MINKANA 28 - Kalate Zambe Nnomo a Mfefe Mfefé Nkôñelan

¹ Mbo *abé a tup te na môt éziñ a tôñe nye mvus, bezôsôô be bôt be bili ndi minlem an'étoñe ngbwengbwem.

² Eyoñe si éziñ é nyiineya e nzameta'an été, bivet bi n'abui, v'éyoñe môt a ne fek a ñyeman a tebeya mam ma ke v'ôsu.

³ Nzôzoé môt wo tibili bingôngole bi bôt, wo funane ndula mveñ, e jame da tôñe valé e ne na njembane bidi.

⁴ Ba ba li'i metiñ ba se'e mbo abé ve ba ba ba'ale me ba wosane nye.

⁵ Mbia be bôt be ne te wô'ô nya ntyi'ane mejôô ve ba ba jeñe Zambe ba wô'ô mam mese.

⁶ Nzôzoé wo wulu e *zôsôô été ô ne mvaé, a dañe nkukume ñwô mezene mé me n'ékotekot.

⁷ Nyô a ba'ale metiñ a ne mon a ne fek, ve nyô a yeñ a bebo ébamba a wo'o ésaa ôsone nyô.

⁸ Nyô a kô'ôlan akume dé zene ya nsenge a nyoñan abet a kôane biôm bite asu nyô a ko bingôngole bi bôt éngôngo.

⁹ Nge môt éziñ a vôôn alo te kômbô wô'ô metiñ, meye'elane mé mebien me ne angônda mbia jam.

¹⁰ Nyô ase a tindi bezôsôô be bôt e mbia *zen, a ku ébé émien a nga fak, ve bezôsôô be bôt be bili ma'a ane élik.

¹¹ Nkukum ô ne fek e mise mé émien ve *nzôzoé wo yeme fas ô ne kulane nye.

¹² Eyoñe bezôsôô be bôt ba dañ, jame te e ne beta duma, éyoñe mbia be bôt ba betebane yôp, môt ase a sobô.

¹³ Nyô ase a solé bikobe bié a se nguleya ke ôsu, ve nyô a meme bie a li'i bie a yene *mvam.

¹⁴ Ebotan a môt *a ko woñ éyoñ ése, ve nyô a bo nleme wé ayet a ye ku minju'u été.

¹⁵ Mbia môt a bete bingôngole bi bôt e nlô yôp a ne e ngbwengbwem ja bam a e urs a wô'ô zaé.

¹⁶ Nteb'ôsu a nji bi fek a bo mam m'étibela'a abui abui, ve nyô a vini ma'an me n'ékotekot a kô'ôlane melu y'ényiñe jé.

¹⁷ Môt a be'e metyi me môte mbok a tub a kui ébé soñ: môt a bo'o te telé nye!

¹⁸ Nyô a wulu e *zôsôô été a ye nyiiban, ve nyô a tôñe mezene mebaé me too ékotekot a ye ku e zene jia y'été.

¹⁹ Nyô a bo ésaé e si jé a ye jaé a bidi, ve nyô a tôñesane zezé mam a ye jaé a azoé.

²⁰ Zôsôa môt a ye jaé a bibotan, ve nyô a n'ôjeja'a ya bo kum, ba ye bo te nyoñe nye ane nyô a ne te bijô.

²¹ Nsemane mingum mi bôt ô nji bo mvaé, avale fe ane nyô a wôé môt amu ôfufus adi.

²² Môt a bili mise minyamete a ji'a wua émien njeñan akum été, ve a ne te yeme na azoé da ye kui be nye.

²³ Nyô a bamé môt a su'ulane yene *mvam abui, a dañe nyô a bili ôyeme medu'an.

²⁴ Nyô a wub ésaa ba nyia biôm a jô'ô na: E nji bo mbia jam! Baa môt a bo ésaé ya tyam be ne nsamba wua.

²⁵ Nyô a bili ndam asimesan a ne mbôé mintañete, ve nyô a v'émiene be Zambe a ne mefo'o été.

²⁶ Nyô a buni émien a n'akut, ve nyô a wulu a fek a ye kôtéban.

²⁷ Nyô a ve minzôzoé biôm a ye bo te kui ôsame, ve nyô a dime mis e be minzôzoé a ye nyoñ abui biyo'é.

²⁸ Eyoñe bebo *abé ba betebane yôp, môt ase a sobô, a éyoñ ba wu, bezôsôô be bôt ba bo abui.