MINKANA 20 - Kalate Zambe Nnomo a Mfefe Mfefé Nkôñelan

¹ Woon a ne nkpe'ele, a ényunyui ése é ne ngu ja bo môte na a bo biduñ abui, nyô ase a jañeya été, a se nguleya bulan bi fe'e abum.

² Njô bôt a yaaya a funane ngbwengbwem ja bam. Nge wo soñe nye a yaa wo bo womien *abé.

³ E ne duma mfa'a môte na a bo te tebe bebé vôme mintañete mi né v'akute môt ese da ji'a yaa.

⁴ A ôyôn, nleles wo kate bé bidi amu avep. Eyoñ ba kôane bidi a jeñ, ve teke bi jôm!

⁵ Melep, e nleme môt, me ne ane mendim me n'édok. Mfefek wo yeme lab été.

⁶ Abui bôt da yôtan, môt ase, mbamba nyoñane bôte wé, ve za a ne yene môt a wulu ane da yian'

⁷ Zôsôa môt a wulu e *mvo'é jé été. Ebotan a bone bé éyoñ émien a wuya.

⁸ Njô bôt a too éto njôô jé a tyi'i mejô, a vaa *abé ese ve a mfomban a fombô bôt.

⁹ Za a ye jô na: me boya nleme wom te bijô, me maneya tune mamien mfa'a y'abé'

¹⁰ Mevale metyi me kop mebaé, mevale m'avek mebaé, bi ne mbia jôm be Zambe jia a ji évok.

¹¹ Monafam, éyoñ a ngenane mongô, a liti, e mimboone mié été, nge ntabane wé wo ye bo te bijô nge *zôsôô.

¹² Alo da wôk a e dise da yen, Zambe nye a nga bo bie ji a jina.

¹³ Te nye'e ôyo ô za bo *nzôzoé, tame kune kôlô si, éyoñe te wo ye di a jaé.

¹⁴ Nkuse jôm a jô na, jôme ji é n'abé jôme ji é n'abé, v'éyoñ a keya ôyap a nga se'e émien.

¹⁵ Or a abui meko'o me n'édima bi ne ve jôme ja dañ édima é ne biyaé bia yeme mam.

¹⁶ Nyoñe ngômesane jé amu a nga li'i anyu éban asu môte mfe; sili'i nye biban asu nneñ.

¹⁷ Atata'a bidi ya wup bi ne *zam, v'asu'ulan bi ne nselek anyu été.

¹⁸ Mam môt a bôndé ma yem a melep; bo'o bita a mbamba mefek.

¹⁹ Nyô a miase mfuk a kulane minsolane mi mam; te wulu nsamba môt a kobô abui;

²⁰ nge môt a biasé ésaa baa nyia, lambe wé a ye dim e dibi été.

²¹ Eli'i môt a nyoñ atemetem metata'a, ve asu'ulan, ja ye bo te ébotan.

²² Te jô na: Ma ye bulan *abé, ve tabe'e ndi be Zambe, wôna a ye nyii wo.

²³ Zambe a vini mbelane metyi me kob mevale mebaé, a ékotekote kob é nji bo mbamba jôm.

²⁴ Zambe nye a wulu môt, ve môta binam a ne nguleya wô'ô zene jé émien aya'

²⁵ E ne beta ôlam mfa'a môt éyoñ a jô éngbwemese njôane na: jôme ji é n'étyi, v'a viane su'ulane zu fase mvus a koé na a maneya tiñeti metiñ.

²⁶ Mfefe'e njô bôt wo tyamelane mbia be bôt a ve be *melep.

²⁷ Mfasan ô ne lambe Zambe a ve môt asu ya faé bido'o y'ényiñe jé éfufup.

²⁸ Mvam a bebela bia kamane njô bôt; a yemete éto njôane jé a mboone *mvam.

²⁹ Abeñe ya bendômane be bôt e ne ngule jap, éjijine ya minnôm e ne nyup;

³⁰ meveñ ma kui metyi ma saé abé avale te fe minkasa mia nyiin a kui nyôle môt été.