MINKANA 31 - Kalate Zambe Nnomo a Mfefe Mfefé Nkôñelan

Melep ma yiane Njô Bôt

¹ Melep me Lemuél njô bôte ya Masa a nga nyoñe be nyia wé.

² Ma ye jô wo aya a mone wom' Ma ye jô wo aya a mone y'abume dam' Ma ye jô wo aya a mone ya mintiñetane miam'

³ Te kuane ngule jôé e be binga, a mezene môé e be ba ba jañele bejô bôt.

⁴ Jame te e nji bo di bejôô, a Lemuél, e nji bo di bejôô bôte na be nyu woon nge di bone bejô bôte na be jeñe binyunyui bi ne ngu.

⁵ Be za vuane metiñ nge be mane nyu, a bo te tyi'i ajô bingôngole bi bôt *zôsôô.

⁶ Va'ane nyô a ntoo bebé ya wu binyunyui bi ne ngu, a woon e be nyô a bili ôlune *nlem.

⁷ A nya'ak a vuan azoé dé, éyoñe te a ye bo te beta simesane nju'u wé.

⁸ Ku'i anyu dôé asu mvumvuk, asu ajô ya ba bese be li'iya éto éngôngo.

⁹ Ku'i anyu dôé, tyi'i mejô *zôsôô, kama'an ajô éngôngole môt a ajô *nzôzoé.

Minga a n'édima

¹⁰ Za a ne yene minga a yian' Tañe jé ja dañe nyô meko'o me n'édima beta ndañan:

¹¹ nleme nnôm ô too nye ndi, a nseñge wo ye bo te jemban,

¹² e melu mese y'ényiñe jé. A bo nnôme mvaé sa *abé.

¹³ A jeñe mimvote betit a sut a tiñe biyé a mevak.

¹⁴ A funane sitima a litan akum a soo bidi ôyap,

¹⁵ a kôlô si dibi e ngenan, a ve bôte ya *nda jé bidi, a kabe bebo bisaé be binga bé bisaé,

¹⁶ a fas ajô ya afub éziñ a kuse de; a bé afube mindik a ma'ane y'ésaé jé.

¹⁷ A tiñeti ngu angeteñ dé ane kandé, a a ve mo mé ngu.

¹⁸ A wô'ôtane na ma'ane mé me ne mvaé; lambe wé a ne te dim a alu.

¹⁹ A nyoñ ôlé ba diñe minsiñga ya tiñe biôm a anyu dé da bi mbôbé minsinga.

²⁰ A kui mo mé asu éngôngole môt, a ve *nzôzoé biôm.

²¹ A nji ko avebe woñ asu *nda jé, amu bôte ya *nda jé ése be be'e ngômesan é n'ayôñ.

²² A tiñ mimfinga, a bili mengômesan me n'éfumulu abui a évele.

²³ Nnôm a bili ésemé e mimbé y'akak éyoñe ba bemvendé ya nlam be too vôm ba kobô mejô.

²⁴ A loé be mengômesan a kuane me, a kôme bekandé a ve bekuan abom ba bo makit;

²⁵ ngu a éjijin bi ne nye ngômesan; a simesane mam y'akiti a vioé ôse anyu.

²⁶ A kui anyu a fek, ôyeme wé wo ye'ele a évôvoé ése.

²⁷ A tu'a fombô ane mame ya *nda jé ma wulu, a ne te di bidi bi éles.

²⁸ Bone bé ba kôlô si a jô nye na a n'ébotan; nnôme wé fe a kôlô si a se'e nye na:

²⁹ abui bengon be binga e too mbamba ntaban, ve wo wo dañe bese.

³⁰ Ejijin ja *duk, abeñ ki momo jôm; ve minga a ko Zambe woñ nye ba ye sek.

³¹ Va'ane nye ma'ane ya ésaé jé, a e mimbé akak, mimboone mié mia yiane ve nye duma.