MINKANA 2 - Kalate Zambe Nnomo a Mfefe Mfefé Nkôñelan

Fek ja kaman mfa'a y'abé

¹ A mone wom nge wo nyoñ mejô mam a nge wo ba'ale mebendé mam e be womien,

² nge wo tu'a kee alo mfa'a ya fek, a nge wo vit nleme wôé mfa'a ya nya mfasane mam,

³ yaa, nge wo loon atyeñ a bete tyiñe jôé mfa'a ya nya mfasane mam,

⁴ nge wo jeñe wô ane argent a tu'a jeñe wô ane bidima bi biôm:

⁵ éyoñe te wo ye wôk ajô ya ko Nti woñ a wo ye yeme Zambe.

⁶ Amu Nti nye a ve fek, ñyemane mam, a nya mfasane mam bia so anyu dé;

⁷ e bôt be ne *zôsôô a naane be mefok, a ne fe ében e be ba ba wulu *zôsôô,

⁸ a kamane mezene me ne *zôsôô, a kamane fe mezene ya *bebuni bé.

⁹ Eyoñe te wo ye yeme zôsôô a nya ntyi'ane mejôô, mbamba mboon a mezene mese ma soo ébotan.

Fek ja nyii bôt

¹⁰ Amu fek ja ye zu wo nlem a ñyemane mam wo ye bo mvaé ya nsisime wôé;

¹¹ mfasan wo ye ba'ale wo, nya fe'e a ye lôñe wo nka'alé,

¹² asu ya kôté wo e zene y'abé a kôté wo e be môt a kobô bikotekote bi mam,

¹³ e be ba ba li'i mezene me ne zôsôô a wulu e ma me ne dibi,

¹⁴ mbe ba va'a mboon abé a liti ava'a dab e mboon ékotekot,

¹⁵ mbe bete mezene mab me ne bikotekot a mimfaka miab minkot-minkot binyi'a-binyi'a;

¹⁶ asu ya kôté wo e b'éza minga a be minga bikuu a kobô élen,

¹⁷ nye ate a li'i mvôé jé ya aso mongô; a vuan élate Zambe wé;

¹⁸ amu *nda jé ja lumbu awu, a mimfaka mié mia ke bewu be né,

¹⁹ teke wua ya ba ba ke be nye a beta so a suan e mezene y'ényiñ.

²⁰ Nalé ate wo ye wulu e zene mbamba be bôt, a ba'ale mezene ya bezôsôô be bôt.

²¹ Amu bezôsôô be bôt mbe ba ye tabe e si jap, e bôt be ne *zôsôô mbe ba ye li'i été;

²² ve bôt be n'abé a melo ba ye kôlô été a ba ye titane be.