MINKANA 19 - Kalate Zambe Nnomo a Mfefe Mfefé Nkôñelan

¹ Nzôzoé wo wulu e *zôsôô wé été ô ne mvaé a dañe nyô a ne nlaa minsos a too fe ôkukut.

² Te ke môt a yene njembane ñyemane mam mvaé a nyô a n'avôle mebo a fuban *abé été.

³ Akute ya be môt da jo'otane zene jé, asu'ulan a nga viane kee Zambe ôlune nyô.

⁴ Akum da kô'ôlane bemvôé abui, ve *nzôzoé wo kandane mvôé jé;

⁵ ékotekote ngaa ja ye bo te bi mekabe, a nyô a laane minsos a ye bo te fam *melep.

⁶ Abui bôt da jeñe mvolan e be biwôlô bi bôt, a môt ase a ne mvôé nkekabe môt.

⁷ Bobenyañ be *nzôzoé bese ba vini nye, a bemvôé bé mbe ba dañe dañe tube nye! A jeñe vôme ya laane minlañ, ve teke jôm;

⁸ môt a bo fek *a nye'e nsisime wé, nyô a ba'ale ñyemane mam a tôbane mvom;

⁹ ékotekote ngaa ja ye bo te nyoñe mekabe, a nyô a laane minsos a ye wu.

¹⁰ E nji yiane na akut e nyiñe mefok été, a da dañ *abé na *ôlo ô jôô bone bejô bôt!

¹¹ Môt a yeme fas a n'ôte'ete'e ya yaa, a a belan éjijine jé na a biasé jam ba te bo nye.

¹² Ayaa njô bôt e ne ane mvame ngbwengbwem, a *mvam jé ane mfô mendim e bilo'o yôp.

¹³ Akute mon e ne ébubua jam asu ésaa wé, a môman me minga me n'asa'a *nda da toé mendim éyoñ ése.

¹⁴ Nda a akum bi ne éli'i b'ésaa, ve minga a yeme fas a ne mveane Zambe.

¹⁵ Eles ja wua môt ôyo melom, a nyô a ne mbim a ye wô'ô zaé;

¹⁶ nyô a ba'ale *atiñ a ba'ale nsisime wé, nyô a biasé mezene mé a ye wu.

¹⁷ Nyô a ko éngôngole môte ngo, a ve Zambe ékôla, a Zambe a ye bulane nye jôme ja yiane nye.

¹⁸ Bôme nyô mon amu ndi *nlem ya na a ne tyendé é ngenan, ve te bi nkômbane ya bo na a wu.

¹⁹ Nyô ayaa da bi a ye ya'an étom y'été, amu na nge wo jamé nye wo tindi nye na a beta taté.

²⁰ Wô'ô meleb a nyoñe nye'elan, asu'ulan, wo ye bo fek.

²¹ Nleme môt ô bili abui asimesan, ve nkômbane Zambe ñwô wo ye boban.

²² Jôm ja bo na môt a dutu bôt é ne mbamba nyoñan a nyoñe be; *nzôzoé ô ne mvaé a dañe nlaa minsos.

²³ Nkoone Zambe woñ wo kee môt ényiñ, a nyô ase a bili wô a ye bi mam mese a njuk wo ye bo te kui be nye.

²⁴ Nleles wo kee ngum akule wo e be'e été, ve te nguleya bulane de mvuse na a futi d'anyu.

²⁵ Bibi'i nkpwe'ele, wôna akut da ye tabe ntye. Komeka'ane mfefek wôna a ye wô'ô ñyemane mam.

²⁶ Nyô a bo na ésaa a kui ôsame, nge bo na nyia a tup, a ne mon a ve ôson a mimbote nyô.

²⁷ Jibi'i bo te nyoñe ñye'elan a mone wom, nge nye'elane te wo viane bo na ô dimi fé, a ke *minkobô ya ñyemane mam ôyap.

²⁸ Nsusu'u ngaa wo biasé metiñe ya nkobane mejô, a anyu mbia be bôt da wô'ô *abé mvaé.

²⁹ Mintyi'ane mejô mi ne nkôman asu bekpwe'ele, a minkasa asu mvuse mekut.