MINKANA 23 - Kalate Zambe Nnomo a Mfefe Mfefé Nkôñelan

¹ Nge mia beta môt mia di tebele wua, tabe'e nyô a ne wo ôsu ntye;

² nge nkômbane ya di ô ne wo abui, tame bo ne señele abui ndo'o dôé.

³ Te nyamete mbamba biseñ bidi bié, amu bi ne bidi medu'an.

⁴ Te ve womiene nyôle ne botok asu ya bi akum tame jô'é ve atyeñe dôé mfa'a ôte.

⁵ Amu awolo mise môé ma fombô mfa'akum e né, a koé na teke fe jôm. Amu akum da ve ebiene mefap, da yele mfa'a ya yôp aval'ane ndôé.

⁶ Te di bidi nyô a fombô bôt mbia be mis, nge kômbô di bitôto'o bidi bié.

⁷ Amu a ne aval'ane mintyi'ane mié mi né; a ye jô wo na: Ja'ak a nyu ve nleme wé ô nji bo be wo.

⁸ Wo ye yô éfus adi wo te di, a nye'an ôse wo bili wo ye bo momo jam.

⁹ Te kobô e melo m'akute môt, amu da ye biasé ñyemane ya mejô môé.

¹⁰ Te té nnôm akône ya nné, a te nyiin afube bobenyui été;

¹¹ amu nyô a kune be a ne ngu, a ye tebe wo ngame yat a kaman ajô dap.

¹² Va'a nleme wôé mfa'a ya nye'elan a melo môé mfa'a *minkobô mi ñyemane mam.

¹³ Te si'ibi ve mone wôé *melep, nge wo bôme nye a nkasa, a ye bo te wu.

¹⁴ Eyoñ wo bôme nye a nkasa, wo ye kaman ényiñe jé na é bo te ke vôme miñwuan mi né.

¹⁵ A mone wom, nge nleme wôé ô ne fek, nleme wome fe wo ye vak.

¹⁶ Miñya y'abume dam mia ye fôn a mevak éyoñe biyaé biôé bia ye kobô *zôsôô.

¹⁷ Nleme wôé ô bo'o te nyamete bebo abé ve ko Zambe woñ *môs ôse:

¹⁸ amu abui a zu, a ndi nleme jôé ja ye bo te kôlô.

¹⁹ Wo, a mone wom, vô'ôlô'ô a bo fek, a liti nleme wôé *zen é ne *zôsôô.

²⁰ Te bo ézezañe ya ba ba nyu bilam, ézezañe ya ba ba di tit a dañe nné,

²¹ amu beso'o bilam a ba ba di abui ba ye kui azoé, a éles ja bo na môt a fete nkan.

²² Bo'o ésoo mewôk amu ny'a nga biaé wo, a te biasé nyua éyoñ a ntoo nnôm.

²³ Jeñe bebela a te kuane nye, nalé fe jeñe fek, ayé'é a ñyemane mam.

²⁴ Esaa zôsôa môt a ne fo'o meva'a été, nyô a biaé mfefek a bili wô mevak;

²⁵ ésoo a nyua, be tame vak, minga a nga biaé wo a tame tabe mefôn été,

²⁶ A mone wom, va'a ma nleme wôé, a mise môé me tame yene mezene mame mvaé.

²⁷ Amu minga ébamba a ne édo'o ébé, a éza minga ki ôfanefane mfa'an anjeñ.

²⁸ A kolé melam ane ze mimfaka, avale te fe a kô'ôlan bekoñe bôt e bôt été.

²⁹ Za a ne éngôngo? Za a bili ôlun' Za a ne môta mintañete? Môta bisoman' Nyô a ne meveñe nyô te étom' Nyô mis me ne bivele'

³⁰ Ye sa bôt ba langane fefele bilam' Ye sa ba ba jeñe bilam bi ne mbundan'

³¹ Te fombô woon amu a ne mbamba évele, amu a kui mesana'a *élaé été ng'amu a lôte tyi'ibi éngoñ.

³² A su'ulan a lôp ane nyo, a su'ulane di'an ane viet.

³³ Mise môé ma ye fombô éza binga, a nleme wôé wo ye kobô jo'o jo'o.

³⁴ Wo ye bo aval'ane môt a bôô mañ été, ane môt a bôô abôbône Sitima;

³⁵ wo ye jô na: Ba te bibi ma, me teke wô'ô mintaé! Ba te bôme ma, me teke yem! Ma ye vee ôyo éyoñ évé' Ma ye beta sili menyu!