MINKANA 5 - Kalate Zambe Nnomo a Mfefe Mfefé Nkôñelan

Mebôbela'a me ne abé

¹ A mone wom, tuka'a vô'ôlô fe'e jam ke'e alo dôé e ñyemane wom,

² nalé wo ye ba'ale mbamba mfasane mam a nalé ate biyaé biôé bia ye ba'ale ñyemane mam.

³ Amu biyaé bi éza minga bia lene wôé, a nkobô wé ô n'évôvoé a dañe mbon;

⁴ v'asu'ulan, nkobô te ô n'ayô aval'an'ôvuta, ô too f'akab ane nkpwaté mekôn ô bili meyo mebaé.

⁵ Mebo mé ma lumbu awu; medaa mebo mé ki ma kui e vôme ya miñwuan.

⁶ A ne teke tôñe zene y'ényiñ, mezene mé ma jañ émiene teke yeme nalé;

⁷ ajô te vô'ôla'an ma éyoñe ji a bone bam, a te mia li'i *minkobô y'anyu dam.

⁸ Tindi'i nye ôyab e zene jôé, a te subu *mbé ya *nda jé bebé.

⁹ Ô za kuane duma dôé e be bôte befe a kuane mimbu miôé e be njenjete môt.

¹⁰ Bikuu bi za jalé mebum a mefo'o môé a ébuma ya nju'u wôé ô za jaé éza nda;

¹¹ ô za viane su'ulane tat abui éyoñe nyôle jôé a minsône miôé bia ye mane tek.

¹² Ô su'ulane viane jô na: amu jé me nga vini nye'ane avale di, a amu jé nleme wom ô nga vini *melep'

¹³ Amu jé me nga bo te vô'ôlô tyiñe beye'ele bam, a bo te kee alo dam e be ba be mbe be lebe ma'

¹⁴ Tame ñhe yen me ntele vôm ma silibane si a me nto bebé nkôlan e vôme bôte bese ba nyiñ.

Nyeke'e minga ya éyoñe ndômane jôé

¹⁵ Tame nyu mendime y'anjeñe dôé, ma ma kui anjeñe womien ô nga fak.

¹⁶ Ye menjeñe mendime môé ma yiane mialane mendim atan, ye atôñe mendime dôé da yiane lôt e minjoñ'

¹⁷ Ba yiane fo'o v'asu dôé étam, sa na mia be bikuu mi kabane be.

¹⁸ Ebotan a anjeñe mendime dôé, a minga ô nga luk ô too ésoé ndôman a bo'o jôme y'ava'a dôé;

¹⁹ a bo'o ngal émvule ya nye'an; a ngal nkok a ne njalan a mvam; nye'ane wé ô bii wo éyoñ ése ane bilam a nye'ane te ô bii wo nkôm.

²⁰ Ajô te, a mone wom, amu jé wo ye nye'e éza minga, a latane tôé ya be nneña minga'

²¹ Amu mezene me môt me bôô Zambe ôsu, a nye a tyee mimfaka mié mise.

²² Mbia môt a biliya e bikobe bié émien été, mengata'a y'abé dé me ka'aya nye.

²³ A ye wu amu ayé'é momo, a ye jañ amu abui akute mboone mame dé.