MINKANA 26 - Kalate Zambe Nnomo a Mfefe Mfefé Nkôñelan

¹ Aval'ane meta'a me nji yiane a mfum ésep nge mveñ éyoñe nkôane bidi, avale te fe duma e nji yian akut.

² Aval'an'ônon wo fam ôlam a aval'ane nguleyebe a yele, nalé biyo'é bi nji bi amu bi ne te kap.

³ Nkasa ô ne asu ékabela kandé asu éjakas mbeñ asu mekut.

⁴ Te yalan akut ô ve'ele'e mboon akute wé womien ô za funane de.

⁵ Ve yala'an akut avale da yian mboon akute wé, a za ve'e fe'e na a ne mfefe'e môt.

⁶ Nyô a bo na akut e bo nkalane mefoé wé, a tyi'i émiene mebo a a nyu évô akute te.

⁷ Nkana akut da kan wo jembane ngu v'ane mebo me mbôbôk.

⁸ Akut nde da tiñeti ôkôk e toloo, akut nde fe da se'e akut avok.

⁹ Nkana wo so anyu mekut ô ne ane éyo é beme e wo nso'o meyok.

¹⁰ Nyô a nyoñ akute bisaé nge nyoñe bôte bese a tôbane be bisaé, a ne ñwua *élaé a balé bôte bese meveñ;

¹¹ akute da bulan e mboon akute wé été, da funane mvu ja bulane di bendôlô bé.

¹² Nge wo yene môt a too fek e mise mé émien ô ne tabe akute ndi a dañe nye.

¹³ Nleles wo jô na: étoñe ngbwengbwem é ne e zene yôp, a ngbwengbwem é tele minjoñe yôp!

¹⁴ Mbé wo tyiñelane memva'an, a nleles wo kôñelan énoñe jé yôp.

¹⁵ Nleles wo dub akule wo dé e be'e été, a wô'ô nju'u ya bulane de mvuse na a futi d'anyu.

¹⁶ Nleles ô ne fek e mise mé émien a dañe bôte zamgbwa ba yalane mame *mvo'é.

¹⁷ Nyô a fubu ajô e nji fombô nye été, a funane nyô a bi mvu ja lôt e melo.

¹⁸ Avale nyô a yaa a wua minkaba'a mi nduan, mekoñ bilaé a awu a né,

¹⁹ avale te môt a du'u nyô mbok a jô'ô na: ma bo fianga a né.

²⁰ Eyoñe nja'a é ne momo, nduan ja dim; a éyoñe mbo mfuk a nji bo, mewôman ma man.

²¹ Avale da'a é né e metye'e me nduane yôp, nja'a e nduane yôp, nalé môta mintañete a n'ôsôlé a né.

²² Mejô me môt a n'ékobekobô ma funane bone bidi bia dañe *zam anyu ma siliki a kui *miñya été.

²³ Nkone bifia bia solé mbia nsisim ô laté mbia nlem bia funane ésôm argent e vie'e ékone yôp.

²⁴ Nkobô y'anyu wo solé nyô a bili ziñ a a futi medu'an e nleme wé été.

²⁵ Eyoñ a kobô mbamba tyiñ te buni nye amu mbia be mame zamgbwa be ne nye *nlem.

²⁶ Ziñe jé é ne nguleya sobô e solé jé été, ve *nkpwala wé wo ye kulan ékôane bôt été.

²⁷ Nyô a fa'a ébé a ku été a akok da bulane be nyô a bi'iti de.

²⁸ Ekotekot ôyem ja siñe ba wo vit, a anyu medu'an da dutu awu.