Mm 14 - Kalate Zambe Nnomo a Mfefe Mfefé Nkôñelan

Paul ba Barnabas Ikôn a Listre

¹ Avale da da Ikôn, Paul baa Barnabas be nga nyiine Aba Zambe Beyude a kobô avale ya na, abui Beyude a Begrék be nga buni.

² Ve Beyude be nga bo te kpwéban a mejô map, be nga bé nsisime ziñ e zañe bobenyañ a e be meyoñe bikuu.

³ Paul baa Barnabas be nga ke ôsu a tabe nté éziñ. Ndi nleme jap é nga to e be Nti, Nye émien a nga yemete Mbamba Foé ya mvame jé, a zene ya ve mo mabe ngule ya liti mendem a bitua bi mam.

⁴ Ane bôte ya tison be nga kandane zañ, bevo'o ngame Beyude, ba bevok e ngame minlôman.

⁵ Meyoñe bikuu a Beyude be nga tyi'i na, ba zu bo évô a wôé minlôman.

⁶ Eyoñe be yemeya na *abé e ntoo, ane be nga jeñe vôme ya sobô e tison ya Likaônie, Listre a Derbe a mefôla ma bôman.

⁷ Be nga kate fe Mbamba Foé wé.

⁸ Môt a mbe ñyeyeme Listre, te ngule ya tebe tetele a mebo mé. A mbe ñyeyem aso abialé. A nji tame wulu *môs éziñ.

⁹ Môs éziñ a nga vô'ôlô nkobô Paul, ane Paul a nga fombô nye a yene na a nga bili mbunane ya bo *mvo'é.

¹⁰ Ane a nga jô nye a ngule na: Kôlô'ô si ô tebe a mebo môé. Ane môt ate a nga valé si a wulu.

¹¹ Eyoñe bôt be nga yene jame Paul a nga bo mise map me lôô, ane be nga bete metyiñe yôp e nkobô wobe ya Ikôn be jô'ô na: Bezambe, be funa'ane bôt, be zuya e be bia.

¹² Be nga yôlé Barnabas na Zeus, Paul ke na Hérmés, amu nye a nga bili *ntum ajô.

¹³ Ane *ntuni zambe Zeus, *nda Zambe jé é mbe atan aka'a ya nlam, a nga zu beyôme benyak a bikate bi sam e mimbé yôbe ya tison, *tyiñ a bôte na, a zu ve *bityi'a.

¹⁴ Eyoñe foé nyô é nga kui melo me Barnabas baa Paul, be nga nyabe melô'ô map a ke avôl e be ékôane bôt a yôtan a jô na,

¹⁵ jé mia bo ji, ke bia fe bi ne bôt ane mia. Mbamba Foé bia kat ane avale dina na, mi jô'é biboboé mia bo, mi kôñelane minlem a buni vevea Zambe, nyô a nga té yôp a si a mañ, a biôme bise bi ne été.

¹⁶ Aso melu kôa, a nga jô'é miaé mi bôt mi wulu e mezene map.

¹⁷ Ve akôsa bo nalé, a nji vuane liti be mvame jé, vôm a nga lôme mveñ é so'o yôp a mimbu ya afok a ve mia bidi, a jalé minleme mienan a mevak.

¹⁸ Mejô mete me nga ve'ele volô bôte minlem, a bo be na, be jô'é ôsimesane ya ve *bityi'a.

¹⁹ Beyude, be so'o Antiôche a Ikôn be nga dutu bôt be bôme Paul bebé ya wu. Be nga ke ba wo'otô nye atane ya tison a wua nye ane mbim.

²⁰ Ve éyoñe beyé'é be nga zu bômane nye, ane a nga bi ngule ya kolô si a bulane tison. Tyé kpwaa, baa Barnabas be nga kôlô a ke Derbe.

Mbulane Paul ba Barnabas

²¹ Eyoñe be maneya kate Mbamba Foé e tison éte, a dutu bôt abui be bo beyé'é, ane be nga beta bulan a lôte Listre, Ikôn a Antiôche.

²² Be nga ve beyé'é ngule minlem a tômôlô be na, be ba'ale mbunan, a jô be na: ajô ya nyiin *ayoñe Zambe da sili na bi jibi mam abui.

²³ Be nga telé bemvendé keké ése. Be nga bo meye'elan a tyi bidi a ve be e be Nti, nyô be nga buni.

²⁴ Eyoñe be nga lôte Pisidie, be nga ke Pamfilie,

²⁵ a kañete Mbamba Foé e Pergé, a tulan a kui Atali.

²⁶ Valé, be nga bet éfunga a ke Antiôche e vôme be nga taté dulu. Vôm ate be nga ve be mo me Zambe a ne *mvam, ajô ya ésaé be nga ke bo.

²⁷ Eyoñe be nga kui, be nga sulane *bebuni, a kañete be mam mese Zambe a nga bo ésaé jap été, a dañedañ ane a nga yoé meyoñe bikule *mbé ya mbunan.

²⁸ Ane be nga tabe nté éziñ baa be beyé'é.