MINKANA 27 - Kalate Zambe Nnomo a Mfefe Mfefé Nkôñelan

¹ Te wo nguane mame y'akiti amu ô nji yeme mam ma ye kui den.

² Môte mfe nye a se'e wo sa ñhe anyu dôé womien.

³ Akok da bi kob abui, Nsele'e ki adit v'ôlune môt a n'akut wo bi kop a dañ akok a nselek.

⁴ Ayaa e ne njet, ôlune ki wo fuluku ve za a ne jibi *aban'

⁵ Minkomekan mia boban éngengeñ mi ne mvaé a dañe nye'an ô solô.

⁶ Meveñ me mvôé me ne jôme ya tabe je ndi, ve nlatan anyu ya nyô a siñe wo ô ne medu'an.

⁷ Nyô abum é jaéya a tibi bisia bi wôé a mebo, ve nyô a wô'ô zaé a wô'ô jôm ése e n'ayôle mvaé anyu.

⁸ Aval ônon wo ke dumba'a dé ôyap ô né, avale te môt a ke *nda jé ôyap a né.

⁹ Mbon a ôlobinda bia ve *nlem avak, a nje'ebane nleme mvôé môt ô ne mvaé a dañe melebe môt a v'émien.

¹⁰ Te kandane nyo mvôé nge mvôé ésoo, a te nyiin e *nda monyoñ e *môs ôlun; môt a too wo bebé a ne mvaé a dañe monyoñ a n'ôyap.

¹¹ A mone wom, bo'o fek a ve ma *nlem avak, éyoñe te ma ye bo nguleya yalane nyô a té ma si.

¹² Môt a ne ntye a sobô éyoñ a yen ébubua ja zu, bôt be ne te yeme fas be ba lôte nalé a su'ulane tôbane njuk.

¹³ Nyoñe ngômesane jé amu a nga li'i anyu éban ajô môte mfe; sili'i nye biban asu minga bikuu.

¹⁴ Nge môt éziñ a botane nyô mbo'o tyiñe yôp e ndibe tyé, jame te da lañebane nye ane biyo'é.

¹⁵ Asa'a *nda da toé mendim te tebe e môse mveñ ja noñ a e minga *a nye'e ntañete ba funan.

¹⁶ Nyô a bi minga ate a bi évuñulu, a wo wé wo bi mbon.

¹⁷ Etyé ja jeb étyé avale te ntabane vôme wua a môte mbok wo vele nsisime môt ôyo.

¹⁸ Nyô a nyoñe nju'u ya yale figié a ye di bibuma y'été, a nyô a ba'ale masa wé ba ye se'e nye.

¹⁹ Aval asu da yen ebien e mendim été, avale te nleme môt ô ne émiene ngobé.

²⁰ Vôme miñwuan mi né a édo'o ébé ya njañ bi se nguleya jaé; avale te fe mise me môt me se nguleya kate ñyenan.

²¹ Nduan ja tune argent a or ve duma môt a bili nde da tyi'i ajô dé.

²² Ja'ane wo tya'akut e ntyob été, e zañe mefes a *ntum, mboon akute wé wo ye bo te kôlô be nye.

²³ Tuka'a yeme ntômba ôse ya mintômba miôé, a wu mimbame miôé njuk;

²⁴ Amu akum e nji tab'éyoñ ése, avale fe ékate njô bôt e nji kalan ataté miaé wu a kui wu ôvok.

²⁵ Tyi'i bilo'o ya mefup a té mimfefé bilo'o mia kui toké'é minkôte bilok e minkô.

²⁶ Bitoñ mintômba bi ne asu ya jalé wo ngômesan a beyôm bikela asu ya ya'an afup.

²⁷ Menyañ beyale bikela ma yian asu bidi biôé, asu bidi ya *nda jôé, a asu ya bo bebo bisaé bôé be ne binga na be nyiñ.