MINKANA 9 - Kalate Zambe Nnomo a Mfefe Mfefé Nkôñelan

Fek a akute mboon

¹ Fek é maneya lôñe *nda jé, é maneya ba e beta mekône mé zamgbwa,

² é maneya tyi'i betite bé *tyiñ, a bundane woone wé, a kôme tawôlô wé:

³ é maneya lôme bebo bisaé be binga bé, ja yôtan e mevôme ya tison ma dañe mbetane yôp:

⁴ môt ase a n'akut a tame yale nné! Ja jô môt ase a ne fe'e momo na:

⁵ za'an mi di e belet jam a nyu woon me maneya kôm;

⁶ jôka'an mboone mame ya te fek éyoñe te mia ye nyiñ! Nalé fe na wula'an e zene ñyemane mam.

⁷ Môt a lebe môt *a nye'e a kpwe'ele bôte bevok a dutu ébiasé e be émien, a nyô a komekane mbo *abé, meveñ mme a ye nyoñ ane ma'an.

⁸ Te lebe nkpwe'ele bôt a za vini wo ve lebe mfefek, wôna a ye nye'e wo.

⁹ Va'a mfefe'e môte biôm, wôna a ye bulu bo fek; va'a zôsôa môt ñyeman, wôna a ye kô'ôlane ñyemane wé.

¹⁰ Nkoone Zambe woñ ñwô ô ne atata'a tine ya ñyemane mam; a ñyemane mame bezôsôô be bôt ô ne mbamba ñwô'ane mam.

¹¹ Amu na melu môé ma ye bo abui v'amu ma, a mimbu y'ényiñe jôé fe mia ye bo abui v'amu ma.

¹² Nge ô ne mfefek, ô ne je asu dôé womien; nge ô ne môta bisô ajô dôé ñhe le.

Akute mboone mam

¹³ Akute minga e ne zô'é nkobô, fe'e momo a te yeme jôm.

¹⁴ Da tabe anyiine ya *nda jé, éto éziñe yôp, e mevôme ya tison me ne mbetane yôp,

¹⁵ a yôtan e be bôt ba lôtan be tôñe zene jabe *zôsôô ne tiññ na:

¹⁶ môt ase a n'akut a za'a va! E be môt a ne fe'e momo a jô na:

¹⁷ mendim ba te wup me ne évôvoé, a e belet ba te solé é ne mvaé!

¹⁸ Ve môt ate a nji yeme na miñwuan mi ne vôm ate, a na bôt bese minga ate a loon, be ne mimbi'ili mi vôme ya miñwuan.