Mm 1 - Kalate Zambe Nnomo a Mfefe Mfefé Nkôñelan

Nkeane yôbe Yésus

¹ A Téôfil, e kalate wom ôsusua me nga tili, me nga dañe liti mimboon a miñye'elan mise Yésus a nga bo a ye'ele bôt, aso atata'a,

² akekui *môs a nga nyoñebane yôp, njalane a Mfufube Nsisim, valé a maneya tyeñele beyé'é a nga top.

³ Beyé'é bete mbe ñhe a nga liti émien, mvuse ya mintaé mié a awu dé, a mendem abui, nté ya melu mewôm menyiñ. A nga yené e be be a laane be ajô éjôé Zambe.

⁴ Ezezañe ndian baa be beyé'é, a nga bendé be na: Te kôlane Yérusalém, ve tame yange ngaka'a Nti, nyô me nga kate mia, e ne na:

⁵ Yôanes a nga du fo'o bôt a mendim, ve mia, mia ye duban a Mfufube Nsisim, teke ayab éyoñ mvus éte.

⁶ Nde éyoñ be nga sulane vôme wua, be nga sili nye na: A Nti, ye éyoñ é kpwaneya na ô beta telé éjôé ya ayoñ Israél'

⁷ Ane a nga jô be na: E nji bo ajô denane na, mi yeme biyoñ a zia melu Esaa wom a nga telé a ngule njôane jé.

⁸ Ve mia ye nyoñe ngu éyoñe Mfufube Nsisim a ye zu be mia. Mvus éte, mia ye bo bengaa bam, ataté Yérusalém, Yudé ase a Samari, akekui meku'u mese ya *si nyô.

⁹ Mvuse ya mejô mete, e mise map été, ane a nga betebane e yôp, nsume *nkut ô nga solé nye mise map été.

¹⁰ Be ngenane be fombô'ô yôp mfa'a a nga ke, a teme na bôt bebaé, be be'e bifumulu mengômesan, be ntele be fefe,

¹¹ a jô be na: A bôte ya Galilé, amu jé mia langane va, mi fombô'ô yôp? Yésus ba te nyoñe mia yôbe nyô, a ye beta so, avale mia te yen a kelek.

¹² Nkôlane ya nkôle ba loone jôé na, Nkôle beôlivié, ane be nga bulane Yérusalém. Nkôle te ô ne nté ane môt a wulu môse Sabat

¹³ Eyoñ be bulaneya, be nga ke étune *nda ya yôp, vôm ate, mfulane minlem, be nga bo meye'elan. Be mbe na: Pierre, Yôanes, Yakob a André, Filip a Tômas, Bartélémi a Metias, Yakob mone Alfé, Simon a mbe jôé afe na Zélôte a Yude mone Yakob.

¹⁴ Binga b'éziñ aval ane Marie, nyia Yésus, a bobenyañe be Yésus, be nga to fufulu a beyé'é.

Metias a nyoñ éto Yudas

¹⁵ Melu mete Pierre a nga tebe tetele e zañe bobenyañ. Be mbe nsulane valé, bebé bôt ntet a mewôm mebaé. Ane a nga yôtan a jô na:

¹⁶ A bobejañ, e jame Mfufube Nsisim a nga kat e kalate Zambe été anyu David, e nga yiane tôéban, ajô Yudas, nye a nga su'ulane bo nliti *zen ya bôt be nga bi Yésus.

¹⁷ A nga lañeban ane wua ya be bia, ane a nga nyoñe ngabe jé ya ésaé jangan.

¹⁸ Nde môt ate a nga kus éfuse si a ma'ane ya *abé dé. A nga ku si bubutu, ane abum e nga tui, *miñya mise mi jô'ô atan.

¹⁹ Bôte bese ya Yérusalém be nga wô? ajô te. A si éte é nga lobane nkobô wobe na: Hakeldéma, e ne na, si metyi.

²⁰ Ajô te nde e ne ntilan kalate besame été na: Nda jé é bo'o éfut, môt éziñ a bo'o te tabe été, a na môte mfe a nyoñ ésaé jé.

²¹ Bôt bese be nga litane bia melu mese Nti Yésus a nga wulu bia,

²² ataté nduane Yôanes, akekui a nga nyoñebane yôp, wua ya be be a yiane lañeban e nsamba bengaa ya ñwômane wé.

²³ A be nga liti bôte bebaé ônyu, Yôsep, be nga loone na Barsabas, a jôé mebatan na Yustus a Metias.

²⁴ Nde be nga bo meye'elan ma: wo, a Nti, wo yem minlem ya bôte bese, litii wua ya bôt ba bebaé, *mbé ô tobeya na

²⁵ a nyoñ ésaé Yudas a nga jô'é aval ane *nlôman, mfa'a ya ke vôm a ye nyoñ ane ngap.

²⁶ Ane be nga bo *asimba. Ane *asimba e nga tobe Metias nye ate, ataté éyoñe te, a nga jalé tañe minlôman awôm a mibaé ya mi nga li'i awôm a wua.