MINKANA 30 - Kalate Zambe Nnomo a Mfefe Mfefé Nkôñelan

Mejô m'Agur

¹ Mejô m'Agur, e mone Yaké. Mejô me môt ate asu Itiél, asu Itiél a Ukal.

² E ne bebela na ma me ne tit a dañe môte mfe ase, a fe'e môt ja jeñebane be ma;

³ me nji ke yé'é fek a me nji yeme mam ma fombô Zambe.

⁴ Za a nga bete yôp nge so wé' Za a nga bi évuñulu e menyi'i me mo mé été' Za a nga late mendim e ngômesan éziñ été' Za a nga telé minné mise ya si' Jôé dé e ne za a jôé mone wé ke za, nalé wo ye yeme de'

⁵ Ajô Zambe ese e ne mve'elan. Emien a n'ében asu ba ba sobô be nye.

⁶ Te beté jôm éziñ e mejô mé, a za komekane wo a ô za yené nlaa minsos.

⁷ Ma sili wo mam mebaé: te bene ma me, nté me ngenane te wu!

⁸ Bo'o na medu'an a nkobô minsos bi ke ma ôyap; me nji kômbô bo azoé nge kum va'a ma ve bidi bia yiane ma.

⁹ Me za kate wo éyoñ abum é ntoo ma nlem; a me za jô na: Za a ne Zambe' Nge wup éyoñ azoé e biya ma. A ndamane jôé Zambe wom.

¹⁰ Te bôte mbo ésaé mejô e be masa wé, a za yo'é wo a ô za be'e mekua.

¹¹ Bôte b'éziñ ba yo'é b'ésaa, be too fe teke botane benyia.

¹² Bôte b'éziñ ba buni fe na be ne *mfuban e mise mabe bebien, be too fe teke kômbô sôbe bebien e mvine mboone jap été.

¹³ Bôte b'éziñ be bili mise m'ébiasé, be bete'e bivula biabe yôp.

¹⁴ Mesôñ me bôte b'éziñ me ne minkpwaté mekôn, a minkeke'e miap mi too atyeñ, asu ya min a bo na bingôngole bi bôt bi jañ e *si nyô été, a bo fe na minzôzoé mi jañ e bôt été.

¹⁵ Môt a vi'i bôte bevok a bili bengon bebaé: va'ak! Va'ak! Biôm bilaa bi ne te jaé, yaa binyin bi ne te jô na: Abime te da yian!

¹⁶ Vôma miñwuan, nkôkôme minga, si teke jaé mendim a nduan é ne teke ve'ele jô na: Abime te da yian!

¹⁷ E dis da kpwe'ele ésaa nge biasé mewôk e bili mfa'a nyia, bingbwañ y'ôtôñ bia ye tube dise te a bone be ndôé ba ye mine de.

¹⁸ Biôme bilaa bia dañe ma nkôñ, yaa binyin mbie ma dimi,

¹⁹ awoé ndôé e yôb été, e di nyo ako'o yôp, awoé sitima ézezañe mañ, a awoé fam e be ngone minga.

²⁰ Minga *mejian a bo mam avale di: A mane di a fimi fe biyaé, éyoñe te a jô na: Me nji ke bo *abé.

²¹ Si é ne fô'ôsan amu mam mela, amu menyin é se nguleya jibi:

²² *ôlo wo su'ulane jôô, akut da tu'u bidi

²³ nlulube minga wo ke aluk, a mbo ésaé minga a tyendé minga a nga bili nye.

²⁴ Betit ba dañe tyôtyoé *si nyô be ne benyin ve da mbe ba dañe fek:

²⁵ bilôñelôñelan, nsamba ô ne ngule momo, ve wo kômesane bidi bié a ésep;

²⁶ bengôm, nsamba betit ô ne fe ngule momo, ve ba bo bitaba'a biap e meko'o été;

²⁷ bitandak bi nji bi njôô, ve bise bia kui atan nsamba wua;

²⁸ afaé nde ô ne nguleya bi a mo, ve e too e menda bejô bôt.

²⁹ Biôm bilaa bi n'éjijin, bi ne binyin bi bili mbamba dulu:

³⁰ ngbwengbwem, mbene ya betite bese, nje é se nguleya mate jôm éziñ,

³¹ tite mewosan nje é bili angeteñ e ne ngu, nge nnôm ékela, a njô bôt ba nkane bezimbi wé be ne nsamba.

³² Nge mebun me veñesaneya wo akut a nge ô bili mbia b'asimesan, buti'i wo wôé anyu;

³³ amu mfu'ane menyañ wo ve boto, mmiatane jôé wo kuli metyi, a nsoñan ayaa wo té mintañete.