Mm 13 - Kalate Zambe Nnomo a Mfefe Mfefé Nkôñelan

Barnabas ba Saül ba ke * nlôman e Sipre

¹ Bekulu mejô a beye'ele bôt be nga too keké ya Antiôche. Barnabas, Siméoñ a mbe jôé afe na Niger, a Lusius môte ya Siréne, Manaén nye baa Hérôde Tétrak be nga yeñ aso bongô a Saül.

² Môs éziñ be nga bo ésulane ya kañe Nti a bômbô zaé asu meye'elan. Mfufube Nsisim a nga kobô be na: Jôka'ane me Barnabas baa Saül be bo ésaé me tyi'iya na be bo.

³ Wôna éyoñe be maneya bômbô zaé a ye'elan, a mane beté be mo, ane be nga suu be be ke.

⁴ Eyoñe Mfufube Nsisim a maneya lôme be, ane Barnabas baa Saül be nga siliki a kui Sélesi. Nkôlane ya valé, be nga fubu miel été a ke mfa'a ya Sipre.

⁵ Eyoñe be nga kui Salamine, be nga kañete Ajô Zambe meba me Zambe Beyude été. Yôanes, mvolô wop a nga to fe nsamba wop.

⁶ Eyoñe be maneya lôt ékôte mañ a kui Pafôs, ane be nga tôbane mvimvi'i, *nkulu mejô me ne minsos, mone Beyude, a too jôé na, Bar-Yésus.

⁷ A nga too bebé a njô bôte Sergius Paul, ntyetyeñe môt. A nga bañete Barnabas baa Saül, a liti be beta nkômbane wé ya wô'ô mejô me Zambe.

⁸ Ve mvimvi'i, Elimas, avale jôé dé da tinan, a nga wosane be a jeñe zene ya dutu njô bôte Sergius Paul a bo te buni Mbamba Foé.

⁹ Eyoñe te Saül nge na Paul, njalan a Mfufube Nsisim, a nga beme nye mis asu a jô nye na:

¹⁰ Wo môt ô ne njalan a mefe'e me mvô, mone Satan, nyô a wosane *zôsôô ase a so be Zambe, ntéavé wo ye jô'é vite mezene me Nti me ne *zôsôô'

¹¹ Tame yene wo Nti ô ne be wo. Wo ye bo ndim, te fe yen éfufube jôbe nté éziñ. Eté été, dibi e nga ku nye mis ne viu, a nga tyiñelane kotendo'o a yi nliti *zen.

¹² Eyoñe njô bôt a nga yene jame te, ane a nga buni, amu nye'elane mame ya e be Nti ô nga bi nye *nlem.

Paul a kate Mbamba Foé Antiôche

¹³ Ane Paul baa be nsamba wé be nga kôlô Pafôs a ke Pergé afôla ya Pamfilie. Ane a nga kandane be a bulane Yérusalém.

¹⁴ Ve nkôlane ya Pergé, be nga ke dulu ôsu akekui Antiôche ya Pisidie. E môse Sabat, be nga nyiine *aba Zambe a tabe si.

¹⁵ Mvuse ya nlañane kalate metiñ, a bekulu mejô, bivete ya *aba Zambe bi nga jô be na: A bobejañ, nge mi bili bifia biziñe ya lebe bôt, koba'an.

¹⁶ Eyoñe te Paul a nga tebe tetele a febe bôt a wo a jô na: A mvô'ô Israél a mia bese mia ko Zambe woñ, vô'ôlane ma.

¹⁷ Zambe ya ayoñ dangan Israél, a nga tobe betate bangan. Ane a nga fôlô bôt melu be nga too si ya Ejipte; wôna, a éwôlô ya wo wé, a nga vaa be wé;

¹⁸ bebé mimbu mewôm menyin, a nga ve be bidi e *nkôte si.

¹⁹ Eyoñ a maneya jiane meyoñe zamgbwale ya Kanaan, a nga ve be si jap ane ngap.

²⁰ Jame te ese e nga bobane bebé tañe mimbu ntet a mewôm metan. Mvus éte, a nga telé be betyi'i mejô a kui melu me Samuel *nkulu mejô.

²¹ Ane be nga kômbô a sili njô bôt. Nde ñhe Zambe a nga telé be njô bôt Saül mone kis, môte ya mvô'ô Bényamin, nye ate a nga jôô be mimbu mewôm menyin.

²² Eyoñe be vaaya nye éto, ane Zambe a nga tobe David a bo njô bôte wop. Ajô dé nde a nga kobô avale dina na: Me yeneya môt a funane nleme wom, nyô a ye jalé minkômbane miame mise, a ne jôé na David, mone Yesé.

²³ Mvoñe bôte jé, nje ñhe Zambe, aval ane ngaka'a jé é mbe, a nga bo na Yésus nyii bôt ya Israél a bialé.

²⁴ Eyoñe Yôanes a nga so, a nga taté mane yôtan ajô nduane ya nkôñelane minleme Israél a,

²⁵ éyoñ a sondô'ô ésaé jé, a nga jô na: Mia buni na me ne za? Sake ma me ne nye , ve môt éziñ a zu me mvus, nye a dañe ma, me nji bi nkôñe ya kuli nye, ja'ane minkole ya besilefase bé.

²⁶ A bobejañ, mi kusa bo mvoñe bôt Abraham nge ki ba ba ko Zambe woñ, Mbamba Foé ya nyiane nyô, a nga lômbane be bia.

²⁷ Bôte ya Yérusalém a betebe ôsu bap, be nga bene Yésus, éyoñ be nga tyi'i ajô dé a ve nye mekua. Be mbe te yeme na ba yemete mejô bekulu mejô ba lañe Sabat ase.

²⁸ Ja'ane be nji bi éfia a yiane wu je, ve be nga sili Pilate na a wôé nye.

²⁹ Eyoñ be nga jalé mam mese me mbe ntilan ajô dé, be nga vaa nye élé yôp a jame nye soñ.

³⁰ Ve Zambe a nga wômôlô nye miñwuan.

³¹ Mvus éte a nga yené e be bôte ba be nye be nga bo be kôlô'ô Galilé a ke Yérusalém melu abui. Bôte bete be ne bengaa e mise me bôt.

³² Bia fe bia kate mia Mbamba Foé ate. Ngaka'a é nga kateban e be betate,

³³ Zambe a kômeya tôé je be bia, bone bap, e vôm a nga wômôlô Yésus, aval ane e ne ntilane same baa na: Ô ne mone wom, môse wu, me biaéya wo.

³⁴ E ne aval ane Zambe a nga jô na, a ye wômôlô nye miñwuan. Nde nyôle jé ja ye bo te boé soñ a *zen éziñ, vôm a jô na: Ma ye ve mia mimfufup a benyaa bebela ya be David.

³⁵ Amu ajô te fe, a beta kobô afôla afe na: Wo ye bo te jô'é mfufub wôé ô boé soñ.

³⁶ Ajô te David, éyoñ a maneya bo ésaé ya jalé nkômbane Zambe melu mé, a nga ke ôyo awu. Be nga bôôé nye fefele ya be ésaa bé, a a nga boé e soñ.

³⁷ Ve nyô Zambe a nga wômôlô ñwuan a nji boé soñ.

³⁸ Yemane de a bobejañe na, ma'a amu nye, nde bi bili Mbamba Foé ya njamane mam *abé, a mekabe bi mbe te ngule ya bi me so'o bia e metiñe me Môze.

³⁹ E be nye, mekabe mete ma vebane be môt ase a buni.

⁴⁰ Taba'ane ntyele na ajô bekulu mejô be nga jô e bi mia na:

⁴¹ fomba'an, mia bôte mi ne mbia anyu, woñ ô tame bi mia a jañane bôte mis! Amu ma ye fo'o bo jam nté mi ngenane mi vee, E jame mi nji ye buni nge môt éziñ a too ye kate mia de.

⁴² Eyoñ be nga kui atan, be nga ye'elane Paul baa Barnabas na be beta ba'alane nkobô wop sondô mbok.

⁴³ Eyoñ ékoone bôt é nga tyamelan, beta ngabe ya Beyude a beyé'é be nga ke litane be a, e minlañe miab été, Paul baa Barnabas be nga tindi be be kabetane mvame Zambe.

Paul ba Barnabas ba ke e be bikuu

⁴⁴ E Sabate mbok a nga tôñ, bebé bôt bese ya tison be nga sulan a zu wô'ô Ajô Zambe.

⁴⁵ Eyoñ Beyude be nga yene ajô te, be nga bo zok a wosane mejô me Paul a Barnabas.

⁴⁶ Ane Paul baa Barnabas be nga bo ayo'o ya kpwaane be na: E be mia nye ajô Zambe e nga yiane taté kateban, ve amu mia bene de, a yene miabebien ane ba be nji yiane nyoñe ngab ényiñe ya melu mese, nde bia ke e be meyoñe bikuu.

⁴⁷ Amu dina e ne abendé bi bili e be Nti na: Me nga telé wo ô bo éfufube ya *meyoñ, nde wo ye kee nyian e meku'u ya si.

⁴⁸ Eyoñe meyoñe bikuu me nga wô'ô mejô mete, be nga jaé ne lut a mevak a kañe ajô Nti, a ba bese be mbe ntiñetane ya nyoñ ényiñ be nga buni:

⁴⁹ ajô Nti e nga mialane afôla si te ese.

⁵⁰ Ve Beyude be nga sômôlô biwôlô bi binga bi nga kañe Zambe a benyaa bôtô ya tison. Ane be nga taté kpwe'ele Paul baa Barnabas, a titane be afôla dap.

⁵¹ Eyoñe be nga sase mbuluk mebo map, ane be nga ke Ikône.

⁵² Ve mfa'a beyé'é, be nga li'i, njalan a mevak a Mfufube Nsisim.