MINYÔN 2 - Kalate Zambe Nnomo a Mfefe Mfefé Nkôñelan

Nti a ne Yérusalém e ngame yat

¹ Jia! Nti, ayaa dé été, a futiya Yérusalém e minkute si étôto'o y'Israél, a sô'ôlôya je é so'o yôb a kui si! E môse y'ayaa dé a nji ke fe simesan ételé mebo jé.

² Nti a maneya mine bitaba'a bi Yakob bise te k'éngôngo; ayaa dé été, a maneya tyam bitison bi'alem ya Yuda, a maneya wua bie si; a sameleya si a bejôô y'été.

³ E beta ayaa wé été, a maneya bu'u ngul ése y'Israél; a bulaneya mbo nnôme wé mvus besiñ be too jam a boya Yakob da funane nduan ja yôñ a di'i mimfa'a mise.

⁴ A koléya *élaé jé ane nsiñ, mbo nnôme wé ki nkômesane ya limiti je ane nyô a ne ngame yat, a maneya wôé jôm ése mis me mbe me yene mvaé, ayaa dé e kalaneya e *nda Zambe ya Yérusalém ane nduan.

⁵ Nti a ntoo fo'o v'ane nsiñ; a mineya Israél; a mineya fe menda bejô bôte mé, a maneya tyame bitisone bi'aleme bié, du a miñyôn a jaléya bie e be ngone ya Yuda été.

⁶ A maneya bu'u aka'a dé aval'ane di y'afup. A maneya tyame vôm a mbe a tôba'ane bia Nti a boya na bôt be vuan beta ésulan a Sabat e Siôn; e ngul y'ayaa dé été, a sameleya njô bôt a betuni.

⁷ Nti a beneya ata'a metuna'a dé a yene vôme wé a n'étyi nyé. A kalaneya mimfine menda bejô bôte ya Siôn e mo besiñ, zô'é é bobaneya e *nda Nti aval'ane *môs abôk.

⁸ Nti a tyi'iya na a tyam aka'a meko'o ya Yérusalém a limiya nko, a se nguleya bulane wo mvus te na a mane mine be; akak a mfin bi ne ôlun été, jina a ji vok bi ntoo ntyaman.

⁹ Mimbé mié mi maneya nyiine si été, a maneya tyame bie a té mengôñ. Njô bôte wé ba be bivete bié be ne *mmialan e *meyoñ été; metiñ me nji fe bo. To'o na bekulu mejô bé fe teke fe yene mam me too nlitane Nti.

¹⁰ Bemvendé ya Yérusalém be too si, teke kobô; be maneya kute mbuluk e minlô miap, be maneya jaé minkuta; bengo be binga ya Yérusalém ba luu minlô mfa'a ya si.

¹¹ Mise mam me jaéya a milik *miñya mia bo'o m'abum zôñ é tuiya ma amu mbia jam a kuiya be ngone y'ayoñe dam, amu *bon a benyañebéé ba wu évé e mevôme ya tison me ne ndam

¹² ba jô benyia na: Fôn a woon bi ne vé' A ba wu ane bôt be ne mbalane meveñ e mevôme ya tison me ne ndam, be nga jii e mebé benyia.

¹³ Ma ye beta jô wo aya' Asu dam za a ne ve'ane wo, a me ne volô wo *nlem aya a Yérusalém' Amu nju'u wôé ô n'anen fo'o v'ane mañ: Za a ne nguleya bo wo *mvo'é'

¹⁴ Minyenane bekulu mejô bôé be nga yen asu dôé mi mbe momo a minsos be nji ke kulan ékobe jôé a bo wo na ô sa'ale minkôm; foé jap, asu dôé, é mbe ve minsos a medu'an,

¹⁵ ba bese ba lôte va ba kute wo mefas, ba loñe vioñ a me'ete nlô ya tebe ngone ya Yérusalém e ngame yat. Ye tison be mbe be lo'one na: Ntut abeñ, meva'a ya si ése, nje fo'o nyô'

¹⁶ Besiñe bôé bese ba dii wo menyu nyô, ba loñe vioñ a latane mesôñ, ba jô na: Bi maneya mine nye! E *môs bi mbe bi yange'e ñwô wu, bi kuiya wô, bi lôô wô!

¹⁷ Nti a tôéya jam a nga tyik, a boya mejô a nga nyoñe ntyi'an mimbu ya mvus. A tyameya te k'éngôngo; a boya wo ava'a besiñ, a beteya ngule ya besiñe bôé yôp.

¹⁸ Nleme wob wo yône be Nti. A aka'a ya ngone Siôn, jôké'é mili'i môé me lôt an'ôtôñe mendim! Te ve womien awo'on, a nyia dise wôé a bo'o te wo'on.

¹⁹ Te tab'évô, awolo an'awolo, ve jalé ngum alu a miñyône miôé. Sô'é e mam mese me ne wo nlem ane mendim asu Nti. Same mo môé yôbe be nye amu ajô ényiñe ya bitume bi bone biôé, mbie bia ku some zaé e mefefele minjoñ mese.

²⁰ A Nti fombô'ô a yen za nye wo bo avale mboone di. Ye binga be ne kui vôme ya di e bone be nga biaé a nyeñele' Ye be ne nguleya wôé betuni a bekulu mejô ja'ane vôme wôé a n'étyi'

²¹ Bisoé a minnôm ba bôbôane si; bengo be binga bam a bendômane bam ba ku mimbim a nkpwaté mekôn; wo jian e môse y'ayaa dôé, wo tyi'i *tyiñ te k'éngôngo.

²² O maneya bañete bikowoñ besiñe biam aval ane *môs abôk. E *môs ayaa dôé da tôtan, teke môt a fam nge nyiñ, a Nti! Bone me nga yale a nyeñele besiñe bam be maneya wôé be.