MINKANA 24 - Kalate Zambe Nnomo a Mfefe Mfefé Nkôñelan

¹ Te nyamete mbia be bôt nge kômbô tabe nsamba wop;

² amu nleme wob wo bôndé nsaane biôm, a biyaé biab bia soo njuk.

³ Nda ja lôñeban a fek a atyeñ nde da yemete je.

⁴ Nyemane mam ñwô wo bo na bitune bi *nda y'été bi jaé a e mevale me biôm mese me n'édima a mvaé.

⁵ Mfefe'e môt ô ne njalan a ngu a nyô a bili ñyeman a kô'ôlane ngule jé.

⁶ Amu mbamba meleb me ne volô wo na ô bo bita, a nyian wo so abui beve meleb été.

⁷ Fek ja dañ ôyabe yôb e b'akute môt a ye bo te kui anyu vôm ba kobô mejô;

⁸ nyô a bili ôsimesane ya bo abé a lobane jôé na: Nté *nkpwala.

⁹ Akut ôsimesan e ne mboon *abé, a nkpwe'ele a ne mbia jôm e bôt été.

¹⁰ Nge wo bili atek e *môs ô bili ôlun ngule jôé é ne fo'o v'atek.

¹¹ Nyi'i ba ba ke wôéban, ba ba zu wôéban, bo'o na be kamane be.

¹² Nge wo jô na aa! Bi nji bo bi yemek! Ye nyô a ve'e minlem mise kob a nji wôk' Nyô a nonô ényiñe jôé ye a nji yeme de, A ye bo te bulane môt ase ane mimboone mié mi né'

¹³ A mone wom ja'a wôé amu ô ne mvaé; ésia wôé é ne mvaé anyu dôé été.

¹⁴ Avale te fe nde wo yiane yeme fek asu nsisime wôé nge wo yene je, abui a ne wo ôsu, a ndi nleme jôé ja ye bo te kôlô.

¹⁵ Te yaa bikoé a *nkpwala ôse e vôme zôsôa môt a too, nge mane sa vôm a wo'on.

¹⁶ Amu na zôsôa môt a ne ku biyoñe zamgbwa a beta fe kôlô si, ve bebo *abé ba wuabane bidim été.

¹⁷ Te vak nge nsiñe wôé a ku, a éyoñ a kolé, nleme wôé ô bo'o te fôn.

¹⁸ Zambe a za yene jame te a wô'ô de *abé, a vaa ayaa dé be nye.

¹⁹ Te bo mbot asu amu ba ba bo *abé, a te nyamete bôt be ne *nkpwala.

²⁰ Amu akiti e ne momo asu mbia môt, lambe bebo *abé a dim.

²¹ A mone wom, ko Zambe a njô bôte woñ te bundan a bôt ba nye'e ba tyendé mam:

²² amu njañane wop wo ye so atemetem a za *a yem melep ma yange bana a ba bevok'

Mejô mefe ma so be mimfefek

²³ Mejô mefe ma so be mimfefek mme ma. Eyoñe ntyi'ane mejô, nseman mingum mi bôt ô nji bo mvaé.

²⁴ Nyô a jô mbia môte na: Ô ne *zôsôô, bôt ba yo'é nye, *meyoñ ma wô'ô ny'ôlun.

²⁵ Ve e ne mvaé mfa'a ba ba komekane mbia môt, a bibotan bia zu be be asu mvome jap.

²⁶ Nyô a yalan a bifia bi ne zôsôô nye ate a latane môt anyu.

²⁷ Kôm ésaé jôé atan, tuka'a ta'a mam y'été afube dôé été. Mvuse y'été wo ye lôñe *nda jôé.

²⁸ Te bo ngaa a wosane môte mbok te étom, ye wo kômbô wone bôt a biyaé biôé'

²⁹ Te jô na: Avale a te bo ma nde ma fe ma ye bo nye. Ma ye bulane môt ase ane mimboone mié mi né.

³⁰ Me nga lôte bebé afube nleles éziñ, a bebé afube mindi'i môt a ne *te fek.

³¹ Me nga yene biyo bi maneya kui vôm ase, mbia bilok bi nga yian afub ese a mfine meko'o wé ô kuya si.

³² Me nga tu'a fombô a nleme wom, me nga yen a nyoñe ñye'elan été.

³³ Mone nkean ôyo, mone ndeñan ôyo, mone nyokan, mo me too mba'an!

³⁴ Eyoñe te azoé da ye kui be wo atemetem, e kele da tyiñelane wo nkuk, nalé fe mfumbale zaé a ye kui be wo ane môta bita.