MINKANA 17 - Kalate Zambe Nnomo a Mfefe Mfefé Nkôñelan

¹ Efuse nkôte belet é ne mvaé évôvoé été, a dañe *nda é ne njalan a tit e metyama'an été.

² Mbo ésaé a yeme fas a dañe mon a v'ôsone nyô, a mbo ésaé ate a ye nyoñe ngap ézezañe ya bobenyañ b'akute mone te.

³ Nduan ja ve'ele or a argent, ve Zambe a ve'ele minlem mi bôt.

⁴ Mbo *abé nye a vô'ôlô biyaé bi n'ékotekot, a ékotekote môt ja kee alo e b'ôyem ô ne mvô.

⁵ Nyô a kpwe'ele *nzôzoé a biasé Nté wé; môt a vak éyoñe nyô mbok a bili njuk, ba ye bo te jamé nye.

⁶ Bendaé be n'ékate duma e be minnôm befam, a b'ésaa ki meva'a ya bobefame bap.

⁷ Benya bôtô be nji laa minsos, a mekut me nji ko woñe ya jô jôm éziñ,

⁸ mvaka é ne ako'o ma'a e be nyô a bili je, ba simesa'ane na e vôm ase be ne kôñelan, mame mé ma ye ke v'ôsu.

⁹ Nyô a buti ékop a jeñe nye'an, ve nyô a ba'alane je bifia bié été a kandé bemvôé.

¹⁰ Nyeme mam nye a semé mveane bijô, a dañe minkasa ntet be ne bibi akute môt.

¹¹ Mbia môt a jeñe v'ane a ne bene njôan, ve ba ye lôme njenjete nkatefoé ô wosane nye.

¹² A ne mvaé ya tôbane ñyôyo'o tit wo jeñe bone bé, a dañe na ô tôban akut e bo'o mam m'akute mé.

¹³ Nyô a bulane mvaé a *abé, *abé da ye bo te ke *nda jé ôyap.

¹⁴ Ntya'ane mewôman ô ne ane wo tyame miek, éyoñ ntañete ô ngenane te bo, taté'é wondé.

¹⁵ Nyô a kale mbia môt a nyô a ve zôsôa môte mekua, bebaane be ne mbia jôme be Zambe;

¹⁶ moné a volô jé e mo m'akut, y'asu ya kuse fek' Ve fek é ne nye momo.

¹⁷ Mvôé ja nye'e biyoñ bise a monyañ a ne valé mfa'a ya volô éyoñ y'ôlun.

¹⁸ Akute môt étam nde da kute tôé asu éza mvôla.

¹⁹ Nye'e mejô *a nye'e fe mveane mekua, a nyô a bili ngule minkômban ôsame a ye kui be nye.

²⁰ Nlem ô n'akut ô ne teke tôbane mvom, a nyô a bili ôyem ô n'ékotekot, a ye ku nju'u été.

²¹ Nyô a biaé akute mon a ye bi ôlun ésaa akut a se nguleya vak.

²² Nlem ô ne mevak ô ne mbamba biañ, ve *nsisim ô ne nte'an wo kôtô bives.

²³ Mbo *abé a kañese biboteze alô'ô été, asu ya bo mezen me ne *zôsôô ékotekot.

²⁴ Fek é ne fefele ñyeme mam, ve mise m'akute môt ma fombô a kui aku'u si.

²⁵ Akute mon da ve ésaa wé ôlun, a ve nyô a nga biaé nye évindi *nlem.

²⁶ E nji bo mvaé ya bo na zôsôa môt a ya'an, ja'an v'aleman, nge bôme benya bôtô amu *zôsôô wop.

²⁷ Môt a ne te fôtan a bili ñyemane mam, a nyô *nlem ô bôô si ne mieññ a ne mfefe'e môt.

²⁸ Ja'an akute môt, éyoñ e too évô, da yené ane mfefek; nyô a fete biyaé bié a ne fek.