MINKANA 29 - Kalate Zambe Nnomo a Mfefe Mfefé Nkôñelan

¹ Môt ase a bo na be komeka'ane nye ve nye ki a bo'o ntip, a ye bu'uban atemetem teke mebala.

² Eyoñe ngu é ne e mo bezôsôô be bôt, bôte bese ba vak, v'éyoñe mbo *abé a bili éjôé bôte bese ba tat.

³ Nyô *a nye'e fek, ésaa wé a ne mevak; ve nyô a yeñ a binga b'ébamba a dimili akume dé.

⁴ Njô bôt a belane *zôsôô a telé si jé, ve nyô a n'ôzañ mfa'a nsilane betoya, a ye kuli azoé e si jé.

⁵ Nyô a du'u e môte mbok a yaa avot e mebo mé si.

⁶ Olam ô ne e mboone mbia môte si, ve zôsôa môt a fôn a mevak;

⁷ zôsôa môt *a yem ajô mintetek, ve mbia môt a nji bi fe'e ya yeme de.

⁸ Bekpwe'ele bôt ba tya'a nduan e tison été, ve mimfefek mia vôôn ayaa e bo te kui été.

⁹ Ye wo yem éyoñe mfefek ô bili ajô a akut' To'o mfefe'e te wo yaa nge woé, wo ye bo teke bi awo'on.

¹⁰ Bekuli metyi ba vini zôsôa môt, ve bezôsôô be bôt ba kaman ényiñe jé.

¹¹ Akute môt da kulan ayaa dé ese, ve mfefek wo jé'é ayaa te éyoñ wo solé de.

¹² Njô bôt, a tame ñhe ve'ele vô'ôlô nkobô minsos, wôna bivete bié bise bia ye yaa.

¹³ Nzôzoé ba mvômvô ba tôban, ve Zambe nye a ve bebaane éfufube mis.

¹⁴ Njô bôt a tyi'i mintete'e mi bôt mejô *zôsôô, a ye yen an'éto njôane jé ja yem éyoñ ése.

¹⁵ Nkasa a minkomekan bia ve fek, v'ésoé ndôman ja yeñ a ébien ja ve nyia ôson.

¹⁶ Eyoñe mbia be bôt be bili éjôé *abé da bo abui, ve bezôsôô be bôt ba ye bo bengaa ya nkuane wop.

¹⁷ Va'a nyô mone *melep wôna nleme wôé wo ye bômbô si, a mon ate a ye jalé wo a mefok.

¹⁸ Eyoñe ñyenane mam ô ntoo momo, bôt be n'éyoñe te teke fe jôm ja telé be. Ve nyô a ba'ale metiñ, a ne njalan a mevak!

¹⁹ Be ne te lebe mbo ésaé a mejô y'anyu amu a ye wôk ve te bo.

²⁰ Ye ô yeneya fo'o môt a ne avôle ya kobô' Ke a nye a akut ô viane buni akut.

²¹ Mbo ésaé ba te dañe voñôlô aso mongô a viane su'ulane buni na a ntoo mon.

²² Môt a ne mbia *nlem a tya'a mintañete, a nyô a wô'ôlun a bo abui mbia be mam.

²³ Mebune me môt ma kee nye ôsame ve nyô a ne nje'ebane *nlem a ye nyoñe duma.

²⁴ Nyô ba ñwuwup ba kabane biôm a vini émien, a ye nyoñe *melep nge a kobô bebela aba mejô; a Zambe a ye yo'é nye nge a bo te kobô bebela.

²⁵ Woñ, e mise me bôt ô ne ôlam, ve nyô a too ndi be Zambe jôm é ne teke nye bo.

²⁶ Bôt abui ba jeñe mvolan e be nyô a jôô, ve jôm é ne ji môt ja so be Zambe.

²⁷ Ekotekote môt é ne mbia jôm e be bezôsôô be bôt, a nyô zene jé é ne zôsôô a ne mbia jôm e be mbo *abé.