimfefé mi mam.

²² Ane Paul a nga nyoñe nkobô ayérôpage a jô na: A bôte ya Aténe, jam ôsu ma yene mfa'a wôñan, mia bese e ne na, mia nye'e Ajô Zambe abui.

²³ Eyoñ ma wulu minjoñe ya tisone jenane nyô, ma yene bive'ela bi biôme ya nkañan a, me beteya fe some ata'a metuna'a, ntilan ô to été na: E *zambe bôt be nji yem. E jôme mia kañ te yeme te, nje ñhe ma Paul, ma zu faé mia éfufup.

²⁴ E Zambe a nga té yôp a si, a mañ, a biôme bise bi ne été, nyô a ne Nti ya yôp a si, a ne te tabe menda me ne nlôñan a mo me bôt.

²⁵ Esaé jé é nji sili mo me bôt aval ane nge a yi jôm éziñ. Amu nye a ne mvee ényiñe ya bese, mvebe a jôm ése.

²⁶ A nga té meyoñe mese, ntene ya be môte wua, a tooé be e *si nyô ése. Ane a nga telé biyoñ a tyi'i minné ya vôme bôt ba ye tabe.

²⁷ Mboone te ôse, amu a nga yi na bôt be jeñe Zambe, ndô'ôtô be mbe ngule ya yene nye éyoñ ba ke ba bôp. Amu éyoñe bia tu'a fas, a nji bo môt ase ya be bia ôyap.

²⁸ Amu ényiñe jangan, mfô'ôsan, ja'ane ngume ntabane wongan, bia so ve e be nye. A too fo'o ve aval a ne beyeme mam benane b'éziñ be nga jô. Amu bi ne bone ya mvoñe jé.

²⁹ Nde, amu bi ne *ayoñe Zambe, bi nji yiane simesane na Zambe a funane akok e ne édima, nge or nge argent, nge éve'ela é ne nkpwelan, ésaé ya atyeñ a befe'e ya môt.

³⁰ Tame yene Zambe, nye teke nyoñe ngap a nté éyoñe ya bôt be nga to ndiman été, a kate bôte foé éyoñe ji na, bese, a vôm ase, ba yiane kôñelane minlem.

³¹ A, a teléya *môs, ñwô a ye tyi'i *si nyô mejô *zôsôô, a zene ya môt a nga top. Aval ane a maneya liti bôte bese ndem a zene ya wômôlô nye miñwuan.

³² Efia ñwômane miñwuane ji, bôte bevok be be nga bi je fianga. Ve bevok be nga kate nye na: Bia ye beta wô'ô ane wo kobô ajô te éyoñ éfe.

³³ Nalé nye Paul a nga li'i be.

³⁴ Bôte bevok, be nga lat a nye a bo *bebuni, aval ane Denis ya afôla ya Ayérôpage, a minga éziñ a mbe jôé na Damaris a befe.