MINKANA 22 - Kalate Zambe Nnomo a Mfefe Mfefé Nkôñelan

¹ Mbamba jôé a ne mvaé a dañ abui akum, nalé fe na *mvam é ne mvaé a dañe argent a or.

² Nkukum a *nzôzoé ba fulan amu Zambe nye a nga té be bebaane.

³ Môt a ne ntyee a sobô éyoñ a lôô mbia jam a zu, ve minsusuk mia lôt te kee dise wé a su'ulane be'e minju'u y'été.

⁴ Jam da tôñe nsuubane si e ne nkoone Zambe woñ, akum, duma a ényiñ.

⁵ Biyo, melam bi ne njalan e *zen ékotekote môt; nyô a kômbô kaman ényiñe jé a ke *zen éte ôyap.

⁶ Ye'ele'e mongô mbamba mefulu atata'a y'ényiñe jé, ja'ane na a ntoo nnôm a ye ba'ale me.

⁷ Minzôzoé mi n'éjôé nkukume si, a nyô a bili mvôla a n'ôlo ya nyô a nga kôlé nye.

⁸ Nyô a bé mvô a ye kôane bidim, a ôlé y'ayaa dé wo ye jañ.

⁹ Môt a n'ésôs a ye bi ébotan, amu a ve éngôngole môt bidi bié.

¹⁰ Tita'ane nkpwe'ele a ntañete wo ye man; mewosan a ébiasé fe bia ye man.

¹¹ Nyô *a nye'e mfubane *nlem, *mvam é ne nye biyaé a njô bôt a ne nye mvôé.

¹² Mise me Zambe ma bômbô ñyemane mam évevé, v'a ben mejô me môta njoñ.

¹³ Nleles wo jô na: Ngbwengbwem é n'atan! Ma ye wôéban e zene yôp!

¹⁴ Anyu éza binga e ne ébé é n'édok, e môte Zambe a wô'ô *abé a ye ku été.

¹⁵ Mongô a be'e *nlem akut, ve nkasa a éjôé bia ye volô nye na a sa'ale mboone te.

¹⁶ Nyô a kpwe'ele *nzôzoé a bo wô na ô bik; nyô a ve nkukum a ye su'ulane bo *nzôzoé.

Mejô mimfefek

¹⁷ Ke'e alo a wô'ô mejô mimfefek; va'a nleme wôé mfa'a ñyemane wom,

¹⁸ amu e ne mvaé na ô ba'ale me e be womien. A na me tabe nkôman e biyaé biôé,

¹⁹ nalé ndi jôé ja ye bo be Zambe; ma zu ve womiene ñyemane den.

²⁰ Ye me nji tili wo *melep a mimfasan biyoñ bilaa,

²¹ asu ya bo na ô yem jam e né, bebela bifia, nalé wo ye yalane môt a lôme wo a bebela bifia'

²² Te wôlé *nzôzoé biôm amu na ô ne *nzôzoé. A te tibili éngôngole môt e mbé;

²³ amu Zambe a ye kaman ajô dap a vaa ényiñ e be ba ba vaa be je.

²⁴ Te yeñ a nyô a ne mbia *nlem. Te wulu a nyô a yaa,

²⁵ ô za mane yembane mezene mé, a koon ôlam asu ényiñe jôé.

²⁶ Te bo wua ya ba ba futi bebien ékoé tyiñ ba ba tiñeti bebiene memvôla e tyiñ;

²⁷ nge ô nji bi jôme ya ya'an amu jé ba yiane nyoñe wo énoñ ô bôô yôp'

²⁸ Te té akône nné nde b'ésoo be nga telé.

²⁹ Nge wo yene môt a too atyeñ ésaé jé été, a ye teb'asu bejô bôt, a ye bo te teb'asu ayôme bôt.