MINKANA 6 - Kalate Zambe Nnomo a Mfefe Mfefé Nkôñelan

Melep mevale meva

¹ A mone wom nge wo kañese ya'ane memvôla, me môte mia nye mi too, nge ô veya womien asu môte mfe,

² nge ô maneya tiñeti womiene ngata'a a mejô y'anyu dôé, nge ô biliya a nkobô y'anyu dôé,

³ Bo'ok avale di, a mone wom na ô nyii womien: amu ô maneya ku e mo me ébemôtô te kele le kute meboñe si a ndeñele ébemôte wôé;

⁴ te beté ôyo dis nge ve biyakolô biôé awo'on.

⁵ Nyi'i womien ane nkok e mo me suteman, an'ônon e mo me nlam anon.

⁶ A nleles, kele be suluk; fombô'ô mezene mé a wo ye bi fek;

⁷ é nji bi nteb'ôsu ya mewosan, nge mone bezimbi a bili beta mebak nge bekôndé, nge njôô;

⁸ ja kômesane bidi bié a ésep, ja naane jôme ya di éyoñe ya nkôane bidi.

⁹ A nleles, wo ye bômbô si a kui éyoñ évé' Wo ye kôlô si ya ôyo viôé éyoñ évé'

¹⁰ Mon ôyo tyôtyoé, mone ñyaane ndaya mone mba'ane mo ô bôô si.

¹¹ Eyoñe te ñhe azoé da ye dilane wo ane môt a so atemetem, a ôsame ane môt a bo bita éyoñ ése.

Akute môt

¹² Nyô a ne zezé jôm a ne e môt a n'ékotekot; a wulu minsos anyu ne lut;

¹³ a nyete mis, a kobô'ô a mebo, a bo mendem a anyu ya mo;

¹⁴ ékotekot é ne nye *nlem, *a simesan abé éyoñ ése, a tya'a mintañete.

¹⁵ Ajô te a ye kui ôsame atemetem; a ye bu'uban éyoñ jijia teke biañ.

¹⁶ Zambe a vini mam mesaman, yaa me ne zamgbwa a dañe wô'angôndô ya *abé:

¹⁷ e mise me ne bives, Ôyem wo du'u bôt e mo ma kulu metyi me ne te bijô

¹⁸ e nleme wo bindi bikotekote bi mam mebo ma mate mbil ya bo *abé,

¹⁹ ékotekote ngaa ja laane minsos nyô a miase mintañete e zañe bobenyañ.

E minga a wone bôt

²⁰ A mone wom, ba'ale'e mebendé m'ésoo, a te ben ñye'elane nyua;

²¹ ka'a bie e nleme wôé éyoñ ése, a tiñeti bie e tyiñe jôé.

²² Bia ye liti wo *zen e dulu dôé, bia ye ba'ale wo énoñe jôé, a bia ye kobô wo éyoñ wo vee ôyo.

²³ Amu abendé e ne lambe, nye'elane ki éfufup, a minkomekan mia ve ñye'elan, mi ne zene y'ényiñ;

²⁴ bia ye ba'ale wo be mbia minga, a e be évôvoé ôyeme biwono'o ya éza minga;

²⁵ te nyamete abeñ dé e nleme wôé été, a te bili ôlam ya biyakolô bié.

²⁶ Amu minga ébamba a yene mvaé a éfuse belet, ve éza minga *mejian a lam ényiñ môt é n'édima.

²⁷ Ye môt a ne kôbane nduan e be émien te na mengômesane mé ma kalane nduan a dik'

²⁸ Ye môt a ne wulu e ma'a me nduane yôp, te na mebo mé ma dik'

²⁹ Avale te fe da kui e be môt a ke e be minga ébe môtô; môt ase a nambe nye a ye nyoñe *melep.

³⁰ Be ne te bisaé ñwuwube wo wup mfa'a ya volô ndo'o jé éyoñ wo wô'ô zaé;

³¹ V'éyoñ be dilaneya wô, wo ye ya'ane jôme jia biôme mewôme zamgbwa, a ye ve akum ese a bili e *nda jé.

³² Ve môt a bo *mejian a minga, a ne fe'e momo, môt a kômbô jañele ényiñe jé nye a bo avale te;

³³ a ye bi ve meveñ a ôsame, a ôsone wé wo ye bo te man.

³⁴ Amu zes ja bo fam é yaa ane tit, e môse y'akuna'a é ne te k'éngôngo;

³⁵ é ne te bisi ntañ *mejian, a é nji kañese to'o na wo ve nye biôm abui.