MINYÔN 5 - Kalate Zambe Nnomo a Mfefe Mfefé Nkôñelan

Bula'ane bia be wo a Nti

¹ A Nti ô simesa'ane jam e kuiya be bia fombô'ô a yen ane ba taa bia.

² Akume dangan da dañ étyi e keya be bôte befe, menda mangan ki e be bikuu

³ bi ntoo bobenyui te k'ésaa benyia bangane ki ane minkus.

⁴ Bia nyu mendime ya menjeñe mangan ve taté ve moné, bia kuse fe nja'a jangan.

⁵ Bi be'e bôte ba tibili bia mvus; bi te'eya, bi nji bi awo'on.

⁶ Bi sameya mo Ejipte a Asiri na bi bi bidi abime ya di a jaé.

⁷ B'ésaa bangan be nga bo abé ve be nji fe bo, a bia bi be'e mbe'e ya bikobe biap.

⁸ Alo da jôô bia a teke môt a vaa bia e mo map.

⁹ Bia juu ényiñe jangan asu ya bi bidi, nkpwaté mekône ya fé ô too bia ôsu.

¹⁰ Ekôbe jangan ja bili ayôñ ane mbuñ ba yame bidi amu bindeñela'a ya zaé.

¹¹ Be nga jô'ôbô binga e Siôn a ngu, a bindune bengon e bitisone ya Yuda.

¹² Mo mab me nga tyelé bivete yôp. Be nji semé bemvendé.

¹³ Bendôman be nga be'e ako'o ba ko'o bidi bobefam be nga kolé ôbak amu adite bibañ bi nja'a.

¹⁴ Bemvendé be bôt be nji fe beta tabe Bimo'o a bendôman be jô'éya nyiane bia.

¹⁵ Ava'a ya minleme miangan e maneya, mebô'ô mangan me veñesaneya du.

¹⁶ Ekate duma ya nlô wongan é kuya! Ngo'o bia amu bi boya *abé!

¹⁷ Tame yen amu jé minleme miangan mia kon, tame yen amu jé mise mangan ma bo ndim,

¹⁸ amu nkôle Sioñ ô ntoo bilik, a amu na bemvak mbe be nga wulu été.

¹⁹ Ve wo Nti ô ne njô bôt nnôm éto, wo jôô a kui miaé mi bôte mise.

²⁰ Amu jé ô ne vuane bia nnôm éto, ye ô ne vuane bia ngume nté ényiñe wongan ôse'

²¹ A Nti bo'o bia na bi bulane be wo, a bia ye fo'o bulan. Beta'a bo melu mangan mimfefé aval ane melu mvus!

²² Ye e ne bo na ô wuaya fo'o bia fé, ye ô wô'ôya bia abé a dañe nné'