MINKANA 21 - Kalate Zambe Nnomo a Mfefe Mfefé Nkôñelan

¹ Nleme njô bôt ô ne ôtôñ mendim e wo Zambe été, a liti wô *zen mfa'a jôm ése a yene mvaé.

² Mezene me môt mese me ne *zôsôô e mise mé émien, ve Zambe nye a ve'e minleme kop.

³ Zambe a yene nya ntyi'ane mejôô a mboone *zôsôô mvaé, a dañe mveane biôme metuna'a.

⁴ Mfomban bives, nsisime mebun ja'an éfufube bebo *abé, mam mete mese me n'abé.

⁵ Minsôñan mi môt a saé abui mi ne mfi ô ne te k'aselan, v'ôjeja'a a kee fo'o môt azoé.

⁶ Akume môt a bi mvôle yôp da jañ avô a kee môt awu.

⁷ Evô bebo *abé ja bi be amu ba bene bo *zôsôô.

⁸ Mboone ñwôé bôt ô n'ékotekot, ve mboone mbamba môt ô ne *zôsôô.

⁹ A ne mvaé ya tabe aku'u ya andil éziñ si, alôte na mia minga *a nye'e mejô mi tabe *nda jia.

¹⁰ Nsisime mbia môt wo nye'e *abé, ja'ane mvôé jé é ne te yene *mvam e mise mé.

¹¹ Nleban ba lebe nyô a biasé bôt wo ve nyô a nji bi ñyemane fek, a éyoñ ba ye'ele mfefek, wo nyoñe ñyeman.

¹² Zôsôa môt a fombô *nda mbo abé a a sô'ôlô bebo *abé nju'u été.

¹³ Nyô a dibe melo te wô'ô du *nzôzoé, éyoñe nye fe a ye loon, ba ye bo te yalane nye.

¹⁴ Mveane ya asoé wo je'e ayaa avale te fe mveane wo futi môt e mfek wo dime mbia ayaa.

¹⁵ Mboone *zôsôô ô n'avak e be zôsôa môt, ve woñ ô ne jôme bebo *abé.

¹⁶ E môt a kôlô e zene ntabane ntyee a ye su'ulane bômbô ézezañe miñwuan.

¹⁷ Nyô a dañe nye'e mimvôman a ye su'ulane bo *nzôzoé. Nyô *a nye'e bilam a abui ndian a se nguleya bo kum.

¹⁸ Mbia môt a ne ngôtô zôsôa môt a môt a ne njoñ ngôtô bôt be ne *zôsôô.

¹⁹ A ne mvaé ya tabe vôme bôt be ne momo a dañe na ô bi minga mejô a ôlun.

²⁰ Akum e n'édima a mefok bi ne e ndaa mfefe'e môt; ve akute môt da mine biôm bite.

²¹ Nyô a tôñesane nya ntyi'ane mejôô a nkoon éngôngo a ye bi ényiñ, mekabe a duma.

²² Mfefe'e môt wo nyiin e tison é bili biwôlô bewosan bia kamane je a mane te'elane ngule tison éte é nga too je ndi.

²³ Nyô a kaman anyu dé a ôyeme wé a kamane nsisime wé mfa'a biyebe.

²⁴ Nyô a ne mebun a ékem jôé dé e ne na: Nkpwe'ele a bo mam a buni'i émien a dañe nné.

²⁵ Nkômbane nleles wo wôé nye, amu mo mé ma bene fô'ôsan.

²⁶ Ngume *môs, minyamete mi bili nye ve zôsôa môt a kap teke li'i a bili jôm.

²⁷ Metuna'a bebo *abé me ne mbia jôm, a dañe dañ éyoñ ma veban a mbia ôsimesan.

²⁸ Ngaa a ne minsos a ye wu, ve môt a vô'ôlô a ye bo ngule ya kobô éyoñ ése.

²⁹ Mbia môt a ve asu dé na be tabe de ndi. ve zôsôa môt ny'a yemete zene jé.

³⁰ E mise me Zambe, fek, atyeñ nge *melep bi ne momo.

³¹ Ekabela é ne nkômesan asu môse bita. ve nyian ô ne jôme Zambe.