MINKANA 25 - Kalate Zambe Nnomo a Mfefe Mfefé Nkôñelan

Mimfefé minkana mi Solômon

¹ Minkana mi Solômon mivok mmie mi: e bôte b'Ezékias njô bôte ya Yuda mbe be nga tili mie.

² Jame te e ne duma Zambe na a solé mam; ve di bejô bôt e ne na be tu'a fase mejô;

³ bi ne te yem vôme yôp da su'u nge vôm édo'o ya si ja kui; avale te fe bi nji yem asimesane bejô bôt.

⁴ Ô va'a ésôm ya argent, wôna mmé biôm a ye kôme mbamba jôm.

⁵ Bo'o na mbia môt a kôlô asu njô bôt, vôm éto njôane jé ja ye yem a *zôsôô.

⁶ Te zembe ôsu vôme njô bôt a too, nge tabe éto ja yiane bôbenen.

⁷ Amu da dañe mvaé be jô wo na: za'a nyoñe beta éto, sa na be sili wo si asu njô bôt, nye mise môé me yeneya.

⁸ Te bo avôle ya kee jam wo te yen aba mejô. Amu na nge môt wo soman a liti na wo ô ne mekua jé éfe wo ye bo'

⁹ Nge ô bili ajô a môte mbok, kôme de mia nye, ve te kulane jame môte mfe a te kate wo.

¹⁰ A za taa wo nge a wô'ô de a ékobôkobô jôé é za kulan.

¹¹ Mbamba nkobô a n'édima ane or a ne ñyetan a njo, argent a too fe mbôma'an été.

¹² Melep mfefek wo ve me n'élondo a émvongo nya or e melo me môt a tu'a vô'ôlô.

¹³ Nkatefoé a ne mewôk a funan aveb ôyôn melu ya nkôane bidi asu ba ba lôme nye; a ve nleme wé ngu.

¹⁴ Avale minkut a évuñulu te mveñ bi né, avale te nyô a du'u émiene na a n'ésôs a né.

¹⁵ A ayabe njiban be ne bo *ntyi'i mejô na a kañese jam éziñ avale fe évôvoé ôyem é ne dutu minlem mi ne ntip.

¹⁶ Ye ô yeneya wôé? Ja'ak abime da yiane wo; amu na nge ô dañe yemete abum, wo ye yô wô.

¹⁷ Te dañe ke bimo be nyo mvôé, a za katé a su'ulane vini wo.

¹⁸ Nyô a bôte môte mbo'o ajô a ne kek, nkpwaté mekôn a akoñ *élaé e ne nsoñ ne kebkep.

¹⁹ Mbunan ya buni nkoñe bôt e môse njuk, wo funan mbu'an asôñ a abo e ne mfô'ôsan.

²⁰ Nyiane *nlem wo wô'ôlune bia ô ne fe v'ane môt a vaa ngômesane jé e *môs ô n'avep, nge futi woon a ne sañ aveñe yôp.

²¹ Nge nsiñe wôé a wô'ô zaé va'a nye bidi. Nge a wô'ô évé, nyu'u nye mendim.

²² Eyoñ wo bo nalé, wo kôane ma'a me nduan e nlô wé yôp, a e Zambe wôé a ye bulane wo mboone te.

²³ Evuñulu y'akôé ja soo mveñ, a ôyem wo kobô asoé wo ve asu mbot.

²⁴ E ne mvaé na môt a tabe abu'u y'andile nda a dañe ntabane *nda jia a minga mintañete.

²⁵ Mbamba foé a so si é n'ôyap, a funane bivôvoé mendim asu môt a ntoo nte'an.

²⁶ E zôsôa môt mbo *abé a dutu a funan ôsôé a anjeñ bi n'ajuk.

²⁷ A nji bo mvaé ya bulu di wôé, a e nji bo mvaé be bôte na be jeñe duma dap.

²⁸ Môt a kate jôô émien a funane tison é ntoo ntyaman a mimfin mi maneya ku.