MINYÔN 3 - Kalate Zambe Nnomo a Mfefe Mfefé Nkôñelan

Mintaé a mvolane nlem

¹ Me ne môt a nga tôban ôsame e ntume y'ayaa dé si.

² A wuluya ma a kee ma e dibi été ve sa éfufup.

³ Môs ôse, a kôñelane me wo wé e ngame yat biyoñ biyoñ.

⁴ A boya minsône miam a ékôbe jame na bi yômbô; a bu'uya bivese biam.

⁵ A bômaneya ma mfin ôlun a minjuk

⁶ a bo me na me tabe dibi été ane ba be wuya a ayap.

⁷ A feteya m'ézezañe mimfin me bo te kui atan; a boya na adite bengôkob e tibi me yôp.

⁸ Me ju'uya loon a sili mvolan ve a dibe meye'elane mam *zen ése.

⁹ A dibeya zene jam a *mekok me n'anen, a boya mezene mam ékotekot.

¹⁰ A yenéya be ma ane urs a yabe, ane ngbwengbwem é solô.

¹¹ A boya ényiñe jam ayaé, a nyôle jame ki te k'afô'ôsan, me kate'e kuli *tyiñ.

¹² A koléya *élaé jé a telé ma ane jôm akoñ *élaé dé da sôñ.

¹³ A maneya me lume mekoñ m'élaé mé mese abum.

¹⁴ Bôt bame bese ba woé ma, *môs ôse ma me ntoo be jia.

¹⁵ A jaléya abume dam a bilo'o bi n'ayô a nyuuya ma ôvuta.

¹⁶ A boya na mesôñ me bu'i ma e mekok a viseya ma asub été.

¹⁷ Ô wuaya ma me ke *mvo'é ôyap me vuaneya jôm ba loone mba ényiñ.

¹⁸ A me jôya na: Ndi nleme jam é maneya, ndi jam ya be Nti.

Mvame Zambe é ngenan

¹⁹ Nsimesane ma simesan ôsame wom a ndeñendeñe ya ényiñe jam bi ne ma ovuta a nsu.

²⁰ Nleme wom wo simesan mam mete a ô te'eya ma abum été.

²¹ Jam ma zu simesan e nleme wom été a me too de ndi nde di na:

²² Mvame Zambe é ngenane te man, a nkoon éngôngole wé ô ngenane te kui akuk.

²³ Bia bobane mimfefé metyé mese. Nye'ane wé ô n'anen!

²⁴ Nleme wom wo jô na: Nti a ne ngabe jam, ajô te ma ye tabe nye ndi.

²⁵ Nti a bo ba be too nye ndi mvaé, nalé fe ba ba jeñe nye.

²⁶ E ne mvaé ya yange nyiane Nti ô too évô.

²⁷ E ne mvaé na môt a jibi minjuk éyoñ a ngenan ésoé,

²⁸ a kele tab'étam anyu e dii éyoñe Nti a ve'ele nye,

²⁹ a vitibi'i, anyu e butu e mbulu'u été, ndi é too na: Nti Emien a ye volô!

³⁰ A ke'e nyô a bibi nye amañ, a a kañese'e nyu meta!

³¹ Amu Nti a nji bo nyô a wua bôte fé nnôm éto;

³² amu na akôsa yaa, ve *nlem avôle ya tek amu mvame jé é n'anen;

³³ amu a nji vañe samele nge ve bone be bôt ôlune *nlem.

³⁴ Eyoñe ba tibi mimbô'ô mise ya ngume si e mebo si

³⁵ éyoñe ba vôône môt jame da yiane nye asu Nyô a dañ nkôñ yôp,

³⁶ éyoñe ba vañe kpwéé môt ajô, ye Nti a ne te yen'

³⁷ Za a ne Nyô a nga jô, nalé ve boban' Ye Nti a nji bo nyô a jôô'

³⁸ Ye *abé a mvaé bi nji so anyu be nyô a dañ nkôñ yôp'

³⁹ Vevea môt a yiane wô'ôlun amu jé' Môt ase a yiane wô'ôlune y'abé dé.

⁴⁰ Mfomba'ane mezene mangan a fase me, a mbula'ane be Nti.

⁴¹ Mbeta'ane minleme miangan avale fe ane mo mangan e be Zambe a ne yôp:

⁴² Biabebien bi nga bo melo a bene metiñe môé wo Nti, ô nji ke jamé!

⁴³ Ô nga feteban ayaa dôé été a tôñe bia, a wôé bia éngôngole momo;

⁴⁴ ô nga sobô minkute yate na meye'elane mangan me bo te kui be wo.

⁴⁵ Ô nga bo bia biôm bi ne nyé, mbuan e zañe *meyoñ me bôte mevok.

⁴⁶ Besiñe bangane bese ba diine bia anyu nyô.

⁴⁷ Woñ a ébé, ntyaman a éndaman bi kuiya be bia.

⁴⁸ Atôñe milik da lene me mis amu beta nju'u a kuiya be bôte bam.

A Nti volô'ô ma

⁴⁹ Mise mam ma kui milik teke tebe amu awo'one momo,

⁵⁰ akekui Nti a ye vitibi na a yen;

⁵¹ mis ma taé ma éyoñe amu ajô bengone ya tisone jam.

⁵² Ba be ne besiñe bam te k'étom, ba jeñe ma an'ônon.

⁵³ Ba jian ényiñe jam ébé be titiya m'ako'o nlô

⁵⁴ mendim me yandaneya ma nlô; nde ma jô na: Me jañeya!

⁵⁵ A Nti, me looneya jôé dôé me too bido'o y'ébé si;

⁵⁶ ô wô'ôya tyiñe jam, te dibe melo môé éyoñ ma veb'abuk a loone wo na ô volô ma!

⁵⁷ E môse me nga loone wo, ô nga subu ma bebé a jô na: Te ko woñ!

⁵⁸ Ô suñeya ajô dam a Nti, ô kôtéya ényiñe jam.

⁵⁹ A Nti ô yeneya ane ba fite ma; tame tyi'i ajô ya *zôsôô wom.

⁶⁰ Ô lôô akuna'a dab ese a mulu me njoñe mab ya wosane ma.

⁶¹ A Nti wo wô'ô metaa map a ô lôô mulu me njoñe mabe ya ke ma e ngame yat.

⁶² Minkobô a asimesane ya besiñe bam bi ne me ngame yat môse mise.

⁶³ Ô lôô na: To'o be too si nge tebe tetele, ma me ntoo jia y'anyu dap.

⁶⁴ A Nti, wo ye ya'ane be aval ane mimboone miab mi né.

⁶⁵ Wo ye bo be minlem ayet, biyo'é biôé bi kele be be!

⁶⁶ Wo ye tôñesane be ayaa dôé été a jiane be e yôbe Nti si.