MINKANA 7 - Kalate Zambe Nnomo a Mfefe Mfefé Nkôñelan

Minga * mejian a won ésoé ndôman

¹ A mone wom, ba'ale'e mejô mam a te vuane minjôane miam.

² Ba'ale'e mebendé mam, nalé ate wo ye nyiñ, a ba'ale'e miñye'elane miam aval'ane benyia ya mise môé.

³ Tiñeti'i mie anyu dôé ya mo, tili'i mie e ako'o ya nleme wôé.

⁴ Jô'ô fe'e na ô ne kale jam! A loone ñyemane na e mvôé jam,

⁵ éyoñe te bia ye ba'ale wo e b'éza minga e be minga bikuu a bikôkone bié.

⁶ Me nga too e vundu ya *nda jam me fombô'ô atan

⁷ nde me nga yen ézezañe ya mekute bisoé bendôman été, jia é too fo'o teke fek

⁸ ésoé ndômane te é mbe é lôtô'ô e njoñ, bebé e vôme minga éziñ a mbe a too,

⁹ jame di e nga boban éyoñe *môs wo ndeñ, éyoñ alu e nga subu a dibi e nga taté vin.

¹⁰ A teme na minga éziñ a nga zu tôbane nye, a be'e mengômesan ane minga bijabô, mvô é too fe nye njalane *nlem,

¹¹ minga a too ayok a ôsone momo be nye, dulu mebo, te tabe si e *nda jé,

¹² ana'ana e njoñ, ana'ana e minseñ, ésaé é too ve na a ke a yabe befam e mevôm mese.

¹³ Nd'a nga bi ndômane nyô a wubane je ve jô nye a ayas ése na:

¹⁴ me nga bili mvôla mveane metuna'a ya nlatane ngbwa, den me tôéya mintiñetane miam,

¹⁵ ajô te ma te zu ôsu viôé na me jeñe wo, a me yeneya wo,

¹⁶ me maneya kôm énoñe jam a mimfinga, a bindelé bi ne ntiñan a minsinga mia so Ejipte;

¹⁷ me maneya sôé beôlobinda e vôm ma bômbô: mir, Aloés a Sinamôm.

¹⁸ Za'ak bi tame jaé nye'esane ngum alu a kui tyé, bi bu'ubane mvaé nye'ane wo ve.

¹⁹ Amu nnôme wom a nji ke bo e *nda, a keya dulu e n'ôyap;

²⁰ a nga ke fe mfe'e moné. A ye beta kui *nda ve môse ngon ja ye bo abôm.

²¹ Nd'a nga tindi nye na a kañese a atyeñe mboone mame biwono'o dé, a nga dutu nye a évievion atyeñe ya biyaé bié.

²² Eté été, ndôman éte ve zu tôñe nye ane nnôm nyak a ke vôm ba tyi'i benyak, an'akut ba ka'a ngata'a na ba zu ve de *melep,

²³ akekui akoñ *élaé e tulaneya nye ések, aval ane ônon wo ke avô e vôm avot e né, ô too te yeme na ajô y'ényiñe jé nde le;

²⁴ ajô te éyoñe ji vô'ôla'ane ma a bone bam a ke'ane melo e mejô y'anyu dam.

²⁵ Nleme wôé ô bo'o te du'ubane na ô tôñ avale minga te, te jañ e mezene mé été,

²⁶ amu a kpwéya bôt abui, ba bese a nga wôé be mbe beta mingungu.

²⁷ Nda jé é ne fo'o ve *zen ja kee bôt e vôme ya miñwuan, e zene ja siliki e bitaba'a y'awu.